Dual Panel1Ba me no aefa da'õ ba urongo zi hulõ li niha sato ba zorugo sanguma'õ, "Misuno Lowalangi! Lowalangida ba no Lowalangi sangorifi; Ya'ia Lowalangi solakhõmi ba sabõlõ!
2Satulõ ba satuatua wanguhuku-Nia andrõ! No Ihuku zohorõ sebua andrõ, samakiko ulidanõ ba wohorõnia. No Ihuku zohorõ andrõ Lowalangi, bõrõ me no ibunu genoni Lowalangi."
3Ba law̃a'õ zui li niha sato andrõ, "Nisuno Lowalangi! Simbo galitõ sokhozi banua sebua andrõ numalõ miyaw̃a lõ tebatobato!"
4Ba sondrõnia'õ andrõ si dua wulu a õfa ba saliw̃aliw̃a ba danõ andrõ si õfa nga'eu latuhi danõ ba lafalõgu tou ira ba wangalulu khõ Lowalangi si dadao yaw̃a ba dadaoma andrõ. Ba lamane, "Yaduhu! Nisuno Lowalangi!"
5Ba terongo moroi ba dadaoma andrõ li sebua sanguma'õ, "Misuno Lowalangi! Ya'ami enoni Lowalangi fefu, ba niha fefu -- sebua awõ zigide'ide -- sangalulu khõ Lowalangi, misuno Lowalangi!"
6Me no aefa da'õ ba urongo zi hulõ li niha sato sibai; linia ba hulõ we'ugu'ugu ndrulu ba fe'ugu'ugu mbanua sabõlõbõlõ. Ba urongo lamane, "Misuno Lowalangi! Bõrõ me So'aya, Lowalangida Sabõlõ andrõ zamatõrõ iada'e!
7Da ta'omusoi'õ dõdõda ba ta'owuawua'õ dõdõda; ba da tasuno wa'ebua-Nia andrõ! Bõrõ me no irugi luo walõw̃a Nono Mbiribiri andrõ, ba no ifa'anõ ia ni'owalu ba walõw̃a-Nia.
8Ba no tebe'e khõnia muko si takile ena'õ ifake." (Nukha muko andrõ ya'ia ngawalõ wolau si sõkhi nifalua mbanua Lowalangi.)
9Ba imane khõgu mala'ika andrõ, "Sura da'e: 'Ya'ahowu niha si no mukaoni ba walõw̃a Nono Mbiribiri andrõ.' "Aefa da'õ inõnõ nasa mala'ika andrõ wanguma'õ, "Da'e Duria sindruhu moroi khõ Lowalangi."
10Ba utuhi danõ ufalõgu tou ndra'o fõna mala'ika andrõ ba wangalulu khõnia, ba imane khõgu, "Bõi! Bõi angalulu khõgu, khõ Lowalangi angalulu! Bõrõ me ya'odo gõi enoni si mane ya'ugõ ba si mane ira talifusõu fefu si no mololohe turia sindruhu andrõ nifa'ema Yesu!" Bõrõ me same'e fama'ele'õ khõ ndra sama'ele'õ no turia sindruhu andrõ nifa'ema Yesu.
11Aefa da'õ ba u'ila teboka zorugo, ba oroma sageu kudo safusi. Si fakudo yaw̃a khõnia ba Si lõ Farõi ba Sindruhu. Ba atulõ Ia ba wangetu'õ huku ba ba wasuwõta nifalua-Nia.
12Hõrõ-Nia hulõ holahola galitõ ba ba hõgõ-Nia oya Ifake dakula. Ba no musura ba mboto-Nia sambua dõi; ba ha Ya'ia samõsa zangila tõi da'õ.
13Ba baru nifake-Nia no mu'ungugõ ba ndro. Ba latõtõi Ia "Taroma Li Lowalangi".
14Ba la'o'õ Ia saradadu wanuwõ ba zorugo, fakudo ira ba hulu kudo safusi, ba muko safusi si sõkhi nukhara.
15Ba moroi ba mbawa-Nia i'otarai sara wõda satarõ, ba faoma fõda da'õ I'alani dania soi fefu, Ifatõrõ dania ira faoma si'o si'õli. Ifera'õ dania nagu bakha ba wolazi nagu, fõnu Lowalangi Sabõlõ.
16Ba no musura ba mbaru-Nia ba ba waha-Nia dõi andre, "Razo yaw̃a razo, ba So'aya sokhõ."
17Ba u'ila samõsa mala'ika si zizio yaw̃a ba dete luo. Ba mu'ao ia si fao fa'ebua li ba wofo fefu si hombo ba dalu mbanua, "Mi'aine mi'owuloi ami ba wangondrasi owuloa sebua khõ Lowalangi!
18Mi'aine ba wemanga nõsi ndra razo, awõ nõsi ndra bohalima, ba õsi ndra sagabõlõ; mi'aine ba wemanga õsi ndra si fakudo awõ nõsi kudonia, ba õsi soi niha ma'afefu, sebua awõ zide'ide, sawuyu ba niha si no mu'efa'õ!"
19Aefa da'õ ba u'ila gurifõ andrõ, ba razo ba gulidanõ, awõ ndra saradadu wanuwõ khõra, la'owuloi ira ba wanuwõ, ba wolaw̃a si fakudo ba kudo safusi andrõ awõ ndra saradadu wanuwõ khõ-Nia.
20Ba tera'u gurifõ andrõ awõ ndra sama'ele'õ sofaya si no mamazõkhi tandra sahõlihõli dõdõ fõna gurifõ andrõ. (Faoma tandra sahõlihõli dõdõ andrõ ifaelungu urifõ andrõ niha si so tandra gurifõ andrõ, awõ niha si no mangalulu ba nadu gurifõ andrõ.) Ba tetibo'õ auri gurifõ awõ zama'ele'õ sofaya andrõ ba mbawa galitõ si holahola ba talõ balera.
21Ba nibunu zaradadu wanuwõ khõra faoma fõda si otarai mbawa zi fakudo ba kudo safusi andrõ. Ba tohare wofo fefu ba la'a nõsi nibunu andrõ.