Alkitab Mobile SABDA
[VER] : [NIAS]     [PL]  [PB] 
 <<  Matius 6 >> 

1"Mitõngõni, bõi milau hadia ia zinangea ba huku agama fõna niha sato ena'õ la'ila ami. Na milau zi manõ ba lõ mitema luomi moroi khõ Namami andrõ si so ba zorugo.

2Na mibe'e mbuala ba niha si numana, bõi mifehõngõhõngõ ba niha, si mane nilau niha sangosatulõ ya'ia. Lalau zi manõ ba gosali ba ba lala sebua, ena'õ lasuno ira niha. Mitõngõni, wa no latema luora ba wamalua si manõ.

3Ya'ami, na mibe'e game'ela ba zi numana, ya mibe'e ia ba zi lõ la'ila niha.

4Ena'õ lõ la'ila hadia zi no mifalua andrõ. Ba Amami andrõ si so ba zorugo zangila hadia zi no mifalua hew̃a'ae lõ la'ila niha. Ya'ia dania zanulõni khõmi da'õ fefu."

5"Na mangandrõ ami, bõi hulõ niha sangosatulõ. Omasi ira mangandrõ muzizio ba gosali ma zui ba waerua lala ena'õ la'ila ira niha. Mitõngõni, wa no latema luora ba wamalua si manõ.

6Ya'ami, na milau mangandrõ, mi'ae'e si bakha ba mbate'e ba miduhõ mbawa ndruhõ, aefa da'õ mi'angandrõ khõ Namami andrõ si lõ oroma. I'ila hadia nifaluami si lõ i'ila niha bõ'õ. Ya'ia dania zame'e luomi ba wolau si manõ.

7Na mangandrõ ami, ba bõi mi'oya'õ li si mane nilau niha si lõ aboto ba dõdõ Lowalangi. Lawalinga Ifondrondrongo Lowalangi wangandrõ sanau andrõ.

8Bõi ya si mane ya'ira ami. No I'ila hadia zoguna khõmi amami andrõ, fatua lõ ni'andrõmi nasa.

9Si mane zi sõkhinia na mangandrõ ami, 'Ama khõma si so ba zorugo: Lowalangi si ha samõsa. Nisuno ba nifosumange Ndra'ugõ.

10Ya'ugõ Razoma. Ya'ugõ zamatõrõ ba gulidanõ, ba somasi Ndra'ugõ nifalua si mane ba zorugo.

11Be'e khõma ma'õkhõ andre gõ ni'oguna'õma.

12Efa'õga ba huku hõrõ bõrõ zi fasala ya'aga, si mane fangefa'õma sala zi no fasala khõma.

13Bõi lulu ndra'aga ba wangiwa dõdõ ba ginõtõ wanandraigõ, efa'õga moroi ba wa'abõlõ zi lõ sõkhi. [Ya'ugõ Razo sabõlõ ba solakhõmi irugi zi lõ aetu. Yaduhu.]'

14Na mi'efa'õ zala niha si fasala khõmi, I'efa'õ gõi zalami Amami andrõ si so ba zorugo.

15Ba na lõ mi'efa'õ zala nawõmi, ba lõ gõi I'efa'õ zalami Amami andrõ si so ba zorugo."

16"Na fuasõ ami, bõi mifangerau mbawami hulõ niha sangosatulõ ya'ia. Lafabõ'õni nidanõ mbawara ena'õ oroma ba niha wa fuasõ ira. Mitõngõni wa no latema fefu luora.

17Ya'ami, na milau fuasõ, misasai mbawami, misukhu mbumi,

18ena'õ lõ la'ila niha wa fuasõ ami. Akha ha Amami andrõ si so ba zorugo zangila. I'ila hadia nilaumi hew̃a'ae lõ la'ila niha. Ya'ia zame'e luo khõmi."

19"Bõi mihõna khõmi harato soguna khõmi samõsa ba gulidanõ. Bõrõ me ifakiko hama ba howu harato andrõ awõ wa tola ihalõ sanagõ.

20Mi'owuloi khõmi harato ba zorugo. Bõrõ me tebai i'a hama ba howu harato andrõ, ba tebai ihalõ sanagõ.

21Bõrõ me heza so haratomi ba da'õ gõi so dõdõmi!"

22"Fandru ba mboto hõrõ andrõ. Na sõkhi hõrõmi, ba mohaga fefu mboto.

23Ba na mofõkhõ hõrõmi ba ogõmi fefu mbotomi. Tobali na ogõmi wandru andrõ si so ba mbotomi, ha wa'abõlõ wa'ogõmigõmi andrõ!"

24"Lõ tola mõi enoni zi darua sokhõ gofu haniha. Na ilau zi manõ, i'omasi'õ dania zi samõsa ba i'afõkhõi tõdõ zi samõsa. Ma zui molo'õlo'õ ia ba zi samõsa ba i'ositengagõ zi samõsa. Si manõ gõi ami. Tebai mõi ami enoni khõ Lowalangi ba enoni gana'a gõi.

25Bõrõ da'õ mitõngõni; bõi mi'abusi tõdõ sibai wa'aurimi, hadia ni'a ba nibadumi, ba hadia ni'onukhami; tõra moroi ba gõ wa'auri andrõ, tõra moroi ba nukha mboto andrõ.

26Mifaigi wofo andrõ si hombohombo ba dalu mbanua. Lõ manaru tanõmõ ira, lõ mamasi, lõ mangõhõna ba halasa. Hew̃a'ae si manõ irorogõ ira Amami andrõ si so ba zorugo! Hadia lõ abõlõ molakhõmi ami moroi khõra?

27Haniha ba gotaluami zi tola manganau'õ dõfinia bõrõ me no i'abusi tõdõ?

28Hana wa mi'abusi tõdõ nukhami? Mifaigi mbunga ladari mbõhõ andrõ si tumbu ba mbenua. Lõ mohalõw̃õ ira ba lõ managu,

29ba hiza, Razo Salomo andrõ fondrege zi kayo, lõ mamake nukha si mane fa'asõkhi mbunga andrõ!

30Ifonukha si sõkhi ndru'u ba mbenua Lowalangi, hew̃a'ae du'u andrõ tumbu ma'õkhõ ba mahemolu latibo'õ ia ba latunu. Na si manõ wamonukha Lowalangi du'u andrõ, mendrua manõ ami! Ba ya'ami, no ambõ sibai famatimi!

31Bõi mangiwa dõdõmi wanguma'õ, 'Hadia ni'ada dania', ma 'hadia nibaduda dania', ba 'ma zui hadia ni'onukhada dania'!

32Niha si lõ aboto ba dõdõ Lowalangi zangeregesi tõdõ wanõndra si manõ. Amami andrõ si so ba zorugo no I'ila wa moguna khõmi da'õ fefu.

33Tobali, si fõfõna sibai mi'alui hewisa ena'õ Lowalangi zamatõrõ fa'aurimi awõ wamalua somasi Lowalangi. Na no mi'ofõnai'õ da'õ, ba fefu dania danõ bõ'õ andrõ ba tebe'e khõmi.

34Bõrõ da'õ, bõi mibusi tõdõ zanandrõsa ba ngaluo mahemolu, bõrõ me mahemolu so zui gabula dõdõ. No abõnõ abula dõdõda zi falukha ma'õkhõ, bõi tanõnõ sa'ae."


  Share Facebook  |  Share Twitter

Download Audio MP3 (Matius 6):
Mobile (Low Quality) - CD (High Quality)

 <<  Matius 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel