Alkitab Mobile SABDA
[VER] : [NIAS]     [PL]  [PB] 
 <<  Kisah Para Rasul 27 >> 

1Me no lahonogõi wa moloyo ndra'aga numalõ ba Gitalia, ba labe'e Waulo awõ niha nitaha bõ'õ ba danga Yulio hõgõ zaradadu Roma nifotõi "Saradadu Kaizaro."

2Mõiga yaw̃a ba gõfa si oroi Gaderamitiu, ba mofanõga numalõ ba labua ba propinsi Asia. Samõsa mbanua Makedonia sotõi Arisaro soroi Desalonika fao khõma woloyo.

3Mahemolunia marugi Zidona. Ba no ihaogõhaogõ Yulio khõ Waulo. Itehegõ khõnia wamalukhaisi awõ'awõnia ena'õ tola labe'e zoguna khõnia.

4Moroi ba da'õ matohugõ woloyoma. Bõrõ me fadudu nangi ba gõfa, andrõ moloyoga ma'osisi tanõ yõu hulo Zifirusi si tobini ma'ifu moroi ba nangi.

5Aefa da'õ malau ndra'aga ba nasi gametahõ Gilikia ba Wamefilia, ba marugi Mira ba nõri Likia.

6Ba da'õ isõndra komandra andrõ gõfa si otarai Alesandria numalõ ba Gitalia. Ifawu'a ndra'aga ba gõfa andrõ.

7Mato ha'uga ngaluo wa'ara ahou sibai woloyoma, ba sidõrõngasa marugi Kanidu. Aefa da'õ bõrõ me lõ sõkhi nangi, tebai matohugõ woloyo ba nitõrõma mege. Andrõ wa numalõ ndra'aga tanõ yõu hulo Gareta sanõrõ Ture Zalomone, ena'õ aefa ndra'aga moroi ba nangi.

8Sidõrõngasa moloyoga ma'osisi'õ zinga hulo andrõ irege marugi nahia nifotõi Labua si Sõkhi, lõ arõu i'otarai mbanua Lasea.

9Me inõtõ da'õ no aefa ginõtõ wamoni ba niha Yahudi. No oya ahori ginõtõma, irege tenga baw̃a woloyo si sõkhi sa'ae. Bõrõ da'õ ibe'e menemene khõra Faulo,

10"He ya'ami ira talifusõ, molo'õ era'eragu lõ sõkhi na moloyo manõ ita. Gõna ita fa'ate'ala sebua, tenga ha ba nõsi awõ ba gõfada, ba hiza ba nosoda gõi."

11Ba hiza, abõlõ faduhu dõdõ gomandra zaradadu andrõ ba durumudi awõ nakhoda gõfa moroi ba wehede Waulo.

12No lõ sõkhi labua andrõ ba gõfa sanao bõrõ mbaw̃a sokafukafu. Bõrõ da'õ abõlõ ato ndraono gõfa somasi na tetohugõ woloyo ba wondrõi labua, bõrõ me abõlõ omasi ira wondrugi Feniki ba torõi ba da'õ ba ginõtõ mbaw̃a wa'okafu. Feniki ba no labua ba Gareta tanõ ba gaekhula.

13Ba ginõtõ da'õ alua nangi si lõ abõlõbõlõ moroi raya. Ba da'õ law̃a'õ tõdõra ono gõfa wa tola moloyo ira zui. Andrõ ladõni zao ba moloyo ira la'osisi hulo Gareta.

14Ba lõ ara aefa da'õ tohare nangi sabõlõbõlõ -- ya'ia nangi nifotõi Timu law̃i -- angi moroi ba danõ,

15ibõzi gõfama. Bõrõ me tebai itohugõ woloyo kõfa andrõ wolaw̃a angi, malulu manõ sa'ae gofu heza i'oloi'õ gõfama angi.

16Tobini ndra'aga ma'ifu me matõrõ tanõ raya hulo Kauda side'ide andrõ. Ba da'õ dõrõngasa tola mahaogõ dundraha side'ide ba gõfama.

17Me no aefa musõbi dundraha yaw̃a ba gõfa, mafake wangaro ba gõfa faoma bõbõ nibe'e ba zi fasui kõfa. Bõrõ wa'ata'uma na tosake ba gawu sanifi ba nasi Libia gõfa, labunu loyo ba i'oloi'õ manõ gõfa angi.

18Lõ mamalõ nangi, irege mahemolunia labõrõtaigõ lafazaumba nõsi gõfa si tou ba nasi.

19Ba ngaluo aefa da'õ lahalõ tangara iraono gõfa wamazaumba si tou ba nasi wakake gõfa.

20Mato ha'uga ngaluo lõ ma'ila haga luo ma zui dõfi, ba lõ mamalõ nangi sabõlõbõlõ. Ba gafuriata lõ manõtõna wa auri ndra'aga.

21Mato hawa'ara lõ manga niha. Muzizio Waulo ba gotaluara ba imane, "He ya'ami ira talifusõ! Na no mi'o'õ niw̃a'õgu wa lõ moloyo ita moroi ba Gareta, lõ falukha ita wa'atekiko awõ wa'ate'ala andre.

22Ba hiza iada'e gõi u'andrõ sibai ena'õ bõi mibusi dõdõmi. Samõsa lõ si mate ba gotaluami; ha kõfa andre zi tekiko.

23Me owi no ifatenge mala'ika-Nia khõgu Lowalangi nifosumangegu, Lowalangi sokhõ ya'o.

24Imane mala'ika, 'He Faulo, bõi ata'ufi! Mõi ndra'ugõ fõna Kaizaro. Ba bõrõ wa'asõkhi dõdõ Lowalangi khõu, auri fefu zoloyo si fao khõu bõrõ ndra'ugõ.'

25Bõrõ da'õ, ya'ami ira talifusõ, mi'omusoi'õ dõdõmi! Bõrõ me mamati ndra'o khõ Lowalangi wa lõ tola alua fefu si mane niw̃a'õ-Nia khõgu.

26Ba hiza tosake dania ita ba zi sambua hulo."

27Ba me no fele'õfa bongi, te'oloi'õ manõ misa ndra'aga ba Nasi Aderia. Mato talu mbongi, lamane ono gõfa, no ahatõ ndra'aga ba danõ.

28Latibo'õ ba nasi zinali nibõbõ kara ba mbalõ ba wanu'a fa'abakha nasi. Õfa wulu mete wa'abakha nasi andrõ. Ba lõ ara aefa da'õ lafuli lasu'a faoma sinali ba tesõndra arakha tõlu ngafulu mete wa'abakha.

29Ata'u ira na tosake gõfa ba goso kara, andrõ latibo'õ ngawua zao ba gi'o gõfa, ba latõtõna alio moluo.

30La'alui lala ono gõfa woloi moroi ba gõfa andrõ. Labe'e tou dundraha ba lalau da'õ hulõ na sanibo sao ira ba hõgõ gõfa.

31Ba hiza imane Faulo khõ gomandra zaradadu awõ zaradadu si so ba gõfa andrõ, "Na lõ torõi nono gõfa andre ba da'e, ba lõ auri ami."

32Bõrõ da'õ lataba zinali dundraha andrõ ira saradadu, irege arõu ahani.

33Gasagasa wombalombaloi fa'atumbu luo, iw̃a'õ khõra Faulo ena'õ lalau manga. Imane Faulo, "No fele'õfa ngaluo wa'ara sombalombaloi ami ba wa lõ ahono dõdõ ba lõ hadia ia ni'ami.

34Andrõ u'andrõ khõmi, milau manga he ha ma'ifu. Abõlõ sõkhi da'õ, ena'õ abõlõ ami mangawuli. Bõrõ me te'orifi ami ba lõ ambõ ami hadia ia."

35Me no aefa iw̃a'õ da'õ Faulo ihalõ roti ba i'aohasi gõlõ Zo'aya fõnara fefu. Aefa da'õ ibagibagi roti andrõ, ba ilau manga.

36Terara dõdõra mangawuli ba lalau manga gõi.

37Si so ba gõfa andrõ dua ngaotu a fitu ngafulu a õnõ niha.

38Me no aefa manga, ba latibo'õ mbalazora õsi gõfa andrõ ba nasi ena'õ aoha mangawuli gõfa.

39Me no moluo, la'ila danõ ono gõfa ba hiza lõ la'ila heza danõ andrõ. Oroma khõra zadõni telo awõ gawunia. Bõrõ da'õ omasi ira lasao gõfa andrõ ba da'õ na tola.

40Lataba dali zao ba alõmõ ba nasi zao andrõ. Laheta gõi zinali samõhõ amuri. Aefa da'õ lafasa loyo fõna gõfa ena'õ i'ohe gõfa angi numalõ ba gawu.

41Ba gõna ba gawu gõfa andrõ. Tosake hõgõ ba tebai maliw̃a sa'ae, ba i'o gõfa tekiko ibe'e bade sabõlõbõlõ.

42Labunu ena'õ niha nitaha andrõ ira saradadu, bõrõ me ata'u ira na so zolangi ba danõ ba lalau moloi.

43Ba hiza itegu ira komandra bõrõ me omasi ia i'orifi Waulo. I'o'ou ena'õ fefu niha sangila molangi akha lalau molangi numalõ ba gawu;

44ba la'o'õ tanõ bõ'õ la'orõmba wafa ma zui abotola gõfa. Ba zi mane da'õ, auri ira fefu larugi danõ.


  Share Facebook  |  Share Twitter

Download Audio MP3 (Kisah Para Rasul 27):
Mobile (Low Quality) - CD (High Quality)

 <<  Kisah Para Rasul 27 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel