Alkitab Mobile SABDA
[VER] : [NIAS]     [PL]  [PB] 
 <<  Kisah Para Rasul 16 >> 

1Itohugõ wofanõnia Faulo ba Derebe, aefa da'õ numalõ ba Lisitera. Ba da'õ so zolo'õ Yesu sotõi Timoteo. Niha Yahudi ninania, si faduhu tõdõ khõ Yesu; ba Amania niha Yunani.

2No si sõkhi duria Dimoteo ba gotalua zamati ba Lisitera ba ba Ikoniu.

3Omasi Waulo na fao khõnia Dimoteo, andrõ wa ifalua wamoto. Ilau zi manõ, bõrõ me la'ila ira niha Yahudi ba danõ andrõ, wa niha Yunani nama Dimoteo.

4Ba zi dozi banua ni'ondrasira, lafa'ema ba niha si faduhu tõdõ ba da'õ gangetula si no lahonogõi ira sinenge ba ira satua ba Yeruzalema. La'amenesi ndra talifusõ si no faduhu tõdõ andrõ ena'õ la'o'õ gangetula andrõ.

5Itugu abõlõ wamati mbanua Niha Keriso, ba itugu ato ero ma'õkhõ.

6Lõ Itehe Eheha Lowalangi mõi Waulo ba Sila wanuriaigõ taroma li Lowalangi ba propinsi Asia. Tobali latohugõ wofanõra numalõ ba danõ Werigia ba Galatia.

7Me larugi nola danõ ba Misia, latandraigõ we'amõi ba danõ Mbitinia, ba hiza Itenaw̃a ira Eheha Lowalangi we'amõi ba da'õ.

8Andrõ latohugõ wofanõra ba Misia ba ladõlõ ira ba Deroa.

9Ba Deroa ba zi bongi oroma gangilata khõ Waulo. Ba gangilata andrõ oroma khõnia samõsa niha Makedonia si zizio fõnania sangandrõ sibai ena'õ numalõ ia ba Makedonia ba wanolo ya'ira.

10Me no aefa oroma khõ Waulo gangilata andrõ, i'anema'õ mama'anõ ira we'amõi ba Makedonia. Si fao fa'aro dõdõ mahalõ gangetula wa Lowalangi zamatenge ya'aga wanuriaigõ Turia Somuso Dõdõ ba niha ba da'õ.

11Marõi Deroa ba moloyo ndra'aga adõlõ ba Zamotarake, ba mahemolu da'õ numalõ ba Neafoli.

12Ma'otarai da'õ numalõ ba Wilifi, sambua mbanua ba banua sebua ba Makedonia. Filifi no barõ gamatõrõw̃a Roma. Torõi ndra'aga mato ha'uga ngaluo ba da'õ.

13Ba luo Sabato numalõ ndra'aga ba zinga nungo nidanõ baero mbawa gõli mbanua, me ma'ila wa so nahia wangandrõ niha Yahudi ba da'õ. Dumadao ndra'aga ba malau fahuhuo ba khõ ndra ira alawe si no owulo ba da'õ.

14Samõsa ba gotaluara zaniaga nukha sobowo doru, sotõi Lidia soroi Diatira. Sangomasi'õ Lowalangi ia, ba I'o'ou ia So'aya ena'õ itema'õ hadia nifahaõ Waulo khõnia.

15Tebayagõ idanõ Lidia ba si sambua omo ya'ira. Me no aefa tebayagõ idanõ ia ikaoni ndra'aga. Imane, "Na miw̃a'õ tõdõmi sindruhundruhu no faduhu dõdõgu khõ Yesu, ba mitabu mifõrõ ba nomogu." Ba i'andrõ sibai ena'õ ma'o'õ niw̃a'õnia.

16Samuza ma'õkhõ me mõi ndra'aga ba nahia wangandrõ, falukha ndra'aga samõsa nono alawe, sawuyu. No ifatõrõ eheha si ra'iõ nono alawe andrõ, irege tola ifa'ele'õ ngawalõ zalua ba ginõtõ si so mifõna. Ba wama'ele'õ waõwaõ wa'auri niha, mohare sebua zokhõ ya'ia ibe'e.

17Lõ aetu i'o'õ ndra'aga awõ Waulo ira alawe andrõ ba mu'ao ia imane, "Enoni Lowalangi Fondrege Zebua ndra niha andrõ! Tohare ira wangombakha khõmi hewisa ena'õ te'orifi ami!"

18Mato ha'uga ngaluo lõ aetu mu'ao'ao ndra alawe andre. Mofõnu Waulo, andrõ ifakhõlõ ia ba imane ba geheha andrõ, "Ba dõi Yesu Keriso uw̃a'õ ofanõ moroi ba ndra alawe andrõ." Ba i'anema'õ irõi eheha ndra alawe andrõ.

19Ba me la'ila sokhõ ira alawe andrõ no aheta gumbu wangaluira, ba lara'u Waulo ba Sila, lafondrõni hakhi ira la'ohe fõna zamatõrõ.

20La'ohe Waulo awõ Sila fõna ndra samatõrõ ba niha Roma, ba lamane, "Niha Yahudi ndra niha andre. Lafawukaisi mbanua khõda.

21La'o'ou niha wolo'õ amuata si fatimba ba huku khõda, ya'ita niha Roma. Tebai tatema ba tebai ta'o'õ gamuata andrõ!"

22Fao gõi niha sato wo'angadugõ sinenge si darua andrõ; lasika nukha ndra Faulo ba Sila ira samatõrõ ba lafabõbõzi'õ ira.

23Me no aefa labõbõzi sabõlõbõlõ ira, labe'e ira bakha ba gurunga. Labe'e li khõ zatua sanaro ba gurunga ena'õ lahaogõ sibai wozago ya'ira.

24Bõrõ wareta nitemania andrõ maoso zatua sanaro ibe'e ira ba gurunga tanõ si bakha sibai ba lakalo gahera.

25Mato tõlu wongi mangandrõ ndra Faulo ba Sila awõ wa manunõ ira wanuno Lowalangi. Lafondrondrongo niha nikuru tanõ bõ'õ wanunõra.

26I'anema'õ so ndruru danõ sabõlõbõlõ sibai, irege mudõgõ danedane gurunga andrõ. Teboka fefu mbawa ndruhõ gurunga ba aefa fefu rate samõbõ ahe niha gurunga.

27Tokea zatua sanaro andrõ ba maoso ia. Me i'ila no oi teboka mbawa ndruhõ gurunga, isõbi wõdania ba wamunu ya'ia samõsa bõrõ me iwalinga no ahori moloi niha gurunga fefu.

28Ba hiza mu'ao Waulo, ebua linia imane, "Bõi bunu ndra'ugõ! No so ndra'aga ba da'e fefu!"

29I'andrõ wandru satua zanaro andrõ ba ilau fagohi numalõ si bakha, ba alau ia tou fõna ndra Faulo ba Sila si fao fanizinizi.

30Aefa da'õ i'ohe ira baero moroi ba gurunga ba imane, "He Tuha, hewisa ena'õ tola te'orifi ndra'o?"

31Latema linia Faulo ba Sila lamane, "Amati khõ Zo'aya Yesu! Ba te'orifi ndra'ugõ -- awõ nõsi nomou fefu!"

32La'ombakha'õ daroma li Zo'aya ira Faulo ba Sila khõ zatua sanaro gurunga andrõ awõ zi sambua omo ya'ira.

33Ba zi tõlu wongi andrõ, i'ohe ira moroi ba gurunga ba ihaogõ wamõbõ sokhora. Ba i'anema'õ tebayagõ idanõ fefu nõsi nomonia.

34Aefa da'õ i'ohe ndra Faulo ba Sila ba nomonia ba ibe'e gõra. Omuso sibai dõdõnia awõ zi sambua omo ya'ira bõrõ me no si faduhu tõdõ khõ Lowalangi ira iada'e.

35Mahemolu da'õ lafatenge ndra folisi ira samatõrõ niha Roma ba wama'ema fareta ena'õ la'efa'õ Waulo ba Sila.

36I'ombakha'õ satua zanaro ba gurunga da'õ khõ ndra Faulo. Imane, "He Tuha, no labe'e wareta samatõrõ niha Roma ena'õ te'efa'õ ami. Tola mofanõ ami iada'e. Ya'ahowu ami ba lala!"

37Ba hiza imane Faulo khõ ndra folisi andrõ, "Banua Roma ndra'aga. Lõ na mufatõrõ huku khõma, ba no labõbõzi ndra'aga fõna niha sato me labe'e ndra'aga bakha ba gurunga. Ba iada'e lafofanõ manõ ndra'aga? Lõ matehe! Mikaoni zamatõrõ banua Roma andrõ akha mõi ira ba da'e ba wangefa'õ ya'aga."

38La'ombakha'õ ira folisi niw̃a'õ Waulo andrõ khõ ndra samatõrõ banua Roma. Me larongo ira samatõrõ andrõ wa ono mbanua Roma ndra Faulo ba Sila, tobali ata'u ira.

39Mõi ira mangandrõ fa'ebolo dõdõ khõ ndra Faulo ba Sila, ba lafasao ira numalõ baero moroi ba gurunga, ba la'andrõ ena'õ larõi mbanua andrõ.

40Larõi gurunga andrõ ira Faulo ba Sila numalõ ba nomo Lidia. Ba me falukha ira ndra niha samati ba da'õ, ba lafarou dõdõra ba aefa da'õ mofanõ ndra Faulo ba Sila.


  Share Facebook  |  Share Twitter

Download Audio MP3 (Kisah Para Rasul 16):
Mobile (Low Quality) - CD (High Quality)

 <<  Kisah Para Rasul 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel