Dual Panel1"Ya'ami ira ama ba ira talifusõ fefu! Ufa'ema wamu'a ba hulugu khõmi. Mihaogõ wamondrondrongo!"
2Me larongo fahuhuo Waulo ba li Heberai'o, tobali ahono ira. Itohugõ huhuonia Faulo.
3Imane Faulo, "Niha Yahudi ndra'odo, si tumbu ba Daresu ba danõ Gilikia, sebua ba da'e ba Yeruzalema. No ifahaõ ndra'odo guru sebua Gamali'eli ba goroisa nibe'e Moze khõ ndra tuada. Si mane ya'ami ma'õkhõ, no sowõlõ'õlõ sibai ndra'odo gõi khõ Lowalangi.
4Ugohi sibai wamahaõ sanandrõsa ba gera'era Lowalangi khõ Yesu andrõ, irege ura'u ba ube'e ba gurunga fefu niha solo'õ famahaõ andrõ.
5Ere sebua samõsa ba rafe Zanguhuku ba Agama tola lafaduhu'õ wa lõ falimo ndra'odo. Bõrõ me ya'ira zi no mame'e khõgu sura nitandrõsaigõ ba niha Yahudi ba Ndramaseko. Faoma sura andrõ tola ura'u niha si faduhu tõdõ ba wamahaõ andrõ ba wolohe ya'ira ba Yeruzalema ena'õ tehuku."
6"Me ba dalu lala so ndra'o me arakha urugi Ndramaseko, mato laluo i'anema'õ so zi haga soroi mbanua samasui ya'odo.
7Alau ndra'odo tou ba danõ ba urongo li sanguma'õ khõgu, 'He Saulo, he Saulo! Hana wa õgohi Ndra'odo?'
8Umane wanofu, 'Haniha Ndra'ugõ, So'aya?' Itema li imane, 'Ya'odo Yesu andrõ banua Nazareta nigohimõ.'
9La'ila haga andrõ niha si fao khõgu, ba hiza lõ larongo li zi hede khõgu.
10Ba ufuli usofu umane, 'Hadia nilaugu, So'aya?' Itema li So'aya imane, 'Faoso ba ae'e ba Ndramaseko. Ba da'õ dania te'ombakha'õ khõu fefu hadia zomasi Lowalangi õfalua.'
11Tobali lõ u'ila niha ba haga si takile andrõ. Lagogohe dangagu awõgu we'amõi ba Ndramaseko.
12So ba da'õ zotõi Anania. Sangata'ufi Lowalangi ia ba solo'õ oroisa Lowalangi nifa'ema Moze khõda. Lafosumange ia fefu niha Yahudi si so ba Ndramaseko.
13Mõi ia mufaigi ndra'o, muzizio ia ba ngaigu ba imane, 'He talifusõ Saulo, ya'õ'ila niha mangawuli!' Ufaõga ndra'o ba u'ila ia.
14Aefa da'õ imane khõgu, 'No Ifili ndra'ugõ Lowalangi ndra tuada wangila somasi Ia, ba ena'õ õ'ila Yesu samalua somasi Lowalangi andrõ awõ wa õrongo li-Nia samõsa.
15Tobali samaduhu'õ ndra'ugõ wanuriaigõ ba niha fefu hadia ia zi no õ'ila ba õrongo.
16Iada'e bõi baloi sa'ae. Faoso ba tebayagõ ndra'ugõ idanõ. O'ao khõ Zo'aya ena'õ tehaogõ ndra'ugõ moroi ba horõu.'"
17"Me mangawuli ndra'o ba Yeruzalema, me mangandrõdo ba Nomo Zo'aya, Ifatõrõ ndra'o Eheha Lowalangi.
18U'ila Yesu So'aya si hede khõgu sanguma'õ, 'Alio'õ rõi Yeruzalema, bõrõ me latema wamaduhu'õu sanandrõsa khõ-Gu niha ba da'e.'
19Ba umane, 'He So'aya, no la'ila sibai wa no mõido ba nomo'omo wangandrõ ba wondra'u ya'ira ba ubõbõzi niha samati khõ-U.
20Si manõ gõi me tebunu Zitefano samaduhu'õ andrõ khõ-U, so ndra'odo ba da'õ ba no fao dõdõgu wamalua famunu andrõ. Ya'odo samõsa zamaigimaigi nukha zamunu ya'ia.'
21Ba ifuli Imane khõgu So'aya, 'Ae'e manõ, bõrõ me Ufatenge ndra'ugõ ba nahia sarõu ba soi bõ'õ si tenga niha Yahudi.'"
22Lafondrondrongo manõ huhuo Waulo niha sato, ba ba wehedenia safuria andrõ mu'ao ira ebua li lamane, "Mibunu manõ niha andrõ. Tebai auri ia sa'ae!"
23Ba we'ao'aora, lafaligoligoi nukhara, ba lafazaumba gawugawu ba dalu mbanua.
24Ifatenge komandra zaradadu ena'õ la'ohe Waulo ba gõdo sebua ena'õ lafareso ia ba da'õ, lasekhegõ ena'õ oroma hadia mbõrõ wa mu'ao'ao niha Yahudi khõnia.
25Ba me labõbõ Waulo ba wamõbõzi ya'ia, imane khõ hõgõ zaradadu si zizio ba da'õ, "Molo'õ amakhoita, hadia mibõbõzi nono mbanua gamatõrõw̃a Roma fatua lõ mu'etu'õ huku?"
26Me irongo da'õ, mõi hõgõ zaradadu andrõ khõ gomandra ba imane, "Hadia nilaumõ andre? Ono mbanua amatõrõw̃a Roma niha andre!"
27Mõi gomandra khõ Waulo isofu imane, "Ombakha'õ, hadia ono mbanua amatõrõw̃a Roma ndra'ugõ?" Imane Faulo, "Ya'ia, ono mbanua amatõrõw̃a Roma ndra'odo."
28Ifuli imane komandra andrõ, "Tobali ndra'o ono mbanua amatõrõw̃a Roma me no ube'e gana'a sebua!" Itema li Faulo imane, "Tumbu ndra'o ba wa'a'ono mbanua Roma."
29Labato saradadu zamareso Faulo ba ata'u gomandra zaradadu andrõ me no ibe'e mbilagu khõ Waulo, hew̃a'ae ono mbanua amatõrõw̃a Roma Waulo.
30Omasi sibai i'ila komandra zaradadu hadia mbõrõ wa lasalaikõ Waulo ira niha Yahudi andrõ. Bõrõ da'õ mahemolunia ikaoni ndra satua gere ba rafe Zanguhuku ba Agama ena'õ owulo. La'efa'õ mbilagu Waulo, ba aefa da'õ la'ohe fõnara fefu.