Alkitab Mobile SABDA
[VER] : [NIAS]     [PL]  [PB] 
 <<  Markus 3 >> 

1Mangawuli zui Yesu ba gosali. So ba da'õ niha si mate dambai tanga.

2Ba so niha ba da'õ somasi mangalui sala Yesu, ena'õ tola la'angadugõ Ia. Bõrõ da'õ lahõrõhõrõgõ na Ifadõhõ niha ba luo Sabato.

3Muhede Yesu ba niha si mate dambai tanga andrõ, Imane, "Aine, ozizio ba da'e!"

4Isofu ba niha si so ba da'õ, "Molo'õ agama, hadia zi tola talau ba luo Sabato? Folau si sõkhi ma folau si lõ sõkhi? Manolo niha ma zui mamunu niha?" Lõ hedehedera manõ.

5Abu dõdõ Yesu, me sabe'e hõgõ ira. Ilau mofõnu Yesu, Ifaigi fasui ba Iw̃a'õ ba niha andrõ, "Oro'õ dangau." I'oro'õ dangania niha andrõ ba dõhõ dangania.

6Ba larõi gosali andrõ ira Farizai'o, mamagõlõ ira ba niha si faofao khõ Herode, ba wamunu Yesu.

7Iheta Ia Yesu awõ ndra nifahaõ-Nia moroi ba nahia andrõ numalõ ba mbanua Galilea. Ato sibai niha si otarai Galilea zi mõi molo'õ Yesu. Ato gõi zi so moroi ba Yudea,

8moroi ba Yerusalema, moroi ba mbanua Gidumea, ba tanõ yefo Yoridano awõ zi fasui banua ba Diro awõ Zidona. Mõi ira khõ Yesu, bõrõ me no larongo fefu zi no Ifalua.

9Bõrõ me ato sibai niha, andrõ Iw̃a'õ khõ ndra nifahaõ-Nia ena'õ lahalõ khõ-Nia dundraha, fabõi ladegeni Ia niha sato andrõ.

10Ato Ifadõhõ niha, ba ato nasa zi so fõkhõ sodegeni Ya'ia bõrõ me omasi ira lababaya Ia.

11Ba niha nifa'u'u geheha si lõ sõkhi, na la'ila Ia ba la'andrõ mangalulu ira fõna-Nia ba lalau mu'ao lamane, "Ono Lowalangi Ndra'ugõ!"

12Itenaw̃a sibai geheha si ra'iõ andrõ Yesu ena'õ bõi la'ombakha'õ haniha Ia.

13Aefa da'õ numalõ Yesu yaw̃a ba hili, ba Ikaoni niha somasi Ia mõi awõ-Nia. Tohare ira,

14ba I'obini moroi ba gotaluara felendrua niha, nifotõi-Nia Sinenge. Imane Yesu khõra, "Ufili ami ena'õ fao ami khõ-Gu, Ufatenge ami ba wangombakha Turia Somuso Dõdõ soroi Lowalangi.

15Ba misõndra wa'abõlõ ba wamofanõ fa'abõlõ zi lõ sõkhi."

16Da'õ dõitõi zi felendrua niha andrõ nifili Yesu: Simoni (nifotõi Yesu, Fetero),

17Yakobo ba talifusõnia Yohane iraono Zebedai'o (si fatalifusõ nibe'e Yesu tõi Boanegeresi; eluahania "ono we'ugu'ugu mbanua").

18Andrea, Filifo, Batolomai'o, Matai'o, Toma, Yakobo ono Alifai'o, Tadai'o, Simoni Fatirioti,

19ba Yuda banua Gariota si manga mbõli Yesu.

20Aefa da'õ mangawuli Yesu. Ifuli owulo niha sato, irege lõ inõtõ wemanga khõ Yesu ba ira nifahaõ-Nia.

21Me larongo õsi nomo-Nia da'õ, ba mõi ira wangai Ya'ia, bõrõ me law̃a'õ niha, "No owõhõ Ia!"

22Lamane ira sangila amakhoita soroi Yeruzalema, "No mõi khõ-Nia Mbelesebu! Salaw̃a wa'abõlõ zi lõ sõkhi da'õ zame'e khõ-Nia fa'abõlõ ba wamofanõ fa'abõlõ zi lõ sõkhi."

23Andrõ Ikaoni niha sato Yesu, Itutunõ khõra gamaedola. Imane Yesu, "Hewisa wa tola ifofanõ wa'abõlõ zi lõ sõkhi awõnia fa'abõlõ zi lõ sõkhi?"

24"Na fabali dõdõ zi sambua soi ba mowa'udu'udu, adudu dania soi andrõ.

25Na ba zi sambua omo lõ hadõi fahasara dõdõ, ba fa'udu'udu nõsi nomo, adudu dania wa'asoroiyomota andrõ.

26Si manõ gõi na bakha ba wamatõrõ geheha si lõ sõkhi so wa'afabali dõdõ awõ wa'emalisa, ba lõ aro gamatõrõw̃a andrõ ba taya dania.

27Tebai mõi niha ba nomo zabõlõ ba worabu okhõtania fatua lõ ua labõbõ zabõlõ andrõ. Aefa da'õ, awena tola larabu gokhõtania.

28Ya'aboto ba dõdõmi! Na ifazõkhi horõ niha awõ wa iw̃a'õ wehede fango'aya ba tola mu'efa'õ ia.

29Ba na i'o'aya Geheha Lowalangi, ba tebai mu'efa'õ ia! Bõrõ me fango'aya andrõ no horõ si lõ aetu!"

30(Imanõ wanguma'õ Yesu bõrõ me so niha sanguma'õ wa so geheha si lõ sõkhi khõ-Nia.)

31Aefa da'õ tohare nina Yesu awõ ndra talifusõ-Nia. Labaloi baero ba lafatenge niha ba wogaoni Yesu.

32Me inõtõ da'õ ato niha si dadao samasui Yesu. Lamane khõ-Nia, "He Ama, no so baero nina-U awõ ndra talifusõ-U, la'alui Ndra'ugõ!"

33Itema li Yesu, "Haniha nina-Gu? Haniha dalifusõ-Gu?"

34Ifakhõlõ Ia wamaigi niha si dadao ba zi fasui Ya'ia ba Imane, "Ya'e nina-Gu ba ira talifusõ-Gu!

35Niha samalua somasi Lowalangi, da'õ dalifusõ-Gu alawe, ba talifusõ-Gu matua, awõ nina-Gu!"


  Share Facebook  |  Share Twitter

Download Audio MP3 (Markus 3):
Mobile (Low Quality) - CD (High Quality)

 <<  Markus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel