Alkitab Mobile SABDA
[VER] : [NIAS]     [PL]  [PB] 
 <<  Ibrani 12 >> 

1Ba sanandrõsa khõda samõsa, ba zi fasui ya'ita no oya sibai zamaduhu'õ! Bõrõ da'õ, fefu zanambuaisi ya'ita ba horõ si anemai'õ falemba khõda, ya taheta ma'afefu moroi ba mbotoda. Ba da ta'anau'õ gõlõda wagohisa ba watandrisa tõla andrõ si so fõnada.

2Ya lõ tebulõ tatõngõni Yesu, bõrõ me Ya'ia zanolo ya'ita ba wamati khõ-Nia i'otarai mbõrõta irugi gamozua. No Itaha wamakao Yesu ba dõla rõfa! No I'ositengagõ ba wa'amate ba rõfa andrõ no sambua fa'aila. Ha fa'omuso dõdõ nitõrõ tõdõ-Nia si falukha Ia dania ba gafuriata. Iada'e no dumadao Ia ba gambõlõ Lowalangi, mamatõrõ Ia fao awõ Lowalangi.

3Tandraigõ angeragõ hewisa wanaõgõ Yesu famakao ba wamaondragõ niha si so horõ, si no mamorege folaw̃a Ya'ia! Bõrõ da'õ bõi ide'ide dõdõmi ba aetu wanõtõnami.

4Bõrõ me bakha ba wasõndratami wolaw̃a horõ, ba lõ nasa sirugi fa'aduwa ndromi ba da'õ.

5Ba bõi olifu ami wa Lowalangi zo'amenesi ya'ami, hulõ Nama si fahuhuo ba ndraononia! Iw̃a'õ Lowalangi, "He ono-Gu, haogõ wanõngõni famahaõ Zo'aya, ba bõi ide'ide dõdõu na mofõnu Ia khõu.

6Bõrõ me Ifalisi So'aya dozi niha ni'omasi'õ-Nia, ba Ibõzi dozi niha nifaduhu'õ-Nia si tobali ono-Nia."

7Ya mitema mbõzibõzi soroi Lowalangi si hulõ wamahaõ moroi khõ nama. Bõrõ, hadia so samõsa ndraono si lõ irai ifotu amania?

8Na lõ fao ami nifotu si mane iraononia fefu nifahaõ, eluahania, ya'ami tenga ono sindruhu, no ono horõ.

9Ba so namada ba gulidanõ andre. Amada andrõ ifahaõ ita, ba ya'ita tafosumange ia. Ba mendrua manõ khõ Namada si so ba zorugo, tatu abõlõ ta'o'õ nasa khõ-Nia, ena'õ auri ita.

10Ira satuada ba gulidanõ andre lafahaõ ita ndrege ginõtõ si no mu'olani, molo'õ hadia ia niw̃a'õ dõdõra si sõkhi. Ba Lowalangi Ifahaõ ita ba wanga'azõkhi ya'ita samõsa, ena'õ tola tobali ita ni'amoni'õ awõ-Nia.

11Duhu wa ba ginõtõ tefahaõ ita, fotu andrõ tenga sangomusoi'õ tõdõda, no samusi tõdõda manõ. Tobali ba gafuriata ya'ita, si no mufaha'õ, fotu andrõ no samobõrõ khõda wolo'õ somasi Lowalangi, irege i'owua wa'ohauhau dõdõ khõda.

12Bõrõ da'õ, abõlõ'õ dangau si no ombuyumbuyu ba balõ duhiu sanizinizi ba wofanõ.

13Mitõrõ lala si fadaya, ena'õ lõ fahole gahemi si no ombayumbuyu, ba ma na'i tobali famadõhõ.

14Mi'alui wa'auri satulõ awõ niha fefu ba migohi wa'auri sohauhau ni'otambali'õ khõ Zo'aya, bõrõ me lõ hadõi gõi si tola mangila So'aya na lõ auri ia si mane da'õ.

15Ba mifaigi fa bõi so samõsa gõi zi mõi baero moroi ba gõli wa'asõkhi dõdõ Lowalangi, ena'õ bõi so zi tobali doi ba lato ba gotaluami, samatumbu'õ famakuyu ba samakiko niha sato.

16Mifaigi ena'õ bõi so zohorõ ba ma si lõ ba dõdõ ngawalõ ni'amoni'õ, si mane nifalua Gezau. I'amawa wa'asia'ania, ha ba zi sambua mako õ.

17No mi'ila wa ba gafuriatania omasi Gezau isõndra howuhowu andrõ moroi khõ namania, ba tetimbagõ ia. Hew̃a'ae i'andrõ si fao fege'ege ba wanga'azõkhi si no fasala ia, ba lõ hadõi inõtõ sa'ae.

18Ya'ami ira talifusõ, lõ si falukha ami zi mane si falukhata soi Gizera'eli fõna. Falukha ira zi tola nibabaya, ya'ia Hili Sina'i awõ galitõnia si holahola; falukha ira zogõmigõmi, salu ba angi sabe'e;

19falukha ira li dorofe, ba li zi hede sabõlõ. Me larongo li zi hede andrõ niha Gizera'eli, ba la'andrõ sibai ena'õ bõi sa'ae fahuhuo khõra zi hede andrõ.

20Bõrõ me tebai lataha wamondrongo fareta nifa'ema zi hede andrõ. Me iw̃a'õ si hede andrõ, "Fefu zanguhundragõ hili andre, gofu hadia ia, he urifõ ma haniha manõ, lõ tola lõ nitebu kara irugi mate."

21Hadia zi no la'ila niha Gizera'eli andrõ si no ata'u sibai ira, irege iw̃a'õ Moze, "Ata'u ndra'odo ba manizinizido!"

22Ba zi tambai da'õ, si so fõnami ya'ami ira talifusõ ya'ia Hili Ziona ba banua Lowalangi sauri, ya'ia Yeruzalema si so ba zorugo awõ ngahõnõ mala'ikania.

23Ya'ami si mõi ba walukhata somuso dõdõ -- falukhata nono sia'a khõ Lowalangi, si no tesura tõi ba zorugo. Ya'ami si mõi mangondrasi Lowalangi, Sanguhuku niha ma'afefu. Falukha ami geheha niha satulõ si no mo'ahonoa.

24Ya'ami falukha khõ Yesu, sama'ema fawu'usa li si bohou andrõ, falukha ami ndro fanefe andrõ si no fangaro dõdõ ba ngawalõ zabõlõ sõkhi moroi ba wangaro dõdõ ndro Habeli.

25Andrõ bõrõ da'õ, mifaigi sibai fabõi irege lõ omasi ami wamondrongo Ya'ia si fahuhuo andrõ. Ya'ira si lõ omasi mamondrongo Ya'ia sama'ema turia soroi Lowalangi ba gulidanõ, tebai moloi ira. Mendrua manõ ya'ita andre samondrongo Ya'ia si fahuhuo soroi zorugo. Na lõ omasi ita wamondrondrongo khõ-Nia, he wa tola aefa ita khõ-Nia!

26Me inõtõ da'õ ifaheu danõ li-Nia. Iada'e no fawu'u li Ia, "Ufaheu dania samuza tõ, tenga ha tanõ, banua si yaw̃a gõi."

27Fehede "samuza tõ" andrõ mangoroma'õ wa fefu zi no mufazõkhi ba tola humeu, nifa'ese ba zinga dania, ena'õ torõi ha si tebai humeu.

28Bõrõ da'õ, ya ta'andrõ saohagõlõ khõ Lowalangi, me no tatema sambua mbanua si tebai humeu si otarai Lowalangi. Ya ta'andrõ saohagõlõ ba wangandrõ khõ Lowalangi si fao famosumange ba fangata'ufi, molo'õ somasi Lowalangi.

29Bõrõ me Lowalangida andrõ duhu no si mane alitõ sokhozi fefu hadia ia.


  Share Facebook  |  Share Twitter

Download Audio MP3 (Ibrani 12):
Mobile (Low Quality) - CD (High Quality)

 <<  Ibrani 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel