Alkitab Mobile SABDA
[VER] : [SANGIR]     [PL]  [PB] 
 <<  2 Petrus 2 >> 

1Su tempo napaghohẹ̌ e sutal᷊oarang umat'u Ruata e piạ ko nahunsěpụ manga mahang nabi. Kerene lai sutal᷊oarang kamene manga anạ u sěmbaụ sarung piạ u suměpụ manga mahang měnaněntiro. I sire kai sarung mapasuẹ̌ u manga těntiro nẹ̌sal᷊a, makawinasa taumata. Mase i sire e sarung mẹ̌sunial᷊u Měngangawasa kụ seng něliwir'i sire. Kụ ual᷊ing'u ene i sire e makakarěntang kawawinasa su watangeng i sire hala e, kụ sarung mihombang si sire e mal᷊ighạ.

2Maningbe kerene, kai sarung mal᷊awọ taumata mahuntol᷊e měmpẹ̌těno kakakoạ u pẹ̌bawiahu mahang mananěntiro wẹ̌bawaěngu abul᷊ing sire. Kụ kakakoạ u mahang mananěntiro e makariadin taumata l᷊awọ e měmpěhodatẹ̌ Dal᷊engu Katěngadẹ̌ makakahumpạ u anun Duata.

3Ual᷊ingu anggang i sire tangú, manga mahang mananěntiro e sarung měmpẹ̌bẹ̌kem běke lẹ̌langinang i sire hala tadeạu makaěbạ untung i sire wọ'i kamene. Arawe kawe putusangu hukumang si sire semben těbe marěngụ kạdariahi ringangu kawawinasan sire e seng tinantu e měmpangampal᷊ẹ̌ si sire.

4Manga malaekatẹ̌ baradosa e mal᷊aing tawe ipakawalam Mawu Ruata ipakal᷊iwirẹ̌ bọu hukumange kaiso kawe irěmmẹ su ral᷊ungu naraka. I sire iwunsal᷊ẹ̌ su ral᷊ungu tịgal᷊ụ u kararěndung ipanguntang sene sarang Ěllon Pělahukung.

5Kerene lai nạung dunia e su tempo kal᷊amona, Mawu Ruata e tawe napakal᷊iwirẹ̌ bọu hukumang. Mawu Ruata e naparěntan dalulung su wanuan taumata ral᷊akisẹ̌ e su tempo ene. Kětạeng i Noakẹ̌ dingangu ringange i sire pitung katau niapakasal᷊amatẹ̌, baugu i Noakẹ̌ mělẹ̌habaru hengetange mạanun pẹ̌bawiahẹ̌ mẹ̌tẹ̌tal᷊ahino su kapulun Duata.

6Kerẹewe lai kakakoạ e soan Sodom dingangu Gomora: Mawu Ruata e napakawinasan manga soa ene ringangu putung tadeạu makoạ tul᷊adang apa sarung mariadi su taumata ral᷊akisẹ̌.

7Kai arawe i Lotẹ̌ e naambang, baugu i sie e nakal᷊ahimpulu Mawu Ruata; i sie nasunsara ual᷊ingu kakanoạ u taumata ta mẹ̌tatal᷊ahino e kereng kal᷊amuhụ e.

8Sutal᷊oarang kakakoạ u taumata kerene e i Lotẹ̌ taumata mapia ene e měbẹ̌biahẹ̌ su ral᷊ungu tědụ u naung, batụu měllo-měllo e i sie makạsilo ringangu makạdingihẹ̌ kakanoạ i sire ral᷊akisẹ̌ e.

9Kụ, Mawu e masingkạ u kereapa měngambang taumata kụ měngkai tụtuhụ kapulun naung'E kereu i sire kawe tụtatěngo kal᷊awọu sasal᷊ukạ e. Dingangu Mawu e masingkạ u kereapa měndesọ u taumata ral᷊akisẹ̌ e mẹ̌deạ u sigěsakeng su Ěllon Pělahukunge,

10lembọete taumata kụ tụtol᷊e abul᷊in sire maral᷊amuhụ e ringangu měnẹ̌namedẹ̌ kawasan Mawu Ruata. Kerẹeng kawahanine ringangu kaobote manga mahang mananěntiro e hakịu i sire e tawẹ goẹ̌ e měmpěnamedẹ̌ diadikang mawawantugẹ̌ e sarangkewe lai su sorga e!

11Arawe manga malaekatẹ̌ kụ limembom matatoghasẹ̌ dingangu kawasa wọu manga mahang, mananěntiro e tawe měmpěnanoke riạdikang mawawantugẹ̌ e ringangu manga waweran sasamedẹ̌ e su těngon Mawu.

12Arawe manga mananěntiro ene e wal᷊inewe kal᷊oa! I sire e kai tabidạu binatang piněhanạ kětạu waugu samekang dingangu pateěng. I sire tawe nẹ̌tiněnna, kaiso kětạeng něngal᷊ạ kakakoạ ual᷊ingu samatang tumbạu tụtuhụ kal᷊oko, hakịu i sire měngkate kạdokạ e kal᷊awọu sạbarang tawe kal᷊aěnnaěng'i sire e ringangu haghim bawera'n tatungkeang. Ual᷊ingu ene kahian kakanoạ i sire hala e i sire sarung mawinasa kere manga binatang dul᷊u.

13Kai kere wawal᷊isu sunsara kinoạ i sire e, ute i sire mal᷊aing mẹ̌tatahangu sunsara. Sunaung i sire ute apan makạl᷊ahimpulu si sire ute mẹ̌koạ balạewe apa kụ hinong makakasahe kapulu'm badang i sire e. Kereu i sire makakaiang sěngkakaěng dingangi kamene su ral᷊ungu sal᷊iwange, ute lulun sire e kai makạmamuta batụu i sire kai mẹ̌bẹ̌biwukangu abul᷊ing sire.

14I sire tawe měngkawawui měmpẹ̌koạ dal᷊akị e, ringangu puluang i sire měngkai měmpěmanda wawine ral᷊akisẹ̌. Ringangu taumata apan němpangimange ringangu wẹ̌dan tawe tumanị u maiaking ute mang lẹ̌lokeěng i sire. Dal᷊ungu naung i sire sen dimẹ̌kạ u anggang. I sire e kai taumata kinawontogang!

15Batụu i sire tawe tumol᷊e ral᷊eng matul᷊idẹ̌ e, hakịu i sire kawe něngkapal᷊idẹ̌. I sire kai němpẹ̌tol᷊e ral᷊eng tẹ̌tol᷊eěng i Bileam anạ i Beor nạung. I Bileam ini e puluang kahěngang makareạ doitẹ̌ bọu munaran sire su tawẹ adile.

16Kaiso i sie nakahombang tatengko matědụ kahian kararal᷊akise, piạ e kalidene nakaweran tingihu taumata. Tangu nabi ene nisihasa takadeạu měngẹ̌do wọu kakanoạ e pulu ene.

17Manga mahang mananěntiro e kai tabidạu matang akẹ kinamaraěng dingangu kere hiwụ nitiukangu anging maihạ. Mawu Ruata e seng něnạdian tampạ i sire wasagiạ.

18I sire e němpẹ̌koạ pẹ̌kakakẹ̌don sire mal᷊aatahẹ̌ tawẹ gẹ̌sine; abul᷊ing sire ipẹ̌pakẹ i sire apakạnawong taumata wuhu-wuhu karal᷊iwirẹ̌ bọu ghal᷊ipohong apang něngkapal᷊idẹ̌ e.

19Manga mahang mananěntiro ene měmpẹ̌kẹ̌kědong karal᷊iwirẹ̌ si sire, sěmbal᷊iu i sire hala e pinẹ̌tahuěllangu kawawinasa, u i saing ikẹ̌kawatạu apa-apa e, ute kai ěllangu apan nakawatạ e.

20Taumata makakiral᷊a Mawu ringangu Mananal᷊amatẹ̌ si kitẹ i Yesus Kristus seng nal᷊iwirẹ̌ bọu manga kawasan dunia kụ makạdal᷊akisẹ̌ taumata. Kai kereu samurine i sie masangkong kapia hakịu ikawatạu manga kawasa ene, tangu kakakoạu taumata ene sarungbe něngalembong karal᷊akise wọu kal᷊amona.

21Limembong kapiane taumata kerene e ta nakakasingkạ u ral᷊engu katul᷊idẹ̌ e wọu Ruata, sul᷊ungu i sire e masingkạ, kutẹu samurine kawe tawe mapulu tumol᷊e titang Mawu Kasěllahenge si sire.

22Apan nikoạ i sire e mẹ̌lẹ̌lahẹ u hinong papasihing ini, "Asu e sarung mẹ̌sul᷊e kumaěng mutane," dingangu "Wawi wọu nirenọ e, mẹ̌sul᷊e mẹ̌těngkal᷊usị su pẹ̌tatonaěnge."



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  2 Petrus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel