Alkitab Mobile SABDA
[VER] : [NIAS]     [PL]  [PB] 
 <<  Efesus 3 >> 

1Andrõ bõrõ da'õ, ya'odo, Faulo, niha nikuru bõrõ Keriso, soguna khõmi ya'ami niha si tenga niha Yahudi.

2Tatu no mirongo wa Lowalangi ba wa'ebua dõdõ-Nia andrõ, zame'e khõgu halõw̃õ soguna khõmi.

3No Ifa'ele'õ ba I'ombakha'õ khõgu nikhoi dõdõ-Nia andrõ si tobini. (Sanandrõsa ba da'e no musura moroi yaw̃a ba wa'adogodogo,

4ba na mibaso, ba tola aboto ba dõdõmi zi tobini andrõ khõ Keriso, si mane fangi'ilagu.)

5Ba gõtõ fõna lõ irai la'ombakha'õ ba niha zi tobini andrõ, ba iada'e Eheha Lowalangi zi no mangoroma'õ khõ ndra sinenge ba ira sama'ele'õ khõ-Nia.

6Da'e zi tobini andrõ: Ba Duria Somuso Dõdõ andrõ fao niha si tenga niha Yahudi wanema howuhowu soroi Lowalangi nihõnagõ khõ ndra niha Yahudi; faoma ndrotondroto mboto andrõ ira si ha sambua, ba fao gõi ira wanema hadia zi no Ifabu'u Lowalangi ba khõ Keriso Yesu.

7No Ibe'e khõgu mbuala Lowalangi -- ya'ia halõw̃õ -- fanuriaigõ Turia Somuso Dõdõ andrõ. Utema mbuala andrõ ba wa'abõlõ Lowalangi si no mohalõw̃õ bakha ba mbotogu.

8Ba gotalua mbanua Lowalangi ma'afefu, ya'o wondrege zide'ide. Ba hew̃a'ae si manõ no Ibe'e khõgu Lowalangi mbuala da'e; ya'ia da'õ halõw̃õ ena'õ u'ombakha'õ ba zi tenga niha Yahudi Duria Somuso Dõdõ wa no a'oi so hadia ia khõ Keriso, ba lõ ahorihori;

9ba ena'õ gõi bõrõ ndra'o tola aboto ba dõdõ niha fefu hewisa Lowalangi, sombõi fefu hadia ia andrõ, wamalua si no Ifakhõi, si no tobini i'otarai mbõrõta ba niha gulidanõ.

10Somasi Lowalangi, ena'õ bõrõ mbanua Niha Keriso, aboto ba dõdõ zamatõrõ ba dalu mbanua ngawalõ wa'atuatua Lowalangi.

11Ifalua da'õ fefu Lowalangi dali zi no Ihonogõi gõtõgõtõ wa'ara, nifalua-Nia ba khõ Yesu Keriso, So'aya ya'ita.

12Moroi ba wamati khõ Yesu Keriso, ba ba wa ha sambua khõ-Nia, lõ aiw̃õ ita wangondrasi Lowalangi si fao famati.

13Bõrõ da'õ, angandrõw̃agu ya'ia da'õ: bõi abu dõdõmi ba wamakao si gõna ya'o, bõrõ ami; bõrõ me da'õ fefu, no ba wanga'azõkhi ya'ami.

14Andrõ bõrõ da'õ ubalõduhini tou danõ fõna Nama.

15Moroi khõ-Nia latema gamuata si faehu, he ngambatõ ba zorugo ba he ngambatõ ba gulidanõ.

16Mangandrõdo, ena'õ Ibe'e khõmi wa'abõlõ dõdõ Lowalangi fondrege zolakhõmi, ba Geheha-Nia.

17Ena'õ bõrõ wamatimi khõ Yesu Keriso, I'onahia dõdõmi Keriso, ba mufodanedane awõ wa mufatõrõ wa'aurimi ba wa'omasi.

18Mangandrõ ndra'odo, ena'õ tola aboto ba dõdõ mbanua Lowalangi fefu, ha wa'ebolo ba ha wa'anau awõ wa'alaw̃a ba wa'abakha wa'omasi Keriso,

19si tebai ikhamõ era'era niha ba wangi'ila. Ena'õ aboto ba dõdõmi wa'omasi Keriso andrõ, irege fahõna khõmi wa'auri Lowalangi andrõ si no mo'ahonoa.

20Ba wa'abõlõ Lowalangi sohalõw̃õ bakha ba dõdõda, tola Ifalua Lowalangi zi tõra moroi ba ni'andrõda, ba ma ni'era'erada.

21Ya nifosumange Lowalangi ba mbanua Niha Keriso sagõtõ fa'ara, ba khõ Yesu Keriso. Nisuno Lowalangi irugi zi lõ aetu! Yaduhu.


  Share Facebook  |  Share Twitter

Download Audio MP3 (Efesus 3):
Mobile (Low Quality) - CD (High Quality)

 <<  Efesus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel