Alkitab Mobile SABDA
[VER] : [SANGIR]     [PL]  [PB] 
 <<  1 Petrus 5 >> 

1Iạ e měgẹ̌gausẹ̌ dal᷊ungu naung i kamene matatimadu jamaatẹ̌ e. Iạ němohẹ u ini e, wọu sěngkatau matatatimadu jamaatẹ̌ sěngkapěmunara e ringangu kere sěngkatau taumata kụ seng nakasahidi hala sunsarang Kristus, dingangu apan sarung l᷊ai iapakawantugẹ̌, kereu kawawantug'i Kristus iapakatodẹ su taumata. Iạ e mẹ̌dẹ̌dorong sěngapam botonge,

2tadeạu i kamene rembem měmpělukadẹ̌ gapaěngu domba e kụ seng nisarakangu Mawu Ruata e si kamene. Pěmpělukadẹ̌ si sire e ringangu karal᷊uasu naung kerẹewe ikẹ̌kaěnningu Mawu Ruata e wal᷊inewe ual᷊ingu nasihasa. Kumbahangbe lai měmpẹ̌koạ munarang kamene waugu mědeạ kal᷊auntung, kaiso kawe ual᷊ingu i kamene kahěnga-hěngang mapulu měmpẹ̌tangkiang.

3Abe kěngkakoạ kere mangangawasa si sire apan seng nisarakang si kamene e, kaiso kariadiko kakakěllaěng baug'i sire.

4Dingangu su tempom Mělal᷊ukadẹ̌ Mawantugẹ̌ e sarung duměnta e, i kamene sarungbe makatarimạ u paporongu kawantugẹ̌ e, kụ tawe maral᷊ubesẹ̌.

5Kerene lai apam mangangudạ. Pakasasuměllungko su matatimadẹ̌ e. I kamene manga anạ u sěmbaụ kěbị e harusẹ̌ mẹ̌těngkasanạ u watangeng dingangu l᷊awọ mẹ̌tatangkiang dingangu kasasanạu naung. Batụu su ral᷊ungu Winohẹ Susi e kạbawohẹ kere ini, "Mawu Ruata e rụdokạ taumata mal᷊aobotẹ̌, dingangu kụkěndagu taumata naunge masanạ e."

6Batụu ene ute, pẹ̌těngkasanạkong batangengu su al᷊ungu l᷊iman Mawu Ruata makuatẹ̌ e tadeạu mapakarangẹ i kamene kamageng semben tempone.

7Lěngkangko kal᷊awọu kaghaghěnggang i kamene su Mawu Ruata, u kai i Sie mẹ̌sasěmpị si kamene.

8Pakarariagạ, pakaral᷊ukadẹ̌! U setange kai rokạ i kamene. I sie kai mẹ̌sul᷊ungu singa mědẹ̌daral᷊eng tama-ramahi kạpẹ̌munggal᷊ọe mẹ̌dẹ̌deạ měnsang i saị e ikakinạe.

9Pakatoelẹ̌ bue rumokạ si sie e ringangu pangangimang masěgadẹ̌, batụu i kamene masingkạu manga anạ u sěmbaụ taumatan Sahani wal᷊ine e su kaguwạu dunia e mal᷊aing masigěsạ kere i kamene.

10Arawe su l᷊ikudu i kamene masunsara pẹ̌sěngkatempo e, Mawu Ruata e sẹ̌sane e sarung mapakariadin kamene masukụ. I Sie sarung mapakatei ringangu mapakatoghas'i kamene ringangu mapakasẹ̌gadi kamene. U i Sie e kai Mawu Ruata puěngu tatal᷊ěntụ kụ seng nẹ̌kui si kamene mẹ̌deạu l᷊ai makapěndang kawawantuge kakalẹ̌ bo'i Kristus.

11I Sie e kai taghuangu kawasa e sarang kakalẹ̌. Aming.

12Suratẹ̌ku manimbụ ini e, takụ nipanuratẹ̌ si kamene ringangu tul᷊umang i Silas, kụ takụ kinapěndangeng u i sie kai anạ u sěmbaụ Sahani masatia. Iạ e kai mapulu mẹ̌gěllịu wawahansang si kamene ringangu manahuntěngadẹ̌ si kamene u ini e kai mamben tatal᷊ěntụu Mawu Ruata e kahěngang. Kụ i kamene e pěmpangumbelẹbe pakasasẹ̌gadẹ̌ su tatal᷊ěntụ ene.

13Manga hapị kụ jamaatẹ̌ sěmbaụ su Babilon, kụ mal᷊aing pinilen Mawu Ruata e, něndohon tabeạ si kamene; kerene lai su anạku i Markus ikẹ̌kěndagẹ̌.

14Pěmpẹ̌papangadatẹ̌ko sěmbaụ dingangu wal᷊ine napenẹu kakěndagẹ̌ e lawọ anạ u sěmbaụ Sahani e. Mal᷊owọko Mawu e měngonggọu karal᷊unsemahẹ̌ si kamene manga anạ u sěmbaụ patikụ e nakoạ tataghuaneng i Kristus. Adat'i kami, Petrus



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  1 Petrus 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel