Alkitab Mobile SABDA
[VER] : [NIAS]     [PL]  [PB] 
 <<  Kolose 4 >> 

1Ya'ami ira sokhõ sawuyu! Ena'õ si duhu ba satulõ milau khõ genonimi andrõ. Mitõngõni, wa so gõi zokhõ ya'ami ba zorugo.

2Ba mi'angandrõ si fao fa'aro dõdõ ba mi'ama'anõ, si fao fangandrõ saohagõlõ khõ Lowalangi.

3Mi'angandrõ gõi salahima ena'õ Ibe'e ginõtõ si sõkhi khõma Lowalangi ba wangombakha si no tobini andrõ, sanandrõsa khõ Yesu Keriso. Bõrõ da'õ wa so ndra'o ba gurunga iada'e.

4Mi'angandrõ salahigu, ena'õ u'ila ubotokhi geluaha zi no tobini andrõ, molo'õ satulõnia.

5Sanandrõsa ba gamakhaitami ba niha si lõ mamati andrõ, ba ena'õ satuatua ami awõ wa mi'oguna'õ ginõtõ andrõ.

6Ba ena'õ sõkhi wamondrondrongo fehedemi, ba adõni dõdõra ba ngawalõ niw̃a'õmi andrõ. Ba ena'õ mi'ila zinangeania ba wanema li ba ganofula zamõsana.

7Tikhiko, talifusõda ni'omasi'õ andrõ, i'ombakha'õ dania khõmi fefu zanandrõsa khõgu. Lõ si farõi ia ba we fao awõma ba halõw̃õ khõ Zo'aya.

8Ufatenge ia khõmi, ena'õ aboto ba dõdõmi hewisa ndra'aga, ba ena'õ terara dõdõmi.

9Onesimo gõi mõi awõ Dikhiko, talifusõ soroi mbanuami. Samõsa gõi ia zi lõ farõi. Ba ma'omasi'õ ia. Ya'ia ba Tikhiko zangombakha dania khõmi fefu zalua ba nahagu andre.

10Arisaro si no so bakha ba gurunga awõgu, i'owai ami fefu. Si manõ gõi Mareko, gasiw̃a Mbaranaba andrõ. (No mufa'ohe'õ duria khõmi ba wanema'õ ya'ia, na no so ia ba khõmi.)

11I'owai gõi ami Yesu, sotõi Yuso. Ba gotalua niha Yahudi si no mamati khõ Zo'aya, Yesu, ha ya'ira si datõlu andrõ iada'e zohalõw̃õ awõgu ba wombambaya halõw̃õ andrõ soroi Lowalangi. No la'oigõ sibai dõdõra wanolo ya'o.

12I'owai ami Efafera, soroi mbanuami. Enoni Yesu Keriso ia, si lõ mamalõmalõ mamorege fangandrõ salahimi. I'andrõ sibai khõ Lowalangi, ena'õ abe'e ami ba mo'ahonoa; ba ena'õ gõi faduhu sibai dõdõmi ba zomasi Lowalangi.

13Ufaduhu'õ samõsa khõmi, wa no gõi erege dõdõnia wohalõw̃õ ba khõmi ba mbanua La'odikia ba ba mbanua Hierafoli.

14Doto Luka, ni'omasi'õda andrõ, ba Dema, la'owai ami fefu.

15Ma'owai dalifusõ Niha Keriso ba La'odikia; si manõ gõi khõ Nimefa, ba banua Niha Keriso sangandrõngandrõ ba nomo khõnia.

16Na no aefa mubaso zura da'e ba khõmi, ba mi'alui lala ena'õ mubaso gõi ba mbanua Niha Keriso ba La'odikia. Si manõ zura nifa'ohe'õ ba La'odikia, ena'õ mubaso gõi ba khõmi.

17Ba mi'ombakha'õ khõ Arikhifo, ena'õ i'asiwalisi halõw̃õ andrõ si lõ tola lõ i'ohalõw̃õgõi khõ Zo'aya.

18U'owai ami, ya'odo Faulo. Ya'o samõsa zanura faosatõ da'e. Ba bõi olifu ami, wa ba gurunga nasa no so ndra'o! Ya'Ifahowu'õ ami So'aya.


  Share Facebook  |  Share Twitter

Download Audio MP3 (Kolose 4):
Mobile (Low Quality) - CD (High Quality)

 <<  Kolose 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran