Alkitab Mobile SABDA
[VER] : [NIAS]     [PL]  [PB] 
 <<  Filipi 1 >> 

1Ya'ami ira talifusõ banua Lowalangi ma'afefu si so ba Wilifi, si no ha sambua ba khõ Keriso Yesu. He gõi ira talifusõ sondrõnia'õ ba enoni mbanua Niha Keriso! Ya'o, Faulo, awõ Dimoteo, enoni Keriso Yesu,

2matõtõna wa Lowalangi, Amada, ba So'aya Yesu Keriso zamahowu'õ ba same'e fa'ohahau dõdõ khõmi.

3Ero na itõrõ tõdõgu ami, ba lõ mamalõmalõ u'andrõ saohagõlõ khõ Lowalangi.

4Ba ero na mangandrõ ndra'odo salahimi fefu, ba omuso dõdõgu wangandrõ.

5U'andrõ saohagõlõ khõ Lowalangi, bõrõ me no mitolo ndra'o wangombakha Turia Somuso Dõdõ soroi Lowalangi i'otarai mbõrõta irugi iada'e.

6Si no mamõrõgõ mege halõw̃õ si sõkhi andrõ khõmi ya'ia Lowalangi. Ba faduhu dõdõgu wa Ya'ia dania zanohugõ halõw̃õ si sõkhi andrõ irugi awai ba Luo Wangawuli Yesu Keriso.

7No so so ba dõdõgu ami fefu. Tobali no sinangeania na si manõ dõdõgu khõmi, me no fao ami fefu awõgu ba wanema buala Lowalangi andrõ nibe'e-Nia khõgu, he iada'e, ba we'asogu bakha ba gurunga, ba he gõi ba ginõtõ na so ndra'odo baero ba wamaduhu'õ awõ wanga'aro'õ Turia Somuso Dõdõ andrõ.

8No humulu sibai dõdõgu falukha khõmi, bõrõ wa'omasi andrõ soroi Yesu Keriso samõsa. Lowalangi zamaduhu'õ, wa sindruhu fefu niw̃a'õgu andrõ.

9Da'e wangandrõgu salahimi: ena'õ itugu tedou wa'omasimi Lowalangi andrõ ba fangomasi'õ awõ ba fa'aboto ba dõdõ sindruhu, ba ba ngawalõ wa'atuatua fefu.

10Ba da'õ mi'ila mitimba tõdõmi hadia zi sõkhi, ba sõkhi gõi wa'aurimi, lõ ta'unõw̃a, ma fangadugõ hadia ia na Luo wangawuli Keriso andrõ.

11Ba ena'õ fahõna khõmi mbuabua wa'atulõ dõdõ andrõ soroi Yesu Keriso; irege nifolakhõmi ba nisuno Lowalangi.

12Omasi ndra'o na aboto ba dõdõmi, wa ngawalõ zi no alua khõgu, no tobali bõrõ wa abõlõ teboloso Duria Somuso Dõdõ andrõ.

13Lualuania, fefu zaradadu sanaro omo razo ba ha wa'ato niha bõ'õ si so ba da'e, aboto ba dõdõra, wa lakuru ndra'o, bõrõ me enoni Keriso ndra'odo.

14Ba ba wa'asogu ba ba gurunga andrõ no tobali ato dalifusõ samati si tedou fa'afaduhu dõdõ khõ Zo'aya, irege lõ fa'ata'ura ba wangombakha taroma li Lowalangi andrõ.

15Duhu, so sa õsa ba gotaluara zangombakha Keriso bõrõ wa'afõkhõ dõdõ ba somasi fasoso, ba hiza tanõ bõ'õ õsa sa la'ombakha'õ Keriso moroi ba wa'asõkhi dõdõ.

16Lafalua da'õ bõrõ wa'omasira Lowalangi ba he ya'o, me aboto ba dõdõra wa no Lowalangi zi no mamatenge ya'o ba wamaduhu'õ wa atulõ Duria Somuso Dõdõ andrõ.

17Niha bõ'õ la'ombakha'õ Keriso bõrõ me so gohitõ dõdõra si lõ sõkhi; la'ombakha'õ Keriso ba wangalui harera samõsa. Law̃a'õ tõdõra, na lalau da'õ, ba itugu monõnõ wa'abu dõdõgu bakha ba gurunga.

18Ba hiza lõ salania! Gofu helawisa sa'atõ, he lalau da'õ bõrõ gohitõ dõdõ si sõkhi, ba he gõi bõrõ gohitõ dõdõ si lõ sõkhi, ba te'ombakha'õ sa'atõ Keriso; bõrõ da'õ omuso manõ dõdõgu. Ba lõ mamalõ si manõ wa'omuso dõdõgu,

19me aboto ba dõdõgu, wa bõrõ wangandrõngandrõmi ba fanolo Geheha Yesu Keriso andrõ, tola aefa ndra'o dania.

20Somasi dõdõgu ba nitõtõnagu ya'ia ena'õ bõi tobali zayazaya gõlõ wohalõw̃õgu. Hiza i, utõtõna ena'õ ero inõtõ, lõ mendrua manõ iada'e, lõ manõ fa'aiw̃õ khõgu, irege ba zi ma'afefu fa'aurigu -- he sauri ba he si mate ndra'o -- tefolakhõmi Keriso.

21Ohitõ wa'aurigu, ya'ia Yesu Keriso! Ba hare khõgu wa'amate.

22Ba na ba wa'auri ba gulidanõ andre, tola ufalua halõw̃õ sabõlõ moguna, ba lõ u'ila hadia nifiligu.

23Lafadõni ndra'o ba zi dombua balõ andrõ. Omasido urõi gulidanõ andre ba sodo khõ Keriso, me no da'õ zi sõkhi sibai;

24ba abõlõ sõkhi gõi na so ndra'o ba da'e soguna khõmi.

25Faduhu sibai dõdõgu ba da'õ. Bõrõ da'õ, u'ila, wa sinangea torõi ndra'o ba khõmi, ba wanolo ya'ami, ena'õ abõlõ ami ba omuso dõdõmi ba wamati khõ Zo'aya.

26Bõrõ da'õ, na mangawulido zui khõmi dania, ya'ami si no ha sambua khõ Keriso, ba fahõna khõmi gumbu wa'omuso dõdõmi ba khõgu.

27Soguna iada'e, ya'ia ena'õ mihaogõ mbuabuami si faudu ba Duria Somuso Dõdõ andrõ khõ Keriso. Ba zi manõ, he lõ u'ila na tola falukha ndra'o khõmi ba na lõ'õ, urongo wa no aro wa ha sara dõdõmi ba fagohisami ba gohitõ dõdõ andrõ si ha sambua, ya'ia ba wamati molo'õ Turia Somuso Dõdõ soroi Lowalangi.

28Ba ena'õ lõ manõ aiw̃õ ami; bõi mi'ata'ufi nudumi. Ba wolau si manõ no mi'oroma'õ khõra wa ya'ira zi te'ala, ba ya'ami zi mõna. Lowalangi samõsa zame'e fa'amõna andrõ khõmi.

29No Ibe'e khõmi mbuala Lowalangi, tenga ha ena'õ mamati ami khõ Keriso, ena'õ gõi mitaõgõ wamakao andro bõrõ Keriso.

30Iada'e fao gõi ami awõgu ba wasõndrata; ya'ia wasõndrata si no irai mi'ila khõgu fõna, ba si lõ aetu u'ohalõw̃õgõigõ irugi iada'e, si mane si no mirongo iada'e.


  Share Facebook  |  Share Twitter

Download Audio MP3 (Filipi 1):
Mobile (Low Quality) - CD (High Quality)

 <<  Filipi 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel