Dual Panel1Ifuli mamahaõ Yesu ba zinga Mbaw̃a Galilea. Ato sibai niha sangahurufai Ya'ia. Bõrõ da'õ, mõi Ia mudadao yaw̃a ba dundraha ba dete nidanõ, ba ato niha sozizio ba zinga mbaw̃a.
2Oya wamahaõ Yesu khõra faoma amaedola. Si mane wamahaõ-Nia.
3"Mifondrondrongo! So samõsa niha samazaewe tanõmõ.
4Me ifazaewe danõmõ andrõ, so zaekhu ba zinga lala. Tohare wofo ba la'a danõmõ andrõ.
5So gõi zaekhu ba nahia sokara si so tanõ ma'ifu. Alio sibai motalinga danõmõ andrõ.
6Ba meno humaga luo, ba ibõrõgõ aleu dalinga danõmõ bõrõ me lõ abakha ikhamõ w̃a'ania ba lõ oya danõ.
7So gõi danõmõ saekhu ba gotalua za'asa'a mao. Tumbu za'asa'a mao andrõ ba ilazi'õ danõmõ si no tumbu, irege tebai mowua.
8So gõi danõmõ saekhu ba danõ satabõ. Tumbu danõmõ andrõ, ebua ba mowua ia, wa'oya mbuania: so zi tõlu ngafulu fabali mbuania, so zi õnõ ngafulu ba so zi otu kali fabali."
9Me no aefa Itutunõ gamaedola andrõ, Imane Yesu, "Na so dalingami, ba mifondrondrongo!"
10Me hatõ samõsa Yesu, ba la'ondrasi Ia samondrongo famahaõ-Nia awõ ndra nifahaõ-Nia si felendrua. La'andrõ khõ-Nia ena'õ I'ombakha'õ geluaha gamaedola andrõ.
11Imane khõra Yesu, "No mube'e khõmi wa'aboto ba dõdõ ba wangi'ila si tobini sanandrõsa khõ Lowalangi ba famatõrõ-Nia. Ba ba niha baero te'ombakha'õ faoma amaedola,
12ena'õ 'Lanehegõ sindruhundruhu, ba lõ sa la'ila hadia zalua. Lõ aetu larongorongo tõgi dalingara, ba lõ aboto ba dõdõra, ena'õ bõi la'ila ba bõi aboto ba dõdõra, ena'õ lõ mõi ira khõ Lowalangi ba I'efa'õ horõra Lowalangi.'"
13Aefa da'õ Imane khõra Yesu, "Na lõ aboto ba dõdõmi gamaedola andrõ, ba hewisa wa aboto ba dõdõmi gamaedola tanõ bõ'õ?
14Samazaewe tanõmõ andrõ ba ya'ia zamazaewe turia soroi Lowalangi.
15So ginõtõnia aekhu danõmõ andrõ ba lala, ba hulõ zamondrongo turia andrõ, me no aefa larongo ba lõ aboto ba dõdõra, ba tohare Gafõkha, ihalõ danõmõ andrõ si no mufazaewe ba dõdõra.
16Tanõmõ saekhu ba nahia sokarakara ba hulõ niha samondrongo turia andrõ, i'anema'õ itema si fao fa'omuso dõdõ.
17Ba hiza lõ mangabakha ba dõdõra duria andrõ, ba lõ mo'arota. Alua wa'afõkhõ awõ wolohi bõrõ duria andrõ, ba i'anema'õ farõi ira.
18Tanõmõ saekhu ba gotalua za'asa'a mao ba hulõ niha samondrongo turia andrõ.
19Ifakiko duria andrõ fa'aombõ dõdõ sanandrõsa ba wa'aurira, ba fa'omasi kayo, ba oya na gisõ'isõ bõ'õ si fatewu bakha ba dõdõra. Bõrõ da'õ ibunu duria soroi Lowalangi andrõ, irege lõ mowua ba dõdõra.
20Tanõmõ nifazaewe ba danõ satabõ, hulõ niha samondrongo ba sanema turia andrõ, aefa da'õ ba mowua; so zi tõlu ngafulu, so gõi zi õnõ ngafulu ba so gõi zi'otu kali fabali mbuania."
21Itohugõ wanguma'õ Yesu, "Hadia, no irai itunu wandru niha ba ibalugõ faoma karaw̃a, ma zui ibe'e tou barõ naha wemõrõ? Hadia, lõ ibe'e wandru andrõ ba nahia wandru?
22Lõ hadõi si tobini si lõ oroma dania; ba lõ si lõ mu'oroma'õ si lõ tefa'ele'õ dania.
23Bõrõ da'õ, na so dalingami ba mifondrondrongo."
24Ifuli zui muhede Yesu, "Mihaogõ wanõngõni nirongomi andre! Su'asu'a ni'anu'a'õmi ba niha bõ'õ, i'anu'a'õ gõi dania Lowalangi khõmi ba ma ladou'õ na'i khõmi.
25Bõrõ me ba niha si no so ba lanõnõ wame'e khõnia nasa dania, ba ba niha si lõ'õ, ba laheta zi no so khõnia andrõ dania."
26Itohugõ huhuo-Nia Yesu, "Na mamatõrõ Lowalangi ba tola ni'amaedolagõ hulõ zamazaewe tanõmõ ba nowinia.
27Na bongi mõrõ ia, ba maoso ia na ma'õkhõ. Ba gasagasa da'õ tumbu danõmõ andrõ ba tobali ebua. Hewisa wa tola alua da'õ, lõ i'ila niha andrõ.
28Tanõ andrõ zanga'asogõ bua, si'ofõna tõlania, aefa da'õ ba awena buania.
29Ba na no asoso gandru andrõ, ibõrõtaigõ ibasi me no irugi inõtõ wamasi."
30Isofu gõi Yesu, "Na mamatõrõ Lowalangi andrõ, faoma hadia tabe'e famaedonia? Hadia dumaduma nifakeda ba wamotokhi ya'ia?
31Na mamatõrõ Lowalangi andrõ ba hulõ danõmõ geu saw̃i, ya'ia danõmõ sabõlõ ide'ide ba zi sagõrõ ulidanõ.
32Me no aefa mutanõ danõmõ andrõ ba danõ, ba tumbu ia tobali ebua moroi ba zinanõ tanõ bõ'õ. No arawarawa ndraha irege tola manuge wofo, ba lafazõkhi gazunira ba ndrahania."
33Si manõ wama'ema Yesu turia soroi Lowalangi andrõ ba niha faoma amaedola, si tola aboto ba dõdõra.
34Lõ mamalõ Ilau gamaedola Yesu na Ifahaõ niha sato andrõ. Ba na ha Ya'ia awõ ndra nifahaõ-Nia, Ihaogõ wamotokhi khõra fefu.
35Me tanõ owi da'õ, muhede Yesu khõ ndra nifahaõ-Nia, "Mitabu woloyo si yefo mbaw̃a."
36Ba mõi yaw̃a ba dundraha ndra nifahaõ Yesu -- no ofõna so Yesu yaw̃a ba dundraha andrõ -- ba larõi niha sato ba zinga mbaw̃a. Mofanõ Yesu awõ ndra nifahaõ-Nia. So gõi dundraha bõ'õ ba da'õ.
37Lõ ara aefa da'õ tohare nangi sabõlõbõlõ. Ibõrõtaigõ ibõzi dundraha dulu ba mõi nidanõ yaw̃a ba dundraha, arakha afõnu.
38Ba gi'o dundraha andrõ no Ilau mõrõ Yesu, no Ileagõ hõgõ-Nia yaw̃a ba dandraya. Lasusugi Ia ira nifahaõ-Nia. Lamane, "He Guru, hadia lõ ba dõdõ-U, tekiko ita?"
39Maoso Yesu, Itenaw̃a nangi andrõ ba Imane ba mbaw̃a andrõ, "Bato, honogõ'õ!" Tebato nangi, ba tobali ahono sibai mbaw̃a.
40Aefa da'õ, Imane Yesu khõ ndra nifahaõ-Nia, "Hana wa ata'u ami? Hana wa lõ faduhu dõdõmi khõ-Gu?"
41Oi ata'u ndra nifahaõ Yesu ba faoma lamane khõ nawõra, "Haniha sindruhinia niha andre, irege la'o'õ li-Nia angi ba dulu!"