Alkitab Mobile SABDA
[VER] : [SANGIR]     [PL]  [PB] 
 <<  1 Petrus 3 >> 

1Kerene lai i kamene manga wawine, pakasasuměllung su kawing'i kamene tadeạu kamagengu wọu tal᷊oaran sire e piạ u tawe měmpangimangu hengetangu Mawu Kasěllahenge, ute kakanoạ i kamene mapia e makakawal᷊uin sire kụ měmpangimang. Kụ seng tawahal᷊uasu i kamene mẹ̌berang apa-apa si sire,

2u i sire e makạsilo kakanoạ i kamene wurẹ̌si ringangu mal᷊aagimatẹ̌.

3Karal᷊ěnggih'i kamene e abe kawe kětạeng mělẹ̌l᷊ěnggihẹ̌ likude, mangạe pěnanal᷊apidẹ̌ utạ arau pẹ̌papakẹu ral᷊ẹ̌gahẹ̌ bul᷊aeng, arau pẹ̌papul᷊awengu pakeang maral᷊ěgadẹ̌.

4Kaiso, ral᷊ěgahi kamene e kěnangko pasěpụ bọu ral᷊ungu naung, kapia ringangu kasasikome naung dingangu marěmasẹ̌; ene ute kai kal᷊aholẹ ta kumakawusẹ̌ dingangu limembong kaarẹ̌gane tumuhụ silom matang Mawu Ruata.

5Dingangu kakakoạ kere ini ute su tempon nạung manga wawine mal᷊aagama mělẹ̌harapẹ̌ su Mawu Ruata mẹ̌těngkaholẹ u watangeng ute mẹ̌těngkasuměllung su kawingi sire.

6I Sara e mal᷊aing kerene, i sie mararingihẹ̌ si Abraham dingangu makịtuang si sie. Orasẹ̌ ini e i kamene kai nakoạ anạ i Sara, kamagengu i kamene měmpẹ̌kẹ̌koạbe mapia ringangu tawe matatakụ u walạewe apa.

7Dingangu kerene lai i kamene manga esẹ e, pěmpẹ̌biahẹ̌ko pakatatahuěnna su kawing i kamene, batụu i sire kawe wansa lome. Lẹ̌adate wue i sire, watụ u i kamene kawe sarung sěngkapěnarimạu tatal᷊ěntụu pẹ̌bawiahẹ̌ kakalẹ̌ bọu anun Duata. Kụ kẹ̌koạkong kamene ho ene, tadeạu tawe makapetọ pẹ̌kakal᷊iomaneng i kamene.

8Kasasueěnge ute: pakasasěngkanaungko i kamene. Pěmpẹ̌kakakěndagẹ̌ko i kamene sěmbaụ dingangu wal᷊ine e kerẹewe lawọ anạ u sěmbaụ. Kụ pěmpẹ̌tatal᷊ěntụ bue ringangu pakasasanạ bue naung i kamene.

9Kumbahangbe měmal᷊isẹ̌ dal᷊akị dingang'u ral᷊akị arau rarohang dingangu rarohang, kaiso pěmal᷊isẹ̌kon dingangu pẹ̌dorong al᷊amatẹ̌ bọu anun Duata. U kai Ruata e nẹ̌kui si kamene hatede, tadeạu i kamene měnarimạ u al᷊amatẹ̌ bọu anun Sie.

10Su ral᷊ungu Winohẹ Susi mạbawohẹ kere ini, "I sain mapulu kuměndagu pẹ̌bawiahẹ̌ e ringangu mapulu makasilo ěllo mapapia e, ute pangẹ̌dahu lilane mẹ̌bisara wisara raral᷊akisẹ̌ e ringangu pěmatal᷊u wiwihe mẹ̌bisara wisara konti.

11I sie harusẹ̌ mětěngkarau wọu kararal᷊akisẹ̌ e ringangu mẹ̌koạ mapia; kụ i sie pẹ̌tatuměgal᷊ẹ̌ kong kạguwạu ral᷊ungu naunge waụgu makahombang pẹ̌darame.

12Batụu Mawu e mang hanesẹ̌ mạnitị si sai-sain tụtuhụ kapulun'E dingangu Mawu e měngkate hanesẹ̌ dudaringihẹ̌ kakal᷊iomaneng i sire, kai arawe Mawu e rudokạ si sai-sain měkẹ̌koạ dal᷊akisẹ̌ e."

13I sai tangu mẹ̌koạ dal᷊akị si kamene, kereu i kamene makěhagẹ̌ měmpẹ̌koạ mapia?

14Kaiso manilaing i kamene harusẹ̌ mẹ̌tatahangu sunsara ual᷊ingu pẹ̌kakoạ mapia, kai i kamene mang masal᷊amatẹ̌! Abe kěngkatakụ i sai-sai, ringangu abe ghěnggang.

15Arawe su ral᷊ungu naung i kamene, ute kěnangko i kamene lụlohon sili su wowon adatẹ̌ su Mawu i Kristus sěntarangkeng kawantugu kararatuangu Mawu. Dingangu i kamene měngkai sěntiniạ sadia sumimbahẹ̌ kěbị apang kakiwal᷊on taumata mạanụen pělaharap'i kamene.

16Kai mapiawe koạ i kamene ringangu kasasikome naung dingangu maadatẹ̌. Dingangu kěngkatilangko ral᷊ungu naung i kamene e tadeạu kereu i kamene měngkai tẹ̌telorang ual᷊ingu i kamene měmpẹ̌bẹ̌biahẹ̌ mapia tụtol᷊e si Kristus e, tangu i sire apan měmpạnelorẹ̌ si kamene e měngkasamedu kakakoạ i sire hala.

17Mạěndokangbe masunsaram pẹ̌kakoạ mapia -- kereu ene kai kapulun Duata -- sul᷊ung'u masunsaram pẹ̌kakoạ dal᷊akisẹ̌ e.

18Batụu i Kristus sẹ̌sane mang kětạeng sěnsul᷊e nairị baugu sarang karěngụe ual᷊ingken dosan taumata -- u sěngkatau tawẹ sal᷊ane, nairị baugu taumata apan nẹ̌sal᷊a. I Kristus nẹ̌koạ kerene tadeạu i Sie makapamihing si kamene sol᷊ong anun Mawu. I Sie nipate tuhụ mawadang, kaiso kawe niapẹ̌bangung kapia tuhụ marohkẹ̌.

19Su ral᷊ungu kakakoạ u rohkẹ̌ e i Sie rimal᷊eng něhabaru hengetangu Mawu e su rohkẹ̌ mạtatahungkụ:

20kụ kai rohkẹ̌ u taumata apan tawe tumatuhụ su Ruata e nạung su tempon Noakẹ̌. Su tempo ene Ruata e měngẹ̌ngampal᷊ẹ̌ dingangu kasasabarẹ̌ karěngụeweng i Noakẹ̌ kạkoạe kapal᷊e. Kětạewen taumata apang su kapal᷊ẹ̌ e samatang -- kěbịe ual᷊ung katau -- kụ nipakasal᷊amatẹ̌ bọu ralulung masaria ene.

21Kụ, kakakoạ ene tangu makoạ kere tabidạu papinintung sasahani kụ orasẹ̌ ini e makaambang si kamene. Sasahani ini e wal᷊inewe tumbạu ipạnguhasẹ̌ lěngkụ u awạ u apan tamararenọ e, kaiso kawe makoạ kere pẹ̌kakědong kamene su Ruata e wọu ral᷊ungu naung i kamene mapia e. Pěnanahani ene makaambang si kamene ual᷊ingu i Yesus Kristus seng nẹ̌bangung kapia wọu kapapohonge,

22ringangu seng nakoạ sol᷊ong sorga e. Kụ orasẹ̌ ini i Sie kawasa, mạiang su koanengu Mawu Ruata ringangu mẹ̌pẹ̌parenta patikụ malạekatẹ̌ e ringangu patikụ mangangawasa ringangu patikụ kuatu mararohkẹ̌.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  1 Petrus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel