Dual Panel1Aefa da'õ ba u'ila ba danga kambõlõ zi dadao ba dadaoma andrõ, so sambua mbuku si mane gõlugõlu garate. Buku andrõ no afõnu sinura fatambatambai. Gõlugõlu mbuku andrõ no mufotandro, fitu dandronia.
2Ba u'ila samõsa mala'ika sabõlõ, si'ao'ao si fao fa'ebua li, "Haniha zi nangea mamokai tandro andre ba samokai buku andre?"
3Ba hiza, he ba zorugo, ba he gõi ba gulidanõ, ba ma barõ danõ, samõsa lõ tesõndra gõi zi tola mamokai buku andre, ba wamaigi õsinia bakha.
4Ba mege'ege adõ'udõ'u ndra'odo bõrõ me lõ hadõi samõsa gõi zinangea mamokai buku andrõ, ba wamaigi õsinia bakha.
5Ba so samõsa moroi ba zondrõnia'õ andrõ zanguma'õ khõgu, "Bõi e'e! Hiza! No mõna zingo moroi ba soi Yehuda, ma'uwu Dawido. Tola Ia ba wamokai tandro si fitu andrõ ba ba wamokai buku andrõ."
6Aefa da'õ ba u'ila sageu Nono Mbiribiri si zizio ba gotalua dadaoma andrõ, nifasui zi õfa nga'eu saliw̃aliw̃a ba danõ ba fefu zalaw̃a sondrõnia'õ andrõ. Ono mbiribiri andrõ fa'oroma-Nia hulõ zi no mutaba. So fitu dandru ba fitu hõrõ: ya'ia Geheha, Lowalangi andrõ si fitu si no mufatenge ba gulidanõ ma'asagõrõ.
7Aefa da'õ mõi fõna Nono Mbiribiri andrõ, Ihalõ nga'õlu mbuku andrõ moroi ba danga kambõlõ niha si dadao yaw̃a ba dadaoma andrõ.
8Fatua Ilau zi manõ Ono Mbiribiri andrõ, ba latuhi danõ si õfa nga'eu saliw̃aliw̃a ba danõ andrõ ba si dua wulu a õfa zalaw̃a sondrõnia'õ andrõ fõna-Nia. Ero samõsa zalaw̃a sondrõnia'õ andrõ no lagogohe kezafi ba mako ana'a so'õsi kumõyõ, ya'ia da'õ fangandrõngandrõ Mbanua Lowalangi andrõ.
9La'anunõisi sambua zinunõ si bohou: "Sinangea Ndra'ugõ ba wangai buku andrõ ba ba wamokai tandronia. Bõrõ me no mutaba Ndra'ugõ, ba ba wa'amate-Mõ andrõ, no Õhõli niha khõ Lowalangi, moroi ba ngawalõ mado fefu, ba moroi ba ngawalõ li, ba moroi ba ngawalõ soi, ba moroi ba ngawalõ niwa fefu.
10No Õbali'õ ira sambua soi ere nifõfõgõ, ena'õ mõi ira enoni Lowalangida, ba mamatõrõ ba gulidanõ."
11Aefa da'õ ba u'ila nasa. Urongo li mala'ika sato, ba ngahõngahõnõ ba ba zutazuta wa'atora! No musindro ira wamasui dadaoma andrõ ba si õfa nga'eu saliw̃aliw̃a ba danõ awõ ndra salaw̃a sondrõnia'õ andrõ.
12Ba manunõ ira si fao fa'ebua li, "Ono Mbiribiri si no mutaba andrõ, no sinangea ba wanema famatõrõ, fa'akayo, fa'atuatua ba fa'abõlõ; no sinangea nifosumange Ia, nifolakhõmi ba nisunosuno!"
13Aefa da'õ ba urongo fefu zaliw̃aliw̃a ba mbanua si yaw̃a ba ba gulidanõ, ba barõ danõ ba ba nasi -- amarahutania fefu zaliw̃aliw̃a ba gõlia ulidanõ andre -- manunõ, "Ya'ia si dadao yaw̃a ba dadaoma andrõ, ba Ono Mbiribiri andrõ, no nisuno ba nifosumange awõ wa nifolakhõmi ba sabõlõ sagõtõ fa'ara!"
14Ba latema li saliw̃aliw̃a ba danõ andrõ si õfa nga'eu, lamane, "Yaduhu!" Ba sondrõinia'õ andrõ si dua wulu a õfa latuhi danõ ba mangalulu.