Alkitab Mobile SABDA
[VER] : [NIAS]     [PL]  [PB] 
 <<  Markus 16 >> 

1Me no aefa luo Sabato, mõi ndra Maria banua Magadala, Maria ina Yakobo ba Salome ba wowõli daludalu nibe'era ba wombayoini boto Yesu.

2Sahulõ wongi sibai, ba ngaluo migu, mõi ira ba lewatõ, me tumbu luo.

3Ba dalu lala faoma lamane khõ nawõra, "Haniha zanolo ya'ita ba wamagaõlõ lagõlagõ lewatõ?" Bõrõ me wa'ebua gowe andrõ. Ba hiza, me larugi da'õ, la'ila no tegaõlõ lagõlagõ lewatõ.

4(16:3)

5Ba mõi ira bakha ba lewatõ andrõ. La'ila samõsa nono matua sobaru sanau safusi si dadao tanõ ba gambõlõ bakha ba lewatõ, ba tokea ira.

6Imane ono matua andrõ, "Bõi mi'ata'ufi! U'ila wa si mõi wangalui Yesu banua Nazareta andrõ ami, si no muforõfa. Lõ Ya'ia ba da'e. No ifuli auri Ia! Mifaigi nahia ba nibe'e Ya'ia.

7Iada'e mi'ae'e, mi'ombakha'õ duria andre ba nifahaõ-Nia, khõ Wetero gõi. Mimane, 'No Ifowaõwaõ fõnami ba Galilea. Ba da'õ mi'ila Ia dania si mane si no Iw̃a'õ khõmi!'"

8Ba mõi ira baero moroi ba lewatõ andrõ fagohi ira bõrõ wa'atokeara ba fa'ata'ura. Ba lõ la'ombakha'õ hadia ia ba niha, bõrõ wa'ata'ura.

9[Mõi ndra alawe andrõ khõ Wetero ba awõnia, latutunõ fefu zi no i'ombakha'õ khõra ono matua andrõ.]

10[Ba me no aefa da'õ, Yesu samõsa zamatenge ira nifahaõ-Nia ba wanuriaigõ i'otarai gaekhula numalõ ba gatumbukha duria-Nia ni'amoni'õ ba si lõ tebulõ andrõ, ya'ia duria wangorifi si lõ aetu.]

11[Ba me larongo wa no auri Yesu, ba wa no i'ila Ia Maria, lõ faduhu dõdõra.]

12[Ba aefa da'õ Iforoma'õ Ia Yesu ba nifahaõ-Nia si darua andrõ, me mowaõwaõ ira ba lala numalõ ba mbanua si sambua. Fabõ'õ lala wangoroma'õ-Nia Ya'ia ba khõra.]

13[Me mangawuli ira ba la'ombakha'õ hadia zalua andrõ ba nifahaõ bõ'õ. Ba hiza, lõ'õ gõi faduhu dõdõra.]

14[Ba gafuriata, I'oroma'õ Ia Yesu khõ ndra nifahaõ-Nia si felezara, me mangamanga ira. Itegu ira bõrõ wa'ambõ famati ba wa lõ faduhu dõdõra ba wamaduhu'õ niha sangila wa no auri Yesu.]

15[Ba Imane khõra Yesu, "Mi'ae mitõrõi gulidanõ ma'afefu ba mituriaigõ Duria Somuso Dõdõ andrõ soroi Lowalangi.]

16[Niha samati nibayagõ idanõ da'õ ni'orifi, ba nihuku niha si lõ mamati.]

17[Ba da'õ dandra wa mamati ira: Niha andrõ lafofanõ wa'abõlõ zi lõ sõkhi ba dõi-Gu; fahuhuo ira ba li si lõ la'ila eluaha.]

18[Na latuyu gulõ ba na labadu langu famunu ba lõ tekiko ira. Na latufa tangara niha sofõkhõ ba dõhõ wõkhõ niha andrõ."]

19[Me no aefa fahuhuo khõra Yesu, ba tefazaw̃a Ia ba zorugo. Ba da'õ mudadao Ia ba gambõlõ Lowalangi.]

20[Ba mofanõ ndra nifahaõ-Nia ba wangombakha turia soroi Lowalangi andrõ gofu heza. Ba fao gõi awõra Zo'aya ba wamaduhu'õ si fao tandra sahõlihõli dõdõ wa fangombakhara andrõ no sindruhu.]


  Share Facebook  |  Share Twitter

Download Audio MP3 (Markus 16):
Mobile (Low Quality) - CD (High Quality)

 <<  Markus 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel