Alkitab Mobile SABDA
[VER] : [SANGIR]     [PL]  [PB] 
 <<  Filipi 1 >> 

1Manga anạ u sěmbaụ dal᷊ohon jamaat'u Mawu patikụ mạtanạ su Filipi, kụ seng nasěmbaụ dingangi Kristus Yesus. Kerene lai manga anạ u sěmbaụ pangahạ dingangkewen mẹ̌tatangkiang jamaatẹ̌! Iạ i Paulus, dingangkewen i Timotius, manga ěllang i Kristus Yesus,

2mělẹ̌harapẹ̌ mal᷊owọko Ruata i Amang i kitẹ dingangu Mawu Yesus Kristus mangonggọu al᷊amatẹ̌ dingangu karal᷊unsemahẹ̌ si kamene.

3Kasaụewen iạ mẹ̌tẹ̌tahěndung si kamene, iạ makitarimakasẹ su Ruata.

4Dingangu masau su sul᷊ene iạ měkẹ̌kal᷊iomaneng baug'i kamene kěbị, iạ měkẹ̌kal᷊iomaneng dingangu karal᷊uasu naung.

5Iạ makitarimakasẹ su Ruata ual᷊ingu reng dokeng bọu ěllo humotong sarang orasẹ̌ ini, i kamene seng nẹ̌tul᷊ungu iạ nangekeng Injilẹ̌ bọu Ruata.

6Duata sẹ̌sane nanětạu hal᷊ẹ̌ mapia ene si kamene, dingangu iạ mangiakingu i Sie sarung maněpasu hal᷊ẹ̌ ene sarạewen masue su Ěllon Kristus Yesus duměnta kapia.

7I kamene měngkate hanesẹ̌ ene su naungku. Mang kahěngang su tampạ e wue iạ piạ pěndangku kerene si kamene. Batụu i kamene kěbị seng sěngkapěnarimạ dingangku, laonggọ u Mawu Ruata kụ seng nionggọ siạ, baẹ su tempo ini iạ e ěndaung su ral᷊ungu tahungkụ baẹbe su tempon iạ su l᷊ikude waugu tumatawang dingangu mẹ̌tahutěndạu Injilẹ̌ ene.

8Duata e masingkạ, u iạ mambeng dụdareạ si kamene dingangu pěndangu kakěndagu Mawu Yesus Kristus sẹ̌sane.

9Kai ini e kakal᷊iomanengku waug'i kamene: karimạko i kamene mahuntinamba kuměndagu Ruata ore lai kasandigangu ringangu měngkai mạtamba su ral᷊ungu kasingkạ kahěngang dingangu matatahuěnna.

10Dingangu kerene i kamene masingkạ měmile apang kapiaěnge, takadeạu i kamene sarung mawurẹ̌si wọu karal᷊aị arau haghin laěnsilẹ̌, su ěllong Kristus duměnta kapia.

11Pẹ̌bawiah'i kamene sarung mẹ̌dal᷊embong kakanoạ mapapia kahěngang kụ kětạeng niual᷊i wọi Yesus Kristus sẹ̌sane; tangu Ruata sarung iapakawantugẹ̌ dingangu rẹ̌daloěng.

12Iạ e mapulu i kamene masingkạ u apang kụ seng nariadi si siạ, kai nakakal᷊awọ taumata rimaringihẹ̌ dingangu nangimangu Injilẹ̌ ene.

13Kasueěnge, kěbị měndariagạ istana ringangu taumata wal᷊ine su soa ene masingkạ u iạ nitahungkụ ual᷊ingu iạ e mětẹ̌tangkiang si Kristus.

14Dingangu pananahungkụ siạ e kai nakapangělembon pangangiakingu tau Sahani kal᷊awokange su soa ini su Mawu, nakapahuntinamban bahanine měhabaru titan Mawu tawẹ goẹ̌ e.

15Těngadẹ̌ piạ pirang katau wọu tal᷊oaran sire kụ mělẹ̌habar'i Kristus ual᷊ingu panananoi ringangu mapulu mẹ̌sitori, arawe sěnggạ e wue ute mělẹ̌habarẹ̌beng Kristus su katul᷊ide.

16I sire ini měkẹ̌koạ kerene ual᷊ingu i sire kụkěndagu Ruata ringangu iạ, batụu i sire masingkạ u Ruata seng něngonggọ u hal᷊ẹ̌ siạ baugu mělahẹ u Injilẹ̌ e kahěngang.

17Arawe sěnggạ e wue mělẹ̌habar'i Kristus e piạ timonane ral᷊aị; i sire mělẹ̌habarẹ̌ e waugu pandungang i sire hala. Ual᷊ingu ene i sire mělẹ̌harapẹ̌ u makakoạ siạ limembong kasigěsạ e su ral᷊ungu tahungkụ.

18Kaiso tawe mẹ̌kapura! Batụu maning kereapa, baẹ ene nikoạ dingangu timonane mapia, baewe lai su timonane kụ nẹ̌sal᷊a, kaiso i Kristus mang ipẹ̌dal᷊ahabarẹ̌ l᷊ai; kụ iạ e mal᷊uasẹ̌. Dingangu iạ e tatapẹ̌ mẹ̌pẹ̌pěndang kerene,

19batụu iạ masingkạ u kahiạeweng kakal᷊iomaneng i kamene ringangkewel᷊ain ontol᷊u Rohkẹ̌ u Mawu Yesus Kristus e, iạ e iapakal᷊iwirẹ̌.

20Něngalembọewe lai takụ ilẹ̌ěnning dingangu lẹ̌harapenge kai tadeakengu mambeng kumbahang iạ kawe tạ kěhase su munaraku e. Su sěmběkane iạ mělẹ̌harapẹ̌ tadeạu apan tempo e, něngalembọ e su orasẹ̌ ini, iạ mětẹ̌tumbahani ringangu kaguwạu kuatẹ̌ku -- bae iạ biahẹ̌ arau iạ mate -- i Kristus iapakawantugẹ̌.

21Ual᷊ingu si siạ, timonan biahẹ̌ku kětạeng i Kristus! Kụ papate kai untung.

22Kai kereu ringangu pẹ̌bawiahẹ̌ su dunia ini, iạ makakoạ munara kụ l᷊imembon piạ mangal᷊ene, ute iạ běga wue sude hinon takụ pileěng.

23Iạ wẹ̌bol᷊engang bọu ruam běka. Iạ mẹ̌měning kahěngang maněntangu dunia ini tadeạu tamai mẹ̌tanạ dingangi Kristus, kai ene e limembong kapiane;

24kai waugu pandungangu ute kai limembom mapia kereu iạ tatapẹ̌ mạtanạ su dunia.

25Iạ mangiaking u hal᷊ẹ̌ ene. Kai ene hakịu iạ masingkạ u iạ matatapẹ̌ matanạ dingangi kamene kěbị, tadeạu makapẹ̌tul᷊ung si kamene mariadi něngalembong kakuate ringangu mahuntinambang kal᷊uase su ral᷊ungu pangangimang su Mawu.

26Ual᷊ingu ene, kereu iạ sarung mẹ̌sul᷊e su anung kamene, ute i kamene apan seng nasěmbaụ dingangi Kristus Yesus e sarung piạbe limembong kal᷊awọ e lai kakakoạku mědeạu l᷊umesạ u watangengku.

27Ho! Kapiange orasẹ̌ ini e pẹ̌bawiah'i kamene seng sěndal᷊engu kapulun Injilẹ̌ mạanun Yesus Kristus ene. Mageng kerene měnsang iạ makapẹ̌sombang dingangi kamene arau tala, iạ makaringihẹ̌ bue u i kamene matoghasẹ̌ su kasasěmbaụ dingangu sěngkapẹ̌tawakal᷊i sěmatang, baugu timona ringangu ěnning sěmbaụ baugu pangangimang mẹ̌takạewen dingangu Injilẹ̌ bọu Mawu Ruata.

28Karimạkọ i kamene sěntiniạ mang bawahani kụ abe kěngkatakụ mẹ̌těngong kal᷊awọu rumarokạ si kamene. Ene kai kere ipělẹ̌lahẹ u i sire kai sarung ikawatạ, kụ i kamene sarung makauntung, ual᷊ingu kai Ruata sẹ̌sane mẹ̌gěllịu kal᷊auntung ene si kamene.

29Batụu Ruata e seng nangonggọu tatal᷊ěntụe si kamene bal᷊ine kětạeng baugu mangimang si Kristus, kaiso lai waugu mẹ̌těngkasunsara waug'i Kristus.

30Ini e i kamene lai tumol᷊e si siạ su ral᷊ungu pẹ̌sasekẹ mẹ̌sul᷊ung; mangal᷊ene ute kai pẹ̌sasekẹ nạung seng bọu nikasilong kamene takụ ipẹ̌sẹ̌sekẹ kal᷊imona, ringangu měngkai wědan takụ ipẹ̌sẹ̌sekẹ sarang orasẹ̌ ini, kerẹewe kinaringih'i kamene orasẹ̌ ini.


  Share Facebook  |  Share Twitter

 <<  Filipi 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel