Dual Panel1Lõ ara aefa da'õ, mõi Yesu misa ba mbanua sebua awõ ba mbanua side'ide ba wanuriaigõ Turia Somuso Dõdõ wa Ibõrõtaigõ wamatõrõ-Nia Lowalangi ba wa'arazo-Nia.
2Si manõ gõi ndra alawe si no dõhõ moroi ba wa'abõlõ zi lõ sõkhi si ra'iõ. Da'e ndra alawe andrõ: ya'ia Maria nifotõi gõi Magadala (dafitu wa'abõlõ zi lõ sõkhi nifofanõ moroi khõnia);
3si manõ gõi Yohana, fo'omo Khuza, sohalõw̃õ ba nomo Herode; Susana, ba ato na ndra alawe tanõ bõ'õ. Latolo Yesu awõ ira nifahaõ-Nia faoma okhõtara samõsa.
4La'ondrasi manõ Yesu niha sato moroi sa ba mbanua. Ba me no ato zowulo, Itutunõ gamaedola da'e khõra. Imane,
5"So samõsa zamazaewe tanõmõ. Me ifazaewe danõmõ andrõ, so zaekhu ba lala, ba lahundragõ niha sanõrõ ba i'a fofo õsa.
6So gõi zaekhu ba nahia sokarakara. Me motalinga ia i'anema'õ aleu, bõrõ me no okõlikõli danõ si so ya'ia.
7So gõi danõmõ saekhu ba gotalua za'asa'a mao. Tumbu za'asa'a mao andrõ fabaya tanõmõ, irege ilazi'õ danõmõ si tumbu andrõ.
8Ba so gõi danõmõ saekhu ba danõ satabõ, tumbu ba mowua irege otu kali fabali." Aefa da'õ I'etu'õ gamaedola andrõ Yesu Imane, "Ya'ami samondrongo da'e, ba mihaogõ wanõngõni!"
9Lasofu ira nifahaõ-Nia geluaha gamaedola andrõ.
10Itema li Yesu, "Khõmi no mube'e wa'aboto ba dõdõ si tobini andrõ khõ Lowalangi awõ wamatõrõ-Nia. Ba ba niha tanõ bõ'õ te'ombakha'õ da'õ faoma amaedola, ena'õ lafaigi ba lõ la'ila; hew̃a'ae larongo ba lõ aboto ba dõdõra."
11"Da'e geluaha gamaedola andrõ: Tanõmõ andrõ no taroma li Lowalangi.
12Tanõmõ saekhu ba lala no amaedola niha samondrongo taroma li. Tohare Gafõkha ba irabu duria andrõ moroi bakha ba dõdõra ena'õ lõ faduhu dõdõra ba ena'õ lõ te'orifi ira.
13Tanõmõ saekhu ba nahia sokarakara, no amaedola niha samondrongo taroma li ba sanema'õ faoma fa'omuso dõdõ. Ba lõ mangabakha duria andrõ bakha ba dõdõra. Lõ anau gõlõ wamatira, na so wanandraigõ, ba alio farõi ira.
14Tanõmõ saekhu ba gotalua za'asa'a mao no amaedola niha samondrongo turia andrõ ba la'abusi tõdõ, omasi ira kayo awõ wa'asana ba wa'auri ba gulidanõ andre. Da'e fefu zolazi'õ ya'ira irege lõ tesõndra mbua si sõkhi moroi khõra.
15Tanõmõ saekhu ba danõ satabõ, no amaedola niha samondrongo turia andrõ, ba la'irõ'õ ia bakha ba dõdõra si sõkhi ba satulõ. So wa'anau gõlõ ba fanaha tõdõ irege mowua."
16"Lõ hadõi sanunu fandru, sombalugõ ya'ia faoma karaw̃a, ba ma same'e barõ naha wemõrõ. Ibe'e wandru andrõ ba nahia wandru, ena'õ la'ila hagania niha si mõi yomo ba nomo.
17Lõ hadõi nibini'õ si lõ oroma dania; ba lõ hadõi nibalugõ si lõ la'ila niha ba tebokai dania.
18Bõrõ da'õ, mihaogõ wanõngõni hadia ia nirongomi. Ba niha si no so ba tenõnõ nasa khõnia. Ba ba niha si lõ'õ ba tehalõ moroi khõnia na'i zi no so."
19Mõi khõ Yesu nina-Nia awõ ndra talifusõ-Nia, ba tebai lafalukhaisi Ia bõrõ wa'ato niha.
20So samõsa zanguma'õ khõ Yesu, "He Ama, no so baero nina-U awõ ndra talifusõ-U. Omasi ira falukha khõ-U."
21Ba Imane khõra fefu Yesu, "Ina-Gu ba ira talifusõ-Gu, ya'ia niha samondrongo taroma li Lowalangi ba samalua ya'ia."
22Samuza ma'õkhõ mõi Yesu ba dundraha awõ nifahaõ-Nia. Imane khõra Yesu, "Mitabu, mõi ita yefo mbaw̃a." Ba mofanõ ira.
23Me moloyo ira, ba no mõrõ Yesu. Ba so nangi sabõlõbõlõ ba mbaw̃a andrõ. Ibõrõtaigõ mõi bakha ba dundraha nidanõ, samakiko ya'ira ena'õ.
24Ba mõi khõ Yesu ndra nifahaõ-Nia ba wanusugi Ya'ia. Lamane, "He Guru, he Guru, tekiko ita!" Ba maoso Yesu, Itenaw̃a nangi awõ mbade sebua andrõ. Ba tebato nangi awõ mbade, ba tobali ahono sibai mbaw̃a.
25Imane Yesu khõ ndra nifahaõ-Nia, "Hana wa lõ mamati ami khõ-Gu?" Ba ata'u ira fao wa ahõlihõli dõdõ. Faoma lamane khõ nawõra, "Haniha sindruhunia Niha andre, irege Ibe'e li ba nangi awõ ba mbade, ba la'o'õ gõi niw̃a'õ-Nia!"
26Latohugõ woloyo ira Yesu awõ ndra nifahaõ-Nia irugi mbanua Gerasa yefo Mbaw̃a Galilea tanõ ba gatumbukha.
27Me mõi tou Yesu ba danõ, i'ondrasi Ia samõsa niha nira'u wa'abõlõ zi lõ sõkhi. I'otarai mbanua niha andrõ. No ara lõ omasi monukha ia ba lõ omasi torõi ba nomo. Ba dõgi danõ nahia lewatõ torõi ia.
28Me i'ila Yesu, mu'ao ia ba mangalulu fõna Yesu, imane, "He Yesu, Ono Lowalangi Fondrege Zalaw̃a! Hadia nilau-Mõ khõgu? U'andrõ khõ-U bõi fakao ndra'odo!"
29Imanõ wanguma'õ niha andrõ bõrõ me no Ifofanõ wa'abõlõ zi lõ sõkhi moroi khõnia Yesu. No auli kali ifatõrõ ia fa'abõlõ zi lõ sõkhi andrõ, irege hew̃a'ae no larate danga awõ gahenia ba lahaogõ wanaro ya'ia, ba tola nasa i'etu'õ rate, ba i'ohe ia fa'abõlõ zi lõ sõkhi ba danõ si mate.
30Isofu Yesu ba niha andrõ, "Haniha dõimõ?" Itema li niha andrõ, "'Legiu' dõigu," bõrõ me ato wa'abõlõ zi lõ sõkhi sanaw̃a ya'ia.
31La'andrõ sibai fa'abõlõ zi lõ sõkhi andrõ ena'õ bõi Ifofanõ ira numalõ ba mbaho.
32Ahatõ ba da'õ gõi so ngawawa mbawi sangalui gõra ba naerenaere hili. La'andrõ sibai khõ Yesu fa'abõlõ zi lõ sõkhi andrõ ena'õ Itehe khõra momõi ba ngawawa mbawi andrõ. Ba Itehegõ khõra Yesu.
33Larõi niha andrõ fa'abõlõ zi lõ sõkhi, lasaw̃a mbawi. Ba moloi mbawi, lafazibo ira moroi ba ngõfi mbaho adõlõ ba mbaw̃a, ba oi alõmõ.
34La'ila fefu zalua sanaro bawi andrõ. Moloi ira ba latutunõ duria andrõ ba mbanua awõ ba halama misa si fasui ba da'õ.
35Ba momõi baero niha wamaigi si no alua andrõ. La'ondrasi Yesu, ba la'ila ba da'õ niha nira'u wa'abõlõ zi lõ sõkhi, no dumadao ahatõ ba gahe Yesu. No monukha ia ba no adõlõ wangerangerania. Oi ata'u ira fefu.
36Ya'ira si no mangila salua andrõ oi ladunõdunõ ba niha, hewisa wamadõhõ niha si so fa'abõlõ zi lõ sõkhi andrõ.
37Fefu zowanua ba Gerasa la'andrõ khõ Yesu ena'õ Irõi nahia andrõ, bõrõ me oi so wa'ata'ura. Ba mõi Yesu ba dundraha, mangawuli Ia.
38Niha sawena aheta fa'abõlõ zi lõ sõkhi andrõ, i'andrõ sibai ena'õ tola fao ia awõ Yesu. Ba Ifofanõ ia Yesu. Imane,
39"Angawuli ba khõmi, ba ombakha'õ hadia zi no Ilau Lowalangi khõu." Ba mõi niha andrõ wanuriaigõ ba zi sagõrõ banua andrõ, hadia ia zi no Ilau Yesu khõnia.
40Me mangawuli Yesu yefo mbaw̃a, lafaondragõ Ia faoma fa'omuso dõdõ bõrõ me no labalobaloi wa'atohare-Nia.
41Ba tohare samõsa zondrõnia'õ ba gosali, sotõi Ya'iro. Mangalulu ia fõna Yesu ba i'andrõ sibai khõ Yesu ena'õ mõi Ia ba nomonia,
42bõrõ me ononia alawe si ha sambusambua arakhagõ mate. Felendrua fakhe wa'ebua nono andrõ. Me mowaõwaõ Yesu numalõ ba nomo Ya'iro, ba oi zara lafadegedege ira niha khõ-Nia lõ lalalala.
43Ba da'õ so ndra alawe si no felendrua fakhe wa'ara, mofõkhõ sendro talu. Fefu haratonia no ahori ba wangalui daludalu, ba samõsa lõ si tola mamadõhõ.
44Moroi ba gotalua niha sato andrõ, ihatõ'õ ia moroi furi Yesu, ba ibabaya gahe mbaru Yesu. Ba i'anema'õ dõhõ wendro dalu ndra alawe andrõ.
45Isofu Yesu, "Haniha zi no mombambaya Ya'o?" Ba fefu niha lamane tenga ya'aga. Imane Fetero, "He Ama, wa'ato niha samasui Ya'ugõ ba ladegeni sibai Ndra'ugõ!"
46Imane Yesu, "Lõ tola lõ'õ so zombambaya Ya'o. U'ila bõrõ me so wa'abõlõ saheta moroi khõ-Gu."
47I'ila ira alawe andrõ wa no oroma nilaunia. Mõi ia si fao fanizinizi mangalulu ia fõna Yesu. Fõna niha sato, itutunõ hana wa ibabaya mbaru Yesu, awõ wa i'anemai'õ dõhõ ia.
48Imane khõnia Yesu, "He ono-Gu, famatimõ zamadõhõ ya'ugõ. Fuli'õ ya'ohahau dõdõu."
49Me fahuhuo na Yesu, tohare samõsa dengetenge moroi ba nomo Ya'iro, "No mate nonou alawe andrõ. Bõi sa'ae busi dõdõ Guru andrõ."
50Me Irongo niw̃a'õ niha andrõ Yesu, Imane khõ Ya'iro, "Bõi ata'ufi. Amati manõ, dõhõ dania nonou."
51Me no larugi nomo Ya'iro, lõ Itehe mõi si bakha niha awõ-Nia Yesu, baero Wetero, Yohane, Yakobo ba satua nono andrõ.
52Ba oi zara me'e fefu niha, la'e'esi wa'amate nono andrõ. Imane Yesu, "Bõi mi'e'e. Tenga si mate nono andrõ, si mõrõ."
53La'igi'õ Yesu, bõrõ me la'ila wa no mate nono alawe andrõ.
54Aefa da'õ Ibabaya danga nono andrõ Yesu ba Imane, "He ono-Gu faoso!"
55Ba mangawuli noso nono andrõ, i'anema'õ maoso ia. Aefa da'õ Iw̃a'õ khõra Yesu ena'õ labe'e gõ nono andrõ.
56Ba ahõlihõli sibai dõdõ zatua nono andrõ. Ba Itenaw̃a ira Yesu ena'õ bõi la'ombakha'õ zalua andrõ gofu ha'õkhõ.