Alkitab Mobile SABDA
[VER] : [NIAS]     [PL]  [PB] 
 <<  Yakobus 5 >> 

1Ya'ami ira talifusõgu si kayo! Mifondrondrongo menemenegu. Mi'e'e ba mi'ange'esi me itõrõ ami fa'afõkhõ wamakao.

2No obou gokhõtami, no i'a hama nukhami.

3Ana'a ba firõmi no i'a howu, howunia andrõ dania sasi solaw̃a ya'ami ba si manga õsimi si mane alitõ. No mihõna khõmi girõgirõ ba luo safuria andre.

4Lõ nibe'emi luo zohalõw̃õ ba nowimi. Fondrondrongo wangarõngarõra iada'e. Fefu niha sangozaragõ bua nowimi, mu'ao ira ba wangandrõ fanolo. Ba fangarõngarõra no irugi dõgi dalinga Lowalangi, So'aya Fondrege Zabõlõ.

5No mi'owuawua'õ dõdõmi ba no mirasoi wa'ohahau dõdõ ba gulidanõ andre. Hulõ no mibula ami ba wamaondragõ ngaluo wanaba ya'ami.

6Mihuku ba mibunu niha si lõ sala, ba lõ lalaw̃a ami.

7Bõrõ da'õ, mibologõ dõdõmi ya'ami ira talifusõ irugi we'aso Zo'aya. Mifaigi hewisa wa'ebolo dõdõ zonowi wombase'õ bua danõ sebua bõli khõnia. Fao fa'ebolo dõdõ ibase'õ deu mbaw̃a wangaruwu, ba teu mbaw̃a wobene.

8Mibologõ dõdõmi ba mi'ebua'õ dõdõmi me no ahatõ we'aso Zo'aya.

9Bõi mifawõtuwõtu ba bõi faoma fatahi ami khõ nawõmi, ena'õ bõi Ihuku ami Lowalangi. Hiza! So Zanguhuku, no ahatõ.

10Ya'ami ira talifusõ, mitõrõ tõdõmi zama'ele'õ andrõ si no mama'ele'õ ba dõi Zo'aya. Ebolo dõdõra ba lataõgõ wamakao. Mihalõ famaedo ira khõmi.

11Latõtõi ira sohahau tõdõ me no lataha dõdõra. No mirongo wa'ebolo dõdõ Yobi, ba no mi'ila hewisa wamahowu'õ Zo'aya ya'ia ba gafuriata. Me no sahakhõ sibai tõdõ ba si sõkhi tõdõ Zo'aya andrõ.

12Si ofõna sibai ya'ami ira talifusõ, bõi mi'ae'e ba hõlu, bõi mibe'e hõlu mbanua si yaw̃a ba he gõi tanõ, ba ma hadia ia mbõ'õnia. Miw̃a'õ manõ "Ya'ia" na ya'ia ba "Lõ'õ" na lõ'õ, fa bõi I'etu'õ hukumi Lowalangi.

13Na so ba gotaluami zi gõna fangabu dõdõ ba ya mangandrõ ia. Na so zomuso tõdõ ba ya manunõ ba wanuno Lowalangi.

14Na so zofõkhõ ba ya mukaoni zatua ba mbanua Niha Keriso, ya mangandrõ zatua andrõ salahi zofõkhõ, ba mubayoini ia fanikha ba dõi Zo'aya.

15Fangandrõ nifa'ema si fao fa'afaduhu dõdõ, Ifadõhõ zofõkhõ andrõ So'aya ba I'efa'õ horõ nifazõkhinia.

16Bõrõ da'õ faoma mi'ombakha'õ horõmi ba faoma mi'angandrõ salahi nawõmi, ena'õ tefadõhõ ami. Mofa'abõlõ wangandrõ niha solo'õ somasi Lowalangi.

17Elia andrõ ba no niha si mane ya'ita gõi. No mangandrõ ia moroi si'aikõ ba dõdõ ena'õ bõi moteu, ba lõ teu ba danõ me dõlu fakhe a matonga wa'ara.

18Aefa da'õ, ifuli mangandrõ zui, ba so deu moroi yaw̃a ba mbanua irege mowua danõ.

19Ira talifusõgu! Na so ba gotaluami zi lõ molo'õ famahaõ si otarai Lowalangi, ba na so zolohe ya'ia mangawuli khõ Lowalangi,

20mitõrõ tõdõmi niw̃a'õ andre: Niha solohe mangawuli niha samazõkhi horõ moroi ba lala elungua, i'orifi niha samazõkhi horõ andrõ moroi ba wa'amate, ba i'a'asogõ wangefa horõ.


  Share Facebook  |  Share Twitter

Download Audio MP3 (Yakobus 5):
Mobile (Low Quality) - CD (High Quality)

 <<  Yakobus 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel