Dual Panel1Bõrõ wa'afaduhu dõdõda wa sõkhi mangawuli gamakhaitada khõ Lowalangi iada'a. Bõrõ da'õ wa auri ita ba wa'ohahau dõdõ khõ Lowalangi, ba khõ Zo'aya ya'ita Yesu Keriso.
2Bõrõ Ia awõ wa'afaduhu dõdõda wa tola tarasoi wa'omasi Lowalangi, ba bõrõ wa'omasi da'õ wa auri ita iada'a. Bõrõ da'õ, omuso dõdõda me so wanõtõnada wa falukha ita lakhõmi Lowalangi!
3Ba si tõra moroi ba da'õ, omuso gõi dõdõda bakha ba wamakao, bõrõ me aboto ba dõdõda wa famakao zolohe niha ba wa'aro dõdõ,
4ba fa'aro dõdõ zangabõlõ'õ niha ba wanaha fanandraigõ; da'e zamatumbu'õ fanõtõna.
5Lõ ifatõ dõdõda fanõtõna si mane, bõrõ me no Ifo'õsi ita faoma fa'omasi-Nia Lowalangi. Ifalua da'õ Lowalangi ba Geheha-Nia, si no Ibe'e khõda.
6Ba ginõtõ lõ fa'abõlõda, ba no mate Keriso bõrõ ita, tefaudu ba ginõtõ si no Ihonogõi Lowalangi; hew̃a'ae no arõu ita khõ-Nia.
7Abua sibai gõlõ zi samõsa niha sa wa'amate salahi niha, he salahi zatulõ tõdõ na'i. Awai i, ma gõi so niha sanehegõ mate salahi niha si sõkhi buabua.
8Ba hiza, Iforoma'õ wa'omasi-Nia khõda Lowalangi, ya'ia me mate Keriso salahida, me niha si so horõ ita nasa.
9Ba iada'e no satulõ gamakhaitada khõ Lowalangi bõrõ wa'amate Keriso andrõ; bõrõ da'õ ha ba ni'efa'õ ita gõi moroi ba wõnu Lowalangi andrõ bõrõ Keriso.
10Na ba ginõtõ fa'udu ita khõ Lowalangi te'atulõ'õ ita khõ-Nia ba wa'amate Nono-Nia, mendrua manõ iada'e me no sõkhi mangawuli gamakhaitada khõ Lowalangi, tatu te'orifi gõi ita bõrõ Keriso.
11Ba si tõra moroi ba da'õ, omuso gõi dõdõda bõrõ wa'asõkhi dõdõ Lowalangi ba khõ Zo'aya ya'ita Yesu Keriso. Bõrõ Yesu Keriso, wa tasõndra gamakhaita si sõkhi khõ Lowalangi.
12Bõrõ niha si samõsa wa so horõ ba gulidanõ, ba moroi ba horõ andrõ tumbu wa'amate. Lualua, ikhamõ niha fefu fa'amate, bõrõ me si so horõ fefu niha.
13No so horõ ba gulidanõ, fatua lõ mube'e huku agama Yahudi. Ba lõ mu'ila mu'etu'õ huku bõrõ me lõ goigoi nisawõ.
14No ifatõrõ fefu niha fa'amate i'otarai ginõtõ Gadamo irugi ginõtõ Moze. Ifatõrõ gõi fa'amate niha si lõ mamalua horõ si mane nilau Gadamo. Adamo ba no khalakhala-Nia, si tohare dania.
15Ba hiza, lõ fagõlõ zi darua andrõ; abõlõ ebua wa'ahakhõ dõdõ Lowalangi moroi ba horõ nifalua Gadamo andrõ. Bõrõ horõ zi samõsa wa mate zato. Ba hiza, abõlõ ebua nasa zinõndra bõrõ wa'ahakhõ dõdõ Lowalangi ba buala fa'auri nibe'e-Nia ba niha soya, bõrõ wa'asõkhi dõdõ zi samõsa andrõ, Yesu Keriso.
16Abõlõ ebua nasa mbuala Lowalangi andrõ moroi ba horõ zi samõsa andrõ. Bõrõ me no ilau horõ si samõsa niha, ba mu'etu'õ huku, "Fasala". Ba me no ato niha samazõkhi horõ, so wa'ahakhõ dõdõ Lowalangi wanguma'õ, "Lõ fasala".
17Bõrõ zala zi samõsa, ikhamõ fa'amate fefu niha bõrõ zi samõsa andrõ. Ba abõlõ ebua nasa nilau zi samõsa tanõ bõ'õ ba niha sato, ya'ia Yesu Keriso. Ibe'e khõra irege fahõna wa'ahakhõ dõdõ-Nia Lowalangi ba I'efa'õ niha moroi ba zala lõ sulõ; mamatõrõ ira ba gulidanõ andre bõrõ Keriso.
18Hiza, si mane bõrõ zala zi samõsa tehuku fefu niha, si manõ gõi bõrõ gamuata zi samõsa solo'õ somasi Lowalangi wa te'efa'õ fefu niha moroi ba golalõw̃a ba tebe'e khõra wa'auri.
19Ba si mane bõrõ wa lõ folo'õ ba zi samõsa mamalua horõ fefu niha, si manõ gõi bõrõ wolo'õ zi samõsa khõ Lowalangi wa tola te'a'azõkhi mangawuli gamakhaita niha sato khõ Lowalangi.
20Lowalangi samõsa zame'e huku agama Yahudi. Ba hiza itugu la'o'õ huku andrõ niha, itugu lasawõ ba lafalua horõ khõ Lowalangi. Hew̃a'ae si manõ, itugu lafalua horõ niha, ba lõ mamalõ wangomasi'õ Lowalangi ya'ira.
21Ba itugu lafalua horõ niha, itugu I'omasi'õ ita Lowalangi. Ba me no sõkhi mangawuli gamakhaitada Lowalangi, Ibe'e khõda wa'auri sindruhundruhu bõrõ Yesu Keriso, So'aya ya'ita.