Dual Panel1Me no aefa Iw̃a'õ da'õ fefu Yesu, Irõi Galilea numalõ ba Yudea yefo Nungo Nidanõ Yoridano.
2Ato niha solo'õ Ya'ia, ba Ifadõhõ ira fefu ba da'õ.
3La'ondrasi Ia ira Farizai'o ba wanandraigõ Ya'ia. Lasofu khõ-Nia, "Molo'õ huku agama ba khõda, hadia tetehegõ ifabali ndrongania niha ba nilau dõdõnia manõ?"
4Itema li Yesu, "Hadia, lõ nibasomi ba Mbuku Ni'amoni'õ wa Lowalangi zombõi niha, ira alawe ba ira matua.
5Aefa da'õ Imane, 'Andrõ wa irõi namania ba inania ira matua ba tobali ha sambua boto ira wo'omonia!'
6Tobali tenga sa'ae darua ira, ha tõ samõsa. Da'õ mbõrõ wa tebai ifabali niha zi no I'osambua'õ Lowalangi."
7Lasofu khõ-Nia ira Farizai'o, "Hana wa iw̃a'õ Moze, ena'õ na ibe'e zura khõ ndrongania na omasi ia ifabali ndrongania andrõ?"
8Itema li Yesu imane, "Itehegõ khõmi Moze mifabali ndrongami bõrõ me no si tebai nifahaõ ami. Ba wamõbõrõ tenga si manõ zindruhunia.
9Mifondrondrongo da'e: Haniha zamabali dongania -- he w̃a'ae lõ sohorõ ndrongania andrõ -- ba ilau mangowalu ba ndra alawe bõ'õ, ba sohorõ niha da'õ."
10Lamane ira nifahaõ khõ Yesu, "Na si manõ waõwaõ warongasa andrõ, abõlõ sõkhi na lõ mangowalu."
11Itema li Yesu, "Lõ dozi niha fao dõdõ ba wanguma'õ si manõ, ha ya'ira si no Ihonogõi Lowalangi.
12Na so zi lõ mangowalu, ba no mu'adonogõ ira si manõ da'õ. So gõi niha si lõ mangowalu bõrõ wolau niha bõ'õ khõnia. So gõi zangahonogõi lõ mangowalu, ena'õ abõlõ i'oigõ dõdõnia wanga'i halõw̃õ Lowalangi. Niha si tola manema famahaõ da'õ, ba akha itema zi manõ."
13So niha solohe iraono khõ Yesu ena'õ na Itufa hõgõra ba wangandrõ salahi ndraono andrõ. Ba latenaw̃a ira nifahaõ Yesu niha solohe iraono andrõ.
14Imane Yesu khõ ndra nifahaõ-Nia, "Akha mõi khõ-Gu ndraono andrõ! Bõi mitenaw̃a ira, bõrõ me niha si mane da'e zi tobali ono mbanua Lowalangi."
15Itufa hõgõ ndraono andrõ Yesu, Ifahowu'õ ira. Aefa da'õ ba mofanõ Ia.
16Samuza ma'õkhõ so niha sangondrasi Yesu, Imane, "He Guru, hadia zi sõkhi ulau ena'õ usõndra wa'auri si lõ aetu?"
17Itema linia Yesu Imane, "Hana wa khõ-Gu õsofu hadia ia zi sõkhi? Ha sambua zi sõkhi. Na omasi ndra'ugõ õsõndra wa'auri, ba lõ tola lõ õ'o'õ goroisa Lowalangi."
18Itohugõ wanofu niha andrõ, "Hadia zomasi Lowalangi?" Itema li Yesu, "Bõi ange'e; bõi ohorõ; bõi anagõ; bõi falimo;
19fosumange namau awõ ninau; omasi'õ nawõu si mane fa'omasiu ndra'ugõ."
20Imane niha andrõ, "No u'o'õ fefu da'õ, hadia na danõ bõ'õ?"
21Imane khõnia Yesu, "Na omasi'õ mo'ahonoa, ae'e amawa fefu zi so khõu. Ba be'e mbõlinia ba zi numana, ba õsõndra harato ba zorugo. Aefa da'õ ae'e ba da'e ba o'õ Ndra'o!"
22Me irongo wehede da'õ ono matua andrõ, ba mofanõ ia si fao fa'abu dõdõ, me niha si kayo sibai ia.
23Aefa da'õ Imane Yesu khõ ndra nifahaõ-Nia, "Uw̃a'õ khõmi, fondrege wa'afõkhõ sibai ba niha si kayo tobali ndrotondroto mbanua Lowalangi.
24Da'e nasa niw̃a'õ-Gu khõmi: abõlõ aoha na itõrõ dõgi naha gõ -- nifotõi tõgi walõlõw̃a -- gondra moroi na mõi bakha ba Mbanua si Bohou khõ Lowalangi niha si kayo."
25Me larongo ira nifahaõ-Nia niw̃a'õ Yesu andrõ, ba ahõlihõli dõdõra. Lamane, "Na si manõ haniha ni'orifi?"
26Ifaigi ira Yesu ba Imane khõra, "Na ba niha ba tebai! Ba na khõ Lowalangi ba lõ si tebai!"
27Aefa da'õ imane Fetero, "Faigi, no marõi fefu hadia ia ba wolo'õ Ya'ugõ. Ba hadia dania nitemama?"
28Imane khõra Yesu, "Ya faduhu dõdõmi: Ba mbanua si bohou andrõ, dumadao dania Nono Niha yaw̃a ba dadaoma-Nia solakhõmi. Ba ginõtõ da'õ gõi dania dumadao ami ya'ami ira nifahaõ-Gu yaw̃a ba dadaoma zi felendrua andrõ, ba wanguhuku si felendrua mado soi Gizera'eli!
29Dozi niha sondrõi omonia, talifusõnia matua, ma talifusõnia alawe, ma zui ama ba inania, ma iraononia, ma nowinia bõrõ Ndra'o, itema dania niha andrõ otu kali fabali. Awõ wa itema gõi dania wa'auri si lõ aetu.
30Hiza, ato niha si fõfõna iada'e tobali dania safuria, ba ato zafuria iada'e tobali dania si fõfõna."