Dual Panel1Me no aefa Ibe'e menemene andrõ Yesu khõ ndra nifahaõ-Nia, Irõi nahia andrõ. Numalõ Ia wanuriaigõ turia wangorifi khõ Lowalangi, moroi ba zi sambua banua numalõ ba mbanua sahatõ ba da'õ.
2Irongo Yohane duria Yesu andrõ me so ia nasa bakha ba gurunga. Andrõ ifatenge ndra nifahaõnia khõ Yesu ba wanofu da'e,
3"Hadia Ya'ugõ zi tohare andrõ, ma zui so nasa niha bõ'õ nibaloima?"
4Itema li Yesu, "Mi'ae'e mi'ombakha'õ khõ Yohane hadia nirongo awõ ni'ilami:
5Ifuli i'ila niha sau'a, niha sombuyumbuyu tola ifuli mowaõwaõ, dõhõ mbou auri, safiso ifuli irongo li niha, si no mate ifuli auri, ba Turia Somuso Dõdõ soroi Lowalangi laturiaigõ ba niha si numana.
6Ya'ahowu niha si lõ fatuwu khõ-Gu!"
7Me no mofanõ nifahaõ Yohane andrõ, Ibõrõtaigõ fahuhuo Yesu ba niha sato si so ba da'õ sanandrõsa khõ Yohane. Imane Yesu, "Hadia ni'ilami ba danõ si mate na mõi ami khõ Yohane? Hadia du'u nifaheu nangi?
8Hadia sindruhunia nifaigimi? Hadia niha sonukha si sõkhi? Niha si mane da'õ so ba nomo Razo!
9Hadia sindruhunia zomasi ami mi'ila, na mõi ami khõ Yohane? Hadia sama'ele'õ ia? Sindruhu niw̃a'õ-Gu khõmi, tõra moroi ba zama'ele'õ Yohane andrõ!
10Ya'ia niw̃a'õ andrõ ba Mbuku Ni'amoni'õ, 'Tengetenge-Gu da'õ, iw̃a'õ Lowalangi, Ofõna Ufatenge ia ba wamokai lala khõu.'
11Mitõngõni! Ba gulidanõ andre lõ si mane fa'ebua Yohane Samayagõ Idanõ. Ba hew̃a'ae si manõ, fondrege zide'ide ba gamatõrõw̃a Lowalangi, abõlõ ebua moroi khõ Yohane.
12I'otarai mbõrõta wanuriaigõ Yohane irugi da'e, latimbagõ wamatõrõ Lowalangi andrõ niha somasi mangokhõgõ ya'ia faoma fa'abõlõra.
13Huku agama Yehuda nibe'e Moze ba ira sama'ele'õ fõna irugi we'aso Yohane, no lafa'ele'õ zanandrõsa ba wamatõrõ Lowalangi.
14Na faduhu dõdõmi ba duria nifa'emara andrõ, si fõfõna lõ tola lõ'õ mi'ila wa Yohane andrõ no Elia si no lafa'ele'õ fõna.
15Na so dalingami ba wamondrongo, ya mifondrondrongo!
16Faoma hadia Ufaedogõ niha ba ginõtõ iada'e? Hulõ ndraono ira si so ba fasa; si samõsa mu'ao ia khõ nawõnia,
17'Malau zinunõ ba walõw̃a khõmi, ba hiza lõ omasi ami manari! Ma'anunõisi zinunõ ba zi mate, ba lõ omasi ami me'e!'
18Tohare Yohane -- ba fuasõ ia ba lõ mamadu agu; ba hiza lamane niha, 'Niha sobekhu!'
19Iada'e tohare Nono Niha andrõ -- manga ba mamadu Ia, ba lamane niha, 'Mifaigi atõ niha da'õ! Niha solu'alu'a, si mabumabu, awõ-Nia zanema beo ba awõ niha si so horõ.' Ba hew̃a'ae si manõ fa'atuatua Lowalangi andrõ oroma ba halõw̃õ-Nia."
20Aefa da'õ Ibõrõgõ Yesu wangeherai banua ba zi no Ilau tandra sahõlihõli dõdõ soya. Bõrõ me niha ba mbanua andrõ lõ omasi ira lafalalini gera erara ba wondrõi horõ.
21"Alai ndra'ugõ Khorazi! Ba alai ndra'ugõ Betisa'ida! Na tandra sahõlihõli dõdõ andrõ nifalua khõmi, tefalua ba Diro ba ba Zidona, no ara lafake nukha satua ba lahawui awu hõgõra awõ mbotora, ba wangoroma wa no lafalalini gera'erara!
22Mitõngõni, ba Luo Safuria abõlõ ihakhõsi tõdõ Lowalangi niha Diro awõ Zidona andrõ moroi khõmi!
23Ya'ugõ, Kafana'uma! Hadia, la'alaw̃a'õ ndra'ugõ irugi zorugo? Lõ'õ! Hiza, latibo'õ ndra'ugõ na'i ba narako! Na tandra sahõlihõli dõdõ andrõ nifalua khõmi no alua ba Zodoma, so nasa Zodoma andrõ irugi ma'õkhõ!
24Mitõngõni, ba Luo Safuria, abõlõ ihakhõsi tõdõ Zodoma andrõ moroi khõmi!"
25Me inõtõ da'õ mangandrõ Yesu, "He Ama, So'aya sokhõ tanõ ba banua! U'andrõ saohagõlõ khõ-U me lõ Õ'oroma'õ fefu da'õ ba niha sonekhe awõ zatuatua. No Õforoma'õ ia ba niha si lõ fa'atuatua.
26Da'õ sa zangomusoi'õ tõdõ Nama."
27"Fefu hadia ia no Ibe'e ba danga-Gu Ama-Gu. Ba lõ sangila Ono andrõ, baero Nama. Ba lõ sangila Ama andrõ, baero Nono, ba ba niha ni'ombakha'õ Nono andrõ, Ama-Nia.
28Mi'aine khõ-Gu, ya'ami fefu si no erege tõdõ ba wolohe noro sabua; Ufolombase ami.
29Mi'o'õ niw̃a'õ-Gu awõ wamahaõ-Gu. No sebolo tõdõ ba si sõkhi tõdõ Ndra'o. Da'õ mbõrõ wa misõndra wolombase.
30No sangomusoi'õ tõdõ wehede-Gu khõmi, ba noro saoha nifalu'i'õ-Gu khõmi."