Dual Panel1"Na mamatõrõ Lowalangi andrõ, ba hulõ gamaedola da'e: So samõsa niha sokhõ kabu nagu, sofanõ sahulõ wongi ba wangalui niha sohalõw̃õ ba kabu nagu khõnia.
2Me no fao dõdõra wanema gazi sambua rufia firõ ma'õkhõ samõsa, ifatenge ira wohalõw̃õ ba kabu nagu khõnia.
3Mato bõzi siw̃a sahulõ wongi, mofanõ zui zokhõ kabu andrõ, i'ila niha si lõ halõhalõw̃õ ba fasa.
4Imane khõra, 'Mi'ae'e mohalõw̃õ ba kabu nagu khõgu. Ba ube'e zinangea gazimi.'
5Ba mõi gõi ira. Bõzi felendrua laluo ba bõzi tõlu tanõ owi, mõi baero zui zokhõ kabu andrõ ba wangalui sohalõw̃õ ba kabu nagunia.
6Mato bõzi lima tanõ owi, i'ila zui niha si lõ halõw̃õ. Isofu khõra, 'Hana wa muziozio manõ ami ma'õma'õkhõ ba da'e lõ halõhalõw̃õ?'
7Latema linia niha andrõ, 'Lõ hadõi same'e halõw̃õ khõma.' Imane sokhõ kabu andrõ, 'Na si manõ, mi'ae'e mohalõw̃õ ba kabu nagu khõgu.'
8Me arakha bongi, muhede zokhõ kabu khõ mandru sohalõw̃õ khõnia imane, 'Kaoni ndra sohalõw̃õ ba be'e gazira zamõsana, i'otarai zafuria so numalõ ba zi fõfõna so.'
9Tohare zohalõw̃õ si so me bõzi lima tanõ owi, latema gazira sambua rufia firõ.
10Ba tohare gõi zohalõw̃õ i'otarai zahulõ wongi. Lamane tõdõra, manema ita tõra moroi andrõ. Ba hiza sa tebe'e khõra sambua rufia firõ gõi.
11Me latema gefe andrõ, mukõkõkõkõ ira khõ zokhõ kabu.
12Lamane, 'Ha sambua za wohalõw̃õ ndra niha safuria so, ba ma'õma'õkhõ mohalõw̃õ ndra'aga ba zino siriririri, ba hiza fagõlõ zinemama.'
13Itema lira sokhõ kabu, 'He talifusõ, lõ nilaugu si lõ sõkhi khõmi. Hadia, lõ si fao dõdõmi ba wanema gazi sambua rufia firõ ma'õkhõ?
14Mihalõ gazimi andre ba mi'ofanõ. Nilau dõdõgu wame'e gazi zafuria so andrõ fagõlõ ba gazimi.
15Hadia, tebai ufalua zomasi dõdõgu ba zi so khõgu? Ma zui lõ fao dõdõmi, na uhakhõsi tõdõ niha bõ'õ?'"
16Itohugõ wanguma'õ zui Yesu, "Si manõ gõi: safuria tobali si fõfõna, ba si fõfõna tobali safuria dania."
17Me mõi Yesu ba Yeruzalema, ba dalu lala Ikaoni ndra nifahaõ-Nia ena'õ la'owuloi ira. Imane khõra,
18"Mifondrondrongo! Numalõ ita iada'e ba Yeruzalema. Ba da'õ dania tebe'e Nono Niha ba danga ndra ere sebua, ba ba danga zangila amakhoita ba niha Yehuda. Ba la'etu'õ huku famunu khõ-Nia.
19Aefa da'õ ba labe'e Ia ba danga niha si tenga niha Yahudi. La'o'aya dania Ia, lafakao ba laforõfa. Ba hiza, ba ngaluo si tõlu ifuli auri Ia."
20Aefa da'õ la'ondrasi Yesu wo'omo Zebedai'o awõ ndraononia. Mangalulu ia fõna Yesu, so ni'andrõnia.
21Isofu khõnia Yesu, "He Ina, hadia zomasi'õ?" Itema li-Nia ira alawe andrõ, "Omasido na iraonogu andre si darua dumadao ba gabera-U samõsa ba ba gambõlõ-U samõsa na tobali dania Ndra'ugõ Razo."
22Imane khõra Yesu, "Lõ mi'ila hadia ia ni'andrõmi. Hadia, tola fao ami wamadu õsi mako andrõ nibadu-Gu?" Latema li, "Tola!"
23Imane Yesu, "Mibadu sa dania nõsi mako andrõ khõ-Gu. Ba hiza, sanandrõsa ba wangiagõ ba gambõlõ ba ma ba gabera-Gu, tenga Ya'o zangahonogõi da'õ. Naha andrõ tebe'e ba niha si no Ihonogõi Ama-Gu."
24Me larongo ira nifahaõ si dafulu da'õ ba mofõnu sibai ira ba zi fatalifusõ si darua andrõ.
25Bõrõ da'õ Ikaoni ira fefu Yesu, Imane, "No mi'ila wa dozi samatõrõ soi si lõ fa'aboto ba dõdõ Lowalangi ba lafakao nono mbanuara. Ba dozi salaw̃a khõra lafakiko nono mbanua.
26Ba tenga si manõ khõmi. Na so ba gotaluami zomasi ebua, ba akha tobali ia ngoningonimi.
27Ba na so ba gotaluami zomasi mõi fõna, akha tobali ia sawuyumi.
28Si manõ gõi Nono Niha, tenga si mõi mangoni, no si mõi enoni, ba Itehegõ mate Ia ba wangefa'õ niha sato."
29Me larõi Yerikho, ato niha solo'õ Yesu.
30Ba zinga lala so darua niha sau'a si dadao. Me larongo Itõrõ Yesu, mu'ao ira lamane, "Ono Dawido, hakhõsi tõdõ ndra'aga!"
31Mofõnu niha sato andrõ khõra ba law̃a'õ khõra ena'õ lahonogõ ira. Ba lafuli mu'ao ebua lira, "He Tuha, Ono Dawido, hakhõsi tõdõ ndra'aga!"
32Ibatogõ Ia Yesu ba Ikaoni ira. Isofu khõra, "Hadia zomasi ami Ufalua khõmi?"
33Lamane wanema li, "He Tuha, omasi ndra'aga ma'ila niha!"
34Ahakhõ dõdõ Yesu ira, andrõ wa Ibabaya hõrõra. I'anema'õ la'ila niha. Ba la'o'õ Yesu.