Alkitab Mobile SABDA
[VER] : [SANGIR]     [PL]  [PB] 
 <<  1 Korintus 9 >> 

1Lẹ̌ěnaěng, iạ e wal᷊inewe taumatan karal᷊iwirẹ̌ ngae? Arau ěnnaěng iạ e kai wal᷊inewe rarolohang? Iạ e kai tawe nakasilo ho tangu! Si Yesus, Mawung kitẹ? Unụ e i kamene kai wal᷊inewe lěnnạu munaraku e waugu Mawu tangu?

2Kamagengbeng i sire wal᷊ine e kawe tawe mangakung iạ e kai rarolohang, ute mẹ̌těngkakadọdọ i kamene mangaku wue ene! U pẹ̌bawiah'i kamene tau Sahani e ute kai tatialang iạ e kai sěngkatau rarolohang.

3Kereu taumata e měmpaněngkul᷊ẹ̌ si siạ, ute iạ kai sumimbang kere ini:

4Iạ e kai tạ hinone makatarimạ u kakaěng dingangu lainung ual᷊ingu munaraku?

5Iạ e kai ta hinone mẹ̌bawa sěngkatau wawine kawingu taumatan Sahani e sěngkaral᷊eng dingangku kere su manga tuarin Mawu Yesus dingangu manga rarolohang bal᷊ine e, kere i Petrus?

6Arau kai i kanduan Barnabas kapapianẹ e mědeạ biahẹ̌ hala e tangu?

7Tawẹ bẹ̌ke sordado e mangongkosẹ̌ batangenge sẹ̌sane su ral᷊ungu wuntuangu mẹ̌sasekẹ e! Tawẹ apa mělahěnsinuange mẹ̌suang anggorẹ̌ e su waele kụ tamakakaěng buane! Tawẹ apa mělal᷊ukadu domba e, kụ tawe měnganginung susu wọu manga dombane!

8Iạ e maul᷊ị u ini e wal᷊inewe kětạu itẹ̌tuhụ tundu ěllo-ěllo, kaiso kawe lai ual᷊ingu pẹ̌paul᷊ikangu Winohẹ Susi e.

9Su ral᷊ungu bukẹ̌ i Musa e kạbawohẹ u, "Kereu sapi e kapẹ̌dal᷊indane gandung pạnontongang buane wọu wul᷊ihe ute, kumbahangbe hakutang mohonge." Kai mẹ̌sẹ̌mpị sapi e tangu Mawu Ruata?

10Arau kai ene ngae timonane si kitẹ? Těngadẹ̌ bue ene e niwohẹ baụgi kitẹ. U taumata mẹ̌bawaele ringangu měmamurẹ̌sine gandung e sembeng hinone mẹ̌karadiahang dingangu pělaharapẹ̌ mědeạu makatarimạu sěngkamonaěng bọu něnggạ u hal᷊ẹ̌ e.

11I kami e seng něnawuhu wineng marohkẹ̌ si kamene. Tangu kamageng i kami e makapaměnsạ, bọu rarotong i kamene, ute měnsang i kami e mạnuntụ něngalembong kal᷊awọe wọ'i kamene?

12Kamageng taumata wal᷊ine e nakapẹ̌tambaweng kawasa ini e si kamene, ute kai wal᷊inewe i kami e něngalembo l᷊ai piạ hakẹ̌ e wọu i sire tangu? Kai iạ e wẹ̌dawen tawẹ nẹ̌pakẹu kawasa ene. Kaiso iạ e maěndokangbe měnal᷊udẹ̌ patikụ e sul᷊ungkeng iạ e makakoạ sasahaghe su pělahabaru Injili Kristus e.

13I kamene tantu masingkạ bue u isain měmunara su ghaheda něnarimạ u pẹ̌bawiah'i sire wọu ghaheda. Dingangu i sain měngangurusẹ̌ sasěmba e, makareạbe wahageange wọu sasěmba nisarakang sene.

14Kerene lai Mawu e seng něnilakehẹ̌ u taumata apam měmpělẹ̌habaru hengetang e hinong makaěbạ biahe wọu pělahabarẹ̌ ene.

15Kaiho iạ mamben tawẹ nẹ̌pẹ̌pakẹ u tamai ene sarang kadidị. Dingangu iạ e namohẹ u ini e wal᷊inewe lai iạ piạ kapulu tadeạu kěbị-kěbị ene e koateng si siạ e. U iạ ěndobem mate, sul᷊ungu kailangeng u apan makạl᷊ahimpulu si siạ e.

16U, kereu měhabaru Injilẹ̌ e, ute iạ tawe hinone lumesạ u watangeng batụu Mawu Ruata e seng něngoro pẹ̌kẹ̌koạ ene. Kụ kaěngkěhang iạ e, kereu iạ tawe měhabaru Injilẹ̌ e!

17Andene kapuluwen naungku e měkoạbe ene ute iạ e makaěbạbe tatendenge. Kai iạ něhabaru Injilẹ̌ e watụ u kai pẹ̌tatangkiang niumbala si siạ. Iạ e piněnarakanengu Mawu Ruata e pěděndal᷊engu ene.

18Kamageng kerene ute, apa wue tangu tatendenge si siạ? Kai ini e tatendenge: U iạ e makapěluntingihu Injilẹ̌ e tawe makakawěhạ si sai-sai kụ hinong měmaehẹ̌ si siạ, u iạ e tawe manuntụ apa-apa kere sěngkatau mělahabaru Injilẹ̌ e.

19Iạ ini e wal᷊inewe ěllang i sai-sai; watụ u iạ e kai taumata měngkate kere ěllangu kěbị. Iạ e měkẹ̌koạ kere tadeạu iạ e makauntuwe sěngapang kakěpal᷊e waug'i Kristus.

20Baugu tau Yahudi e, iạ e mẹ̌těngkakoạ kere tau Yahudi e, tadeạu iạ makawitaugẹ̌ tau Yahudi baug'i Kristus. Baugu taumata mẹ̌bẹ̌biahẹ̌ tutuhụ torat'i Musa e, iạ e nẹ̌těngkasul᷊ung i sire al᷊ingkai wẹ̌dang mạsasěllung su toratẹ̌ maningbe sěmbal᷊iau iạ e wal᷊inewe mạsasěllung su toratẹ̌. Iạ měkẹ̌koạ kerene e tadeạu iạ e wotonge makawol᷊eng si sire makoạ tumatuhụ si Kristus.

21Baug'i sire wal᷊ine Yahudi e, iạ e mẹ̌těngkasul᷊ung kere sěngkatau wal᷊ine Yahudi e, kụ tạ torati Musa. Iạ mẹ̌kẹ̌koạ kerene e tadeạu iạ makakawol᷊eng si sire makoạ tumatuhụ si Kristus. Kaiso ene e wal᷊inewe mạanun iạ e ta tumatuhụ su manga titan Duata; kaiso kai ual᷊ingu kakanoạ u kawasang hengetangi Kristus.

22Sutal᷊oaran taumata pangangimange lome e, iạ e mal᷊aing mẹ̌tẹ̌těngkakoạ kere tau lome pěngangimange tadeạu iạ makawol᷊eng si sire makoạ tumatuhụ si Yesus Kristus. Hatede, iạ e měngkatewe mẹ̌tẹ̌těngkasul᷊ungu kěbị e mẹ̌deạu kěbị taumata e manimbeng sural᷊enge kereapa tadeạu iạ e makapangambangbe sěmbahageange wo'i sire.

23Kěbị ene e takụ kẹ̌koatenge waugu Injilẹ̌ bọu Mawu Ruata e, tadeạu iạ e makatarimạ u al᷊amatẹ̌.

24I kamene tantu masingkạ u su ral᷊ungu pẹ̌tatandungu mahuntal᷊ange ute kěbị e mạhuntal᷊ang bue, kaiso kẹ̌tạeweng sěngkatau makapanarimạu pěreisẹ̌. Ual᷊ingu ene ute tal᷊angko pakatoghasẹ̌ sarang i kau makahombangbe pěreisẹ̌ e.

25I saing kụ makěhagẹ̌ mẹ̌nẹ̌naungu tandunge, kụ mẹ̌tẹ̌tingkědang su kěbị haghi e. Ute i sie mẹ̌kẹ̌koạ ene e ual᷊ingu i sie kai mapulu makisangẹ u bungang'i sain makauntung, kai kawe bungang mal᷊ighạ malolang. Arawe i kitẹ e kawe mẹ̌pẹ̌puhẹ̌dangu patikụ sạbarange u i kitẹ e kawe mapulu makisangẹ u bungang tamalalolang.

26Kai ene hakịu iạ e tumal᷊angbe piạ timonane matuntụ. Mẹ̌sul᷊ungu su tandingu koka, iạ e abe měngkai mạngoka winangaeng.

27Iạ e měngkai mạnarakangkeng badangku e suahạ e matoghasẹ̌ sarạeng iạ e makatal᷊udẹ̌ e. Iạ mẹ̌kẹ̌koạ kerene e watụ u iạ e tawe mapulu sarang mariadi u sarangke iạ e wọuten němaringang taumata wal᷊ine e apatol᷊e pětandungange, kai iạ sẹ̌saku e kawe suhudang.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  1 Korintus 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel