Alkitab Mobile SABDA
[VER] : [NIAS]     [PL]  [PB] 
 <<  Lukas 23 >> 

1Muzizio fefu zanguhuku andrõ, la'ohe Ia fõna Wilato.

2Ba da'õ labõrõtaigõ la'angadugõ Ia. Lamane, "No masõndra wa Ifaelungu niha sato. Ifawe'e niha ena'õ lõ labu'a beo khõ Kaizaro, bõrõ me Imane Ya'ia Razo Sangorifi si no Ifabu'u Lowalangi."

3Isofu Filato khõ Yesu, "Hadia sindruhu Razo niha Yahudi Ndra'ugõ?" Itema li Yesu, "Si manõ wanguma'õu."

4Imane Filato khõ ndra ere sebua awõ niha sato andrõ, "Ma'ifu lõ nisõndragu sala niha andre."

5Ba hiza lafaso lamane, "Ifawe'e niha ba zi sagõrõ Yudea faoma famahaõ-Nia; i'otarai Galilea, ba iada'e no irugi da'e."

6Me irongo Filato da'õ, isofu imane, "Hadia moroi ba Galilea Niha andre?"

7Ba me irongo wa moroi ba danõ nifatõrõ Herode moroi Yesu, ifatenge Yesu khõ Herode, si no so ba Yeruzalema me inõtõ da'õ.

8Omuso sibai dõdõ Herode me i'ila Yesu, bõrõ me no ara irongorongo duria Yesu ba omasi ia falukha khõ-Nia. Ba itõtõna wa I'ila Ifalua dandra sahõlihõli dõdõ Yesu.

9Andrõ wa oya ibe'e wanofu khõ Yesu, ba ma'ifu lõ Itema linia Yesu.

10So gõi ba da'õ ndra ere sebua awõ guruguru agama niha Yehuda ba labe'e wangadu sagabua sibai khõ Yesu.

11La'o'aya ba la'omai'õ Yesu ira saradadu Herode. Ibe'e khõ-Nia mbaru solakhõmi Herode ba aefa da'õ ifatenge Ia mangawuli khõ Wilato.

12Me luo da'õ ifuli fahuwu Herode khõ Wilato hew̃a'ae fa'udu sibai ira mbõrõta.

13I'owuloi ndra ere sebua, awõ ndra salaw̃a, ba niha sato Filato.

14Aefa da'õ imane khõra, "No mi'ohe Niha andre khõgu awõ wa miw̃a'õ Ifaelungu niha. Iada'e no ufareso Ia fõnami, ba lõ nisõndragu sala ni'angadugõmi khõ-Nia.

15Si manõ gõi wangerangera Herode, andrõ wa ifatenge mangawuli khõma. Lõ hadõi amuata Niha andre, si tola tobali bõrõ wa la'etu'õ huku famunu khõ-Nia.

16Bõrõ da'õ omasido ufalisi Ia ya'i, ba aefa da'õ u'efa'õ Ia."

17[Ero Owasa Fasa, i'efa'õ Filato samõsa niha nitaha, somasi niha sato.]

18Mu'ao fefu niha si so ba da'õ, "Bunu Ia! Efa'õ khõma Mbaraba!"

19(Labe'e ba gurunga Mbaraba bõrõ wamarukhu ba zi sambua fasa awõ wamununia niha.)

20Bõrõ me omasi Wilato i'efa'õ Yesu, ifuli mu'ao ia ba niha sato andrõ.

21Mu'ao ira lamane, "Forõfa Ia! Forõfa Ia!"

22Ba zi medõlu kali mu'ao Wilato khõra. Imane Filato, "Ba hadia zala-Nia? Lõ nisõndragu hadia zala-Nia si tobali bõrõ ba wanguhuku ba ba wamunu Ya'ia! Akha ufalisi Ia, aefa da'õ u'efa'õ Ia."

23Mu'ao ira sa'oi dõdõra wa lõ tola lõ'õ ni'osõ Yesu ba rõfa. Ba ba gafuriata mõna ira.

24I'etu'õ Filato huku famunu khõ Yesu faudu ba zomasi niha sato andrõ.

25I'efa'õ Filato khõra ni'andrõra, nikuru bõrõ wamarukhu awõ wamunu niha. Maoso Wilato ibe'e Yesu ba dangara ena'õ lalau zomasi ira.

26La'ohe baero Yesu. Ba dalu lala, falukha ira zotõi Simoni, si otarai mbanua Girene, si numalõ ba fasa. Lara'u ba lafaso ia wolohe rõfa furi Yesu.

27Ato zi fao mowaõwaõ awõ Yesu -- so ba gotaluara ndra alawe. La'e'esi Yesu ira alawe andrõ.

28Ifaigi ira Yesu ba Imane, "He ira alawe, Yeruzalema! Bõi mi'e'e khõ-Gu. Mi'e'e khõmi ba ba ndraonomi.

29Bõrõ me so ginõtõnia lamane, 'Moharazaki ndra alawe si lõ ono, si lõ irai mo'ono ba si lõ irai mamaenu iraono!'

30Ba ginõtõ andrõ dania lamane niha ba hili, 'Langõgõ ndra'aga!' Ba lamane ba hilihili, 'Balugõ ndra'aga!'

31Bõrõ na lalau zi mane ba dõla geu sauri, hadia dania nilaura ba dõla geu si no okõli!"

32So gõi darua niha bõ'õ -- darua manõ samarukhu -- ni'ohe awõ Yesu.

33Me larugi nahia nifotõi "Sole Hõgõ", laforõfa Yesu ba da'õ. Laforõfa gõi zamarukhu si darua andrõ -- samõsa tanõ ba gambõlõ Yesu ba si samõsa tõ ba gabera-Nia.

34Ilau mangandrõ Yesu, "He Ama, efa'õ khõra horõra! Lõ la'ila hadia nilaura." Labagibagi nukha Yesu khõra faoma dahõdahõ.

35Lalau muzizio niha sato ba da'õ, ba la'o'aya Yesu ira salaw̃a niha Yahudi. Lamane, "No I'orifi niha bõ'õ; akha I'orifi Ia samõsa iada'e, na duhu Razo Sangorifi nifabu'u Lowalangi andrõ!"

36La'o'aya gõi Yesu ira saradadu. Mõi ira khõ-Nia wame'e agu saisõ.

37Lamane, "Na razo niha Yahudi Ndra'ugõ, orifi Ndra'ugõ!"

38Yaw̃a ba rõfa Yesu, lasura wehede, "Razo Niha Yahudi."

39Samõsa ba gotalua zamarukhu niforõfa andrõ zango'aya Yesu. Imane, "Razo Sangorifi nifabu'u Lowalangi Ndra'ugõ! Andrõ, orifi Ndra'ugõ ba ya'aga gõi!"

40Itegu ia si samõsa. Imane, "Hadia, lõ ata'u ndra'ugõ khõ Lowalangi? Nihuku famunu ita fefu.

41Faudu ba gamuatada huku andrõ nibe'e khõda. Ba Ya'ia andre lõ sala!"

42Aefa da'õ imane khõ Yesu, "He Yesu, tõrõ tõdõu ndra'o, na tohare Ndra'ugõ dania ba wa'arazo-Mõ!"

43Imane khõnia Yesu, "Ya faduhu dõdõu. Ma'õkhõ andre awõ-Gu ndra'ugõ ba Waradaiso."

44Mato bõzi felendrua ba zi talu ma'õkhõ, tebato haga luo. Ogõmi fefu zi sagõrõ tanõ irugi bõzi tõlu tanõ owi.

45Asika ba fabali nukha ba'aba'a ba Nomo Zo'aya.

46Mu'ao Yesu ebua li-Nia Imane, "He Ama! Ba danga-U Utou'õ noso-Gu!" Me no aefa Iw̃a'õ da'õ, aetu noso-Nia.

47Me i'ila hõgõ zaradadu zi no alua, isuno Lowalangi! Imane, "Sindruhu, niha si sõkhi Niha andre!"

48Niha sato si so ba da'õ, la'ila fefu zalua andrõ. Lafuli ira ba nomora zamõsana si fao fa'alangu dõdõ.

49Fefu niha sangila Yesu, so gõi ba gotaluara ndra alawe solo'õ Ya'ia i'otarai Galilea, la'ila fefu zalua andrõ moroi ba zarõu.

50So samõsa zotõi Yosefo, soroi mbanua Garimatea ba danõ Yudea. Niha si sõkhi ba nifosumange niha ia, sombaloi inõtõ wamatõrõ Lowalangi. Hew̃a'ae ndrotondroto Zanguhuku ba Agama ia, lõ fao dõdõnia ba gangetula zanguhuku andrõ.

51(23:50)

52Mõi Yosefo khõ Wilato wangandrõ ena'õ ibe'e khõnia mboto Yesu.

53Ibe'e tou mboto Yesu moroi ba rõfa, ibukusi muko. Aefa da'õ itou'õ mboto Yesu andrõ ba lewatõ nikhao ba narõ gara, ba hilihili -- lõ irai mu'oguna'õ lewatõ andrõ.

54Luo zumaha me luo da'õ; ba lõ ara tõ luo Sabato.

55La'o'õ Yosefo ira alawe si faofao khõ Yesu moroi ba Galilea wamaigi lewatõ andrõ. La'ila wa no tetou'õ mboto Yesu ba lewatõ.

56Aefa da'õ mangawuli ira ba wama'anõ samohua awõ wanikha nibe'era dania ba mboto Yesu. Mahemolu õ, meluo Sabato, lõ mohalõw̃õ ira molo'õ amakhoita ba agama niha Yehuda.


  Share Facebook  |  Share Twitter

Download Audio MP3 (Lukas 23):
Mobile (Low Quality) - CD (High Quality)

 <<  Lukas 23 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel