Dual Panel1Me no ifuli ahono Nefeso, i'owuloi mangawuli Faulo mbanua Niha Keriso ba ibe'e wamarou dõdõ khõra. Aefa da'õ i'angonasi ira ba itohugõ wofanõnia numalõ ba Makedonia.
2Itõrõi mbanubanua ba Makedonia ba oya ibe'e menemene ba zamati khõ Yesu si so ba da'õ ba wamarou tõdõra. Aefa da'õ numalõ ia ba Yunani.
3Tõlu waw̃a wa'ara torõi ia ba da'õ. Ba me moloyo ia numalõ ba Ziria ena'õ, ba so duria wa no mamagõlõ niha Yunani wamunu ya'ia. Bõrõ da'õ ihalõ gangetula wangawuli sanõrõ ba Makedonia.
4Fao awõnia Zofatero ono Wiro banua Mberea; si manõ gõi Arisaro ba Sekundro banua Desalonika, ba Gayo banua Derebe. Si manõ gõi Dimoteo, Tikhiko ba Terofimo moroi ba danõ Asia.
5No la'ofõnai'õ ira ba labaloi ndra'aga ba Deroa.
6Me no aefa Gowasa Roti si Lõ Mu'aisõni, moloyo ndra'aga marõi Wilifi. Lima hari aefa da'õ falukha ndra'aga ba Deroa. Torõi ndra'aga samigu ba da'õ.
7Owulo ndra'aga bongi migu ba manga ndra'aga ba wa'atalifusõta. Fahuhuo Waulo ba zato bõrõ me omasi mofanõ ia mahemolu da'õ. Fahuhuo manõ Waulo irugi talu mbongi.
8Ato dome ba mbate'e tanõ yaw̃a andrõ ba nahia wa'owuloma.
9No mudadao samõsa nono matua sotõi Eutikho ba zandrela. Bõrõ me lõ aetu'aetu wahuhuosa Waulo, irege manukõu sibai nono matua andrõ, mõrõ ia ba zandrela, ba aekhu ia si tou moroi ba nahia wa'owuloma, ba nga'õtõ si tõlu. Me lafazaw̃a ia, ba no mate.
10Numalõ mitou Waulo, ifaõndrõ ia ba italagui nono matua andrõ. Imane Faulo, "Bõi mibusi tõdõ, auri ia nasa!"
11Ifuli ia miyaw̃a Faulo, ibagibagi roti, ba manga ira fefu. Me no ara fahuhuo Waulo irugi moluo, awena mofanõ ia.
12La'ohe nono matua andrõ ba nomora, no auri. Omuso ba terara sibai dõdõra.
13Numalõga ba gõfa ba moloyo ndra'aga numalõ ba Gaso ba wamaondragõ Faulo ba da'õ. Imanõ wangahonogõi fofanõnia, bõrõ me itõrõ tanõ we'amõi ba da'õ.
14Me no falukha ba Gaso, mõi ba gõfa Waulo ba moloyoga numalõ ba Metilene.
15Moroi ba da'õ mafuli moloyo, ba mahemolunia ofeta ndra'aga ba nahia gametahõ Khio. Sara wongi aefa da'õ marugi Zamo, ba sara ngaluo aefa da'õ marugi Miletusi.
16No ihonogõi Faulo wa lõ tebatoga ba Nefeso, ena'õ bõi mahori ginõtõ ba Asia. Afu'afunia irugi Yeruzalema ba luo gowasa Fendrakose.
17Moroi ba Miletusi ifa'ohe'õ Faulo duria ba Nefeso. I'andrõ ena'õ falukha ia ba zatua mbanua Niha Keriso ba da'õ.
18Me larugi, imane Faulo khõra, "He ya'ami ira talifusõ. No mi'ila hewisa wa'aurigu ba gotaluami i'otarai luo tohare ndra'o ba Asia.
19Si fao fangidengide'õ ba taw̃a hõrõ mohalõw̃õ ndra'o khõ Zo'aya bakha ba wamakao nitaõgõgu bõrõ wa'alõsõkhi niha Yahudi.
20No aboto ba dõdõmi wa lõ ulaw̃õsi wangombakha hadia zoguna khõmi. Ufahaõ ami ba nahia wamahaõ niha sato awõ ba nomo.
21Ube'e wamangelama ba niha Yahudi awõ ba niha soi bõ'õ ena'õ larõi horõra, lafalalini gera'erara, ba mõi ira khõ Lowalangi, ba mamati khõ Yesu So'aya.
22Ba wolo'õ fareta Geheha Lowalangi wa mõi ndra'o ba Yeruzalema. Ba lõ u'ila hadia zi gõna ya'odo ba da'õ.
23Awai ni'ilagu wa ba zi dozi banua, no i'ombakha'õ sibai khõgu Eheha Lowalangi wa mõi ndra'o ba gurunga ba tefakao dania.
24Ba hiza lõ ba dõdõgu wa'aurigu andre, asala tola u'asiwai halõw̃õ nifaduhusi tõdõ Yesu So'aya khõgu ba asala lõ farõi ndra'o irugi gamozua wa'aurigu ba wanuriaigõ Turia Somuso Dõdõ fa'ebua dõdõ Lowalangi andrõ.
25No u'ondrasi fefu ami ba no uturiaigõ Wamatõrõ Lowalangi andrõ. Ba u'ila iada'e wa lõ falukha ndra'o khõmi sa'ae.
26Bõrõ da'õ uw̃a'õ sibai khõmi ma'õkhõ andre wa na so zi tekiko ya'ami dania, ba tenga salagu sa'ae da'õ.
27Lõ irai urõi halõw̃õgu ba wangombakha khõmi fefu era'era Lowalangi.
28Andrõ mihaogõ ami ba mifaigifaigi gõi mbanua Niha Keriso nitou'õ Geheha Lowalangi khõmi ba wamaigimaigi; bõrõ me no tefataro ami samaigimaigi banua Niha Keriso andrõ. Akha mifaigifaigi mbanua Niha Keriso andrõ hulõ gubalo samaigimaigi biribirinia, bõrõ me no I'õli Lowalangi mbanua Niha Keriso andrõ faoma fa'amate nono-Nia samõsa.
29Na no mofanõ ndra'o, lõ tola lõ'õ tohare nasu gatua safaito ba gotaluami. Ba tobali õ nasu gatua niha andrõ nikubaloimi.
30Ba gotaluami na'i tesõndra niha sangombakha turia si lõ atulõ. Lalau zi manõ ena'õ elungu zamati khõ Yesu andrõ, ba la'o'õ ira.
31Bõrõ da'õ bõi mifõrõ! Mitõrõtõrõ tõdõmi wa tõlu fakhe wa'ara lõ tebato wamahaõgu ya'ami, bongi ma'õkhõ si fao taw̃a hõrõ.
32Iada'e utou'õ ami ba danga Lowalangi ena'õ Irorogõ ami ba duria wa'ebua dõdõ-Nia andrõ. So kuaso khõ Lowalangi wangabõlõ'õ ya'ami ba Ibe'e khõmi howuhowu si no Ihõnagõ ba mbanua-Nia fefu.
33Lõ irai u'alui gefe ba ma nukha moroi ba niha.
34Aboto ba dõdõmi, wa faoma fa'abõlõgu samõsa mohalõw̃õdo wangalui soguna khõgu awõ nawõgu si faofao khõgu.
35Ba ngawalõ hadia ia no ube'e dumaduma khõmi wa ba wa'abõlõ wohalõw̃õda si mane da'e lõ tola lõ'õ tatolo niha si tebai. Lõ tola lõ'õ tatõrõ tõtõda hadia zi no Iw̃a'õ samõsa Yesu, 'Abõlõ ohahau dõdõ niha ba wame'e moroi ba wanema!'"
36Me no aefa fahuhuo Waulo, faoma labalõduhini danõ wangandrõ.
37Me'e ira fefu ba latalagui Waulo ba la'angonasi ia.
38Abõlõbõlõ wa'abu dõdõra me iw̃a'õ Faulo wa lõ la'ila ia sa'ae dania. Lafasao ia irugi gõfa.