Dual Panel1Sura andre moroi khõgu, sondrõnia'õ Banua Niha Keriso, khõ Nina si no ituyu Lowalangi, ba ba ndraono Nina andrõ ni'omasi'õgu sindruhundruhu. Tenga ha ya'o, no fefu niha si no aboto ba dõdõ turia sindruhu andrõ soroi Lowalangi, ba sangomasi'õ ya'ami gõi.
2Bõrõ me Lowalangi sindruhu andrõ mo'arota bakha ba dõdõda, ba lõ tebulõ so Ia khõda sagõtõ fa'ara.
3Ya Ibe'e khõda howuhowu, fa'ahakhõ dõdõ ba fa'ohahau dõdõ Lowalangi Ama, ba Yesu Keriso, Ono Nama andrõ. Ena'õ ma'afefu da'õ ta'okhõgõ ba wa'atulõ dõdõ ba fa'omasi.
4No omuso sibai dõdõgu me u'ila wa iraono Nina so zauri molo'õ Turia sindruhu andrõ soroi Lowalangi si mane si no Ifakhoi Ama khõda.
5Bõrõ da'õ, Ina, u'andrõ sibai ena'õ ya'ita fefu faoma ta'omasi'õ nawõda. Niw̃a'õgu andre tenga sambua amakhoita si bohou; amakhoita andre no tebe'e khõda i'otarai mbõrõta.
6Mangomasi'õ eluahania mamalua amakhoita Lowalangi. Ba amakhoita andrõ si no mirongo i'otarai mbõrõta ya'ia wa lõ tola lõ faoma mi'omasi'õ nawõmi.
7Ato zamaelungu si no muzawili misa ba gulidanõ ma'asagõrõ. Ya'ira andrõ oi niha si lõ mamaduhu'õ wa Yesu Keriso no mõi ba gulidanõ si mane niha. Niha si mane da'õ no samaelungu ba Udu Keriso.
8Bõrõ da'õ, mifaigi lala fa bõi taya zi no ma'ohalõw̃õgõi khõmi. Mi'oigõ dõdõmi ena'õ afõnu mitema luomi moroi khõ Lowalangi.
9Niha si lõ mo'arota ba wamahaõ Keriso andrõ, si no fahole moroi ba nifahaõ Keriso, niha da'õ lõ khõnia Lowalangi. Niha si lõ tebulõ ba wamahaõ Keriso, eluahania so khõnia he Lowalangi Ama, he gõi Ono.
10Bõrõ da'õ, na so niha si mõi khõmi ba ituriaigõ khõmi wamahaõ si tenga nifahaõ Keriso, bõi mitema niha si manõ ba nomomi, ba bõi gõi miw̃a'õ ya'ahowu khõnia.
11Bõrõ me niha sanguma'õ ya'ahowu ba niha si mane da'õ, ba no fao ia gõi awõ niha da'õ ba wamalua folau si lõ sõkhi andrõ.
12Oya sibai zinangea u'ombakha'õ khõmi mena'õ, ba abõlõ sõkhi bõi faoma sura. Utõtõna wa tola u'ondrasi ami ba fahuhuo samõsa ndra'o khõmi, ena'õ sindruhundruhu omuso dõdõda.
13Iraono dalifusõu Ina si no gõi Ifili Lowalangi la'owai ndra'ugõ.