Alkitab Mobile SABDA
[VER] : [NIAS]     [PL]  [PB] 
 <<  Markus 8 >> 

1Lõ ara aefa da'õ, ba so zui niha sato sowulo. Bõrõ me lõ õ khõra, Ikaoni ndra nifahaõ-Nia Yesu ba Imane,

2"Ahakhõ dõdõ-Gu wamaigi niha andre. No tõlu ngaluo ira ba da'e fao ira awõ-Gu, ba iada'e lõ õ khõra sa'ae.

3Na mofanõ ira mangawuli lõ si manga, alai na awuwu dõdõra ba dalu lala. Mendrua manõ me so ba gotaluara zoroi ba zarõu."

4Lamane ira nifahaõ-Nia, "Ba nahia si no arõu andre, heza musõndra gõ soguna ba niha sato?"

5Isofu khõra Yesu, "Ha wa'oya roti si so khõmi?" Lamane, "Ha fitu ngawua!"

6Ifaw̃a'õgõ Yesu ena'õ mudadao niha sato andrõ ba danõ, ba Ihalõ zi fitu ngawua roti, I'andrõ saohagõlõ khõ Lowalangi. Iboboto roti andrõ ba Ibe'e khõ ndra nifahaõ-Nia ena'õ lafaosa ba niha sato. Ba lalau zi manõ ira nifahaõ-Nia.

7Ba so khõra gi'a si gide'ide ma'ifu. I'andrõ saohagõlõ khõ Lowalangi Yesu ba gi'a andrõ ba Ibe'e khõ ndra nifahaõ-Nia ena'õ lafaosa ba niha sato.

8Ba manga fefu niha irege abuso, so mato õfa ribu niha.

9Ba la'owuloi zi torõi gõ andrõ ira nifahaõ Yesu ba fitu ragaraga afõnu. Ba Ifofanõ niha sato andrõ Yesu,

10ba Ya'ia awõ ira nifahaõ-Nia numalõ yaw̃a ba dundraha mõi ba danõ Dalamanuta.

11Tohare ndra Farizai'o khõ Yesu, labõrõtaigõ fada'aw̃a khõ-Nia ba wanandraw̃aisi Ya'ia. La'andrõ khõ Yesu wamazõkhi tandra sahõlihõli dõdõ si tobali tandra wa khõ Lowalangi I'otarai.

12Ihasugõ Ia Yesu ba Itema li, "Hadia mbõrõ wa la'andrõ Ufazõkhi dandra sahõlihõli dõdõ niha ba gõtõ andre? Lõ'õ! Lõ Ube'e khõra dandra!"

13Irõi ira Yesu, ba mõi Ia yaw̃a ba dundraha; mofanõ Ia I'õtõ mbaw̃a.

14No olifu ndra nifahaõ Yesu wolohe roti sabõnõ khõra. Ha sambua ngawua roti khõra si so ba dundraha.

15Imane khõra Yesu, "Mi'angelama ba laru ndra Farizai'o, awõ ba laru Herode."

16Ba ibõrõtaigõ lafahuhuosi da'õ ira nifahaõ Yesu. Lamane, "Iw̃a'õ zi manõ bõrõ me lõ khõda roti."

17I'ila Yesu hadia nifatunõra. Bõrõ da'õ Isofu khõra, "Hana wa mi'amatunõisi wa lõ ni'ohemi roti? Hadia lõ nasa aboto ba dõdõmi? Hadia no afuru gera'erami?

18So hõrõmi -- ba hana wa lõ mi'ila? So dalingami -- ba hana wa lõ mirongo? Hadia lõ itõrõ tõdõmi,

19zi lima ngawua roti andrõ niboboto-Gu õ zi lima ribu niha? Ba ha wa'oya ragaraga tõ zi torõi ni'owuloimi?" Lamane, "Felendrua ragaraga."

20Itohugõ wanguma'õ Yesu, "Ba me Uboboto roti õ zi õfa ribu niha, ha wa'oya zi torõi ni owuloimi?" Lamane, "Fitu ragaraga tõ."

21Imane Yesu, "Na si manõ, hadia lõ nasa saboto ba dõdõmi?"

22Me larugi Mbetisa'ida, ba la'ohe khõ Yesu niha sau'a. La'andrõ khõ-Nia ena'õ na Ibabaya niha sau'a andrõ.

23Igogohe danga niha sau'a andrõ Yesu ba I'ohe ia baero mbanua. Aefa da'õ Idiloi hõrõ niha da'õ ba Ifazaw̃a danga-Nia ba hõgõ. Isofu khõnia Imane, "Hadia, õ'ila hadia ia iada'e?"

24Ifaigi si yaw̃a niha da'õ imane, "Ya'ia. U'ila niha hulõ dõla geu sofanõfanõ."

25Ifuli Ibabaya hõrõ niha andrõ Yesu. Awena tola i'ila niha. Dõhõ hõrõnia ba tola tara wangilania sa'ae.

26Ifofanõ ia Yesu ba Imane khõnia, "Bõi angawuli sa'ae ba mbanua."

27Ba mofanõ Yesu awõ ndra nifahaõ-Nia ba mbanua misa ba zi fasui Kaizarea-Filifi. Me so ira ba dalu lala Isofu Yesu khõ ndra nifahaõ-Nia, "Molo'õ fanguma'õ niha, haniha Ndra'odo andre?"

28Latema li lamane, "So zanguma'õ Yohane Samayagõ Idanõ Ndra'ugõ; so gõi zanguma'õ Elia, ba tanõ bõ'õ law̃a'õ: samõsa moroi ba gotalua ndra sama'ele'õ!"

29Isofu khõra Yesu, "Ba molo'õ ya'ami, haniha Ndra'odo andre?" Itema li Fetero, imane: "Keriso andrõ Ndra'ugõ!"

30Ba Itenaw̃a ira Yesu gõi sanandrõsa ba khõ-Nia, ena'õ bõi la'ombakha'õ gofu ha'õkhõ.

31Aefa da'õ, Ibõrõtaigõ mamahaõ Yesu khõ ndra nifahaõ-Nia wa Ono Niha andrõ, lõ tola lõ'õ oya Itaõgõ wamakao. Lafa'uduni Ia ira salaw̃a ba ere sebua awõ ndra sangila amakhoita. Labunu Ia, ba na no irugi tõlu ngaluo aefa da'õ, ifuli auri Ia.

32Ihaogõ sibai wangombakha da'õ Yesu khõ ndra nifahaõ-Nia. Ba isõbi Yesu ba zingania Fetero, itenaw̃a Ia.

33Ba Ibali'õ Ia Yesu Ifaigi ndra nifahaõ-Nia, ba mofõnu Ia khõ Wetero. Imane Yesu, "Ofanõ ba da'e, Sanandraigõ! Fangerangeramõ andrõ no fangerangera niha; tenga fangerangera Lowalangi!"

34Aefa da'õ Ikaoni niha sato si so ba da'õ awõ ndra nifahaõ-Nia. Imane khõra, "Na so zomasi molo'õ Ya'o, ba ya mu'ositengagõ gomasiõ dõdõnia, ya mulu'i rõfania, ba ya mu'o'õ Ndra'o.

35Bõrõ me niha sedõna manganau'õ nosonia, da'õ dania zaetu noso. Ba niha solulu fa'aurinia khõ-Gu soguna ba Duria Somuso Dõdõ andrõ soroi Lowalangi, da'õ zanõndra fangorifi nosonia.

36Hadia hare ba niha, na i'okhõgõ zi sagõrõ ulidanõ andre, ba na te'ala ia nosonia? Tatu lõ hare khõnia.

37Hadia ia zi tola ibe'e niha hõli nosonia?

38Na so zaila wamaduhu'õ Ya'o awõ wamahaõ-Gu ba ginõtõ si lõ sõkhi andre, ba aila gõi Nono Niha wamaduhu'õ niha andrõ, na inõtõ so Ia dania si fao fa'abõlõ Nama-Nia, fao awõ-Nia ndra mala'ika Ni'amoni'õ."


  Share Facebook  |  Share Twitter

Download Audio MP3 (Markus 8):
Mobile (Low Quality) - CD (High Quality)

 <<  Markus 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran