Dual Panel1Su anạ u sěmbaụ i kẹ̌kěndagẹ̌ i Gayus! Iạ e těmbonangu jamaatẹ̌, kụkěndagi kau kahěnga-hěngang,
2měkẹ̌kal᷊iomaneng karimạko i kau e měngkai mahuweka ringangu kěbị apan dingangue mapapia wue kerẹewe lai himukudu e měngkawe lai mapia.
3Iạ e mal᷊uasẹ̌ kahěngang piạ e pirang katau anạ u sěmbaụ Sahani e narěnta kụ něhabarẹ̌ si siạ u kai nạung kereng kasatiane i kau su pẹ̌bawiahu su těngon Duata e kahěngang, batụu i kau e mambeng hanesẹ̌ měbẹ̌biahẹ̌ tụtuhụ těntirom Mawu Ruata.
4Tawẹ apa wal᷊ine makạkoạ si siạ limembom mal᷊uasẹ̌ e, wọu makaringihẹ̌ u manga anạku e reng měbẹ̌biahẹ̌ tutuhụ těntirom Mawu Ruata.
5Anạ u sěmbaụku! I kau mambeng masatia su ral᷊ungu munara kẹ̌koatengu waugu sěndinganeng u tau Sahani, ore lai su tau Sahani wẹ̌dan ta kinakiral᷊anue, mal᷊aing tẹ̌tangkianengu.
6I sire nẹ̌sahidiwe lai kakěndagu e su jamaatẹ̌ su anung kami. Tul᷊ungko i sire tadeạu makatěpasẹ̌ben daral᷊eng i sire ringangu tadeạu i sire makal᷊uasẹ̌be naungu Mawu Ruata,
7waugu su raral᷊engangu mẹ̌tangkiang si Kristus e, i sire tawe mananarimạ apa-apa wọi sire tau kapirẹ̌ e.
8Ual᷊ingu ene i kitẹ apan tau Sahani e harusẹ̌ mẹ̌tul᷊ungu manga hapị lawọ Sahani kerene, tadeạu i kitẹ e mal᷊aing makakatol᷊e mangeken těntirong katěngadu Ruata.
9Iạ e seng namohẹu suratẹ̌ manimbụ su jamaatẹ̌, kaiso i Diotrefes piạ kapulune makoạ těmbonange su ral᷊ungu jamaatẹ̌ e tawe tumuhụ si siạ.
10Hẹ̌dowen iạ marěnta e, iạ sarungbe mapẹ̌tahěndungu patikụ apan nịkakoạ e patikụ kararal᷊akisẹ̌ dingangu konti iwẹ̌berane maul᷊ị i kami e! Kaiso kěbị ene mang tawe nakạsahe kapulune. Ene, naung piạ manga hapị e tau Sahani kụ narěntạ e, ute i sie kawe tawe mapulu měnarimạ i sire. Katewe i sie mundangu nẹ̌sědingu taumata apan mapulu měnarimạ u manga anạ u sěmbaụ ene, ringangu i sie něndolohi sire ene apasẹ̌bang bọu ral᷊ohon jamaatẹ̌ e.
11Manga anạ u sěmbaụ ikẹ̌kěndagẹ̌, kumbahang bue mẹ̌tatěno sural᷊akisẹ̌. Pẹ̌tatěnoko suapan mapapia. I sain měkẹ̌koạ mapia e kai tataghuanengu Mawu Ruata. Ringangu i sain měkẹ̌koạ dal᷊akisẹ̌ e kai wẹ̌dang bẹ̌gang Mawu.
12Kěbị taumata e měsẹ̌sahiding kapiam pẹ̌bawiahi Demetrius. Saral᷊aing Mawu Ruata e měsẹ̌sahiding ene. I kami mal᷊aing měsẹ̌sahiding Sie, kụ i kau masingkạ u ipẹ̌paul᷊ị i kamie mamben těngadẹ̌.
13Mal᷊awọ kahěngang hinon takụ ipẹ̌bera si kamene, kaiso iạ měpẹ̌pěndangu něngal᷊embom mapia e kumbahangbe ringangu suratẹ̌.
14Iạ mělẹ̌harapẹ̌ lai tawẹ karěngụ e sarung mẹ̌sombang dingangu, kụ i kitẹe makapẹ̌bisarawe mẹ̌tẹ̌těngo. (1-15) Karimạko al᷊amatu Mawu e měngkai wuạ u. Manga hapị u su tampạ ini e něndohong tabeạ si kau. Paul᷊ịko tabeạku su manga hapị i kitẹ kěbị e sěngkatau-sěngkatau.