Dual Panel1No si mate ami fõna, bõrõ wanawõnawõ oroisa Lowalangi, ba no si so horõ ami.
2Me luo da'õ no mi'o'õ huku si to'õlõ ba gulidanõ andrõ; eluahania no mi'o'õ wamatõrõ zokhõ fa'abõlõ ba dalu mbanua, ya'ia geheha si so iada'e sondrõnindrõnisi tõdõ niha si lõ omasi molo'õ khõ Lowalangi.
3Me fõna, ya'ita fefu no si mane ya'ira gõi; no solo'õ fangisõ nõsida ita ba wamalua somasi nõsi awõ gera'erada si lõ sõkhi. Me luo da'õ gõi no niha si gõna fõnu Lowalangi ita, si mane niha bõ'õ.
4Ba no fondrege wa'ebua wa'asõkhi dõdõ Lowalangi! I'omasi'õ sibai ita,
5irege me luo no mate ita bõrõ golalõw̃ada, ba no I'orifi ita awõ Keriso. Tobali, ha bõrõ wa'ahakhõ dõdõ Lowalangi, wa no auri ami.
6Bõrõ me ha sambua ita ba khõ Keriso Yesu, no I'orifi ita Lowalangi awõ-Nia, ena'õ samatõrõ gõi ita awõ-Nia ba zorugo.
7Ifalua da'õ Lowalangi, ena'õ ba ginõtõ si so fõna, oroma ba niha ha wa'ebua wa'ahakhõ dõdõ Lowalangi andrõ nibe'e-Nia khõda ba khõ Yesu Keriso.
8Fa'ahakhõ dõdõ Lowalangi, wa no auri ami, bõrõ wamati khõ Yesu Keriso. Ba tenga moroi khõmi da'õ, no buala Lowalangi. Tenga moroi ba mbuabua fa bõi isuno ia niha.
9(2:8)
10Nifazõkhi Lowalangi sa ita, nifazõkhi ba khõ Yesu Keriso, ba wamalua buabua si sõkhi si no Ihonogõi Lowalangi khõda.
11Ira talifusõ si tenga niha Yahudi! Mitõrõ tõdõmi ami ba ginõtõ fõna: Ya'ami no "niha si lõ muboto", dali niha Yahudi, sanguma'õ si no muboto ira (eluahania, si no so tandra nifazõkhi niha ba nõsira).
12Me luo da'õ lõ si sambua ami Keriso, no niha bõ'õ ami si lõ farahu ba mbanua Lowalangi andrõ si no mutuyu. Lõ si te'u'u ami ba gamabu'ula li andrõ, nilau Lowalangi ba mbanua-Nia. No si lõ tõtõnafõ ami ba gulidanõ andre ba si lõ Lowalangi.
13Ba iada'e, me no ha sambua ami Keriso, ya'ami si no arõu fõna, no tobali ahatõ bõrõ wa'amate Keriso andrõ.
14Keriso samõsa wangatulõda. No I'orudugõ niha Yahudi awõ zi tenga niha Yahudi tobali ha sambua soi. Fa'udusa si no amaedola goto'oto õli samabali ya'ira, no Idudugõ Keriso ba wa'amate-Nia.
15Huku agama Yahudi awõ gamakhoita andrõ no Iheta Keriso, ena'õ si dombua soi andrõ tobali ha sambua soi niha si bohou, tobali sambua ba khõ Keriso. Da'õ lala Keriso ba wanga'asogõ fangatulõ.
16No i'osambua'õ Keriso zi dua ngasi niha andrõ ba wa'amate-Nia ba rõfa, ba I'atulõ'õ ira khõ Lowalangi, irege taya ngawalõ wa'udusa andrõ.
17Da'õ mbõrõ wa so Keriso ba wangombakha Turia Somuso Dõdõ fangatulõ andrõ ba khõmi, he ba khõmi si tenga niha Yahudi si no arõu khõ Lowalangi fõna, ba he gõi ba niha Yahudi si no ahatõ khõ Lowalangi.
18Ba khõ Keriso, ya'ita fefu -- he niha Yahudi ba he niha si tenga niha Yahudi -- tola tefahatõ ba khõ Nama bõrõ Geheha Lowalangi andrõ.
19Bõrõ da'õ, tenga sa'ae niha bõ'õ ami, ma si fatewu. No fagõlõgõlõ ono Mbanua Lowalangi ami fefu iada'e. No ndrotondroto zoroiyomo Lowalangi ami.
20Ni'otomosi ba dete danedane si no latou'õ ira sinenge ba ira sama'ele'õ ami, ba zi no tobali danedane ba watalinga Keriso Yesu.
21Ya'ia zama'anõ ma'asambua domosa andrõ tobali omo (osali) Lowalangi ni'amoni'õ ba khõ Zo'aya.
22Bõrõ me ha sambua ami ba khõ Keriso, ba te'otomosi ami gõi awõ niha bõ'õ, tobali sambua omo khõ Lowalangi, ba da'õ torõi Lowalangi awõ Geheha-Nia.