Dual Panel1Pakakakěndagẹ̌ko sidutu i kamene sěmbaụ su wal᷊ine lawọ taumatan Sahani anạ u sěngkatau.
2Abe ghoẹ̌ i kamene měnarimạ u taumata raghị su wal᷊eng kamene. Batụu pẹ̌kakoạ kerene, kai wọu nariadi kụ piạ taumata kụ tawe nikahěnganeng kutẹu kawe nạung něnarimạu malạekatẹ̌ su ral᷊ungu wal᷊ene.
3Pěmpẹ̌tahěndung apang mạtatahungkụ e, mẹ̌sul᷊ungu l᷊ai i kamene kạtatahungkụ sěngkatahungkụ dingang i sire. Kụ i sai-saịeweng balạewe koạ i kamene e, pẹ̌tahěndung bue u i kamene mal᷊aing kẹ̌koateng kerene.
4Patikụ taumata e harusẹ̌ měnodẹ u lulune maadatẹ̌ su hal᷊ẹ̌ u pẹ̌kakawing, u kai ene hakịu pẹ̌sěngkawingang e harusẹ̌ pakasatia sěmbaụ su wal᷊ine. Taumata taha pẹ̌sundal᷊ẹ̌ e ringangu taumata nawuang sarung ihukungu Mawu Ruata.
5Piawe pẹ̌bawiah'i kamene pẹ̌kawasaěngu ěnning su roitẹ̌ e, kaiso pěmpẹ̌kětạbeng apang piạ su watangengu. Batụu Mawu Ruata e seng něhengetang, "Iạ e tawe sarung mapakawala arau sarung maněntang i kau."
6Batụu ene i kitẹ e wahani makapẹ̌bera u, "Mawu e kai Mẹ̌tul᷊ungu iạ, iạ e tawe matakụ. Kaia koatengu taumata e si siạ?"
7Abe kiwul᷊ei manga měngangahạ si kamene e kụ mělẹ̌habaru hengetangu Mawu Ruata e si kamene. Kakěllaiko kereapa i sire měmpẹ̌biahẹ̌ e, ringangu kereapa i sire měngkairị e, ringangu pěmpẹ̌těnnoko pangangimang i sire e.
8Mawu Yesus Kristus e těbewe mẹ̌sul᷊ung, baẹ kal᷊imona, orasẹ̌ ini, ringangu sarang marěngụ-děngụ.
9Kumbahang i kamene mangonggọu loahe su kal᷊awọu haghin těntiro makạl᷊aherang kụ makapal᷊idẹ̌ si kamene. Naung i kitẹ e harusẹ̌be toghasengu kapian naungu Ruata e, u kai ene e mapia, kumbahangbe kawe ual᷊ingu manga kal᷊awọu atorangu pal᷊ahungkaěng. I sai-sain nạung kal᷊amona e tutuhụ kal᷊awọu atorang ene e tawe makahombang ual᷊ine apa.
10I kitẹ e kai piạ pananěmbaěng i kitẹ sěmbaụ pěmamělokangu sasěmba su Mawu Ruata. Dingangu manga imang kụ mětẹ̌tangkiang su ral᷊ungu selong pẹ̌kakal᷊iomanengang, ute tawe wotonge kuminạ sasěmba kạpapěllọ su wowon pananěmbaěng ene.
11Dahang binatang kụ isẹ̌sěmba kere laonggọ baugu ipěngampung dosa, kawe nịbawawang imang mawantugẹ̌ e sol᷊ong dal᷊ungu Huang Kasusiange arawe kasuangu binatang ene e sẹ̌sane nitongkạ su l᷊ikudu raseng.
12Kai ual᷊ingu ene hakịu Mawu Yesus mal᷊aing napohong su l᷊ikudu pasěllangengu soa e waugu ipěmurẹ̌si umate wọu rosa e ual᷊ingu rahan'E sẹ̌sane.
13Ual᷊ingu ene tangu mahịe i kitẹ e makoạ sol᷊ong anun'E sul᷊ikudu selo e mase manal᷊udẹ̌ sasamedẹ̌ sěngkapěnal᷊udẹ̌ dingang'E.
14Batụu su dunia ini e tawẹ apa pẹ̌tatanakeng sarang marěngụ e waug'i kitẹ e; i kitẹ kai mědeạ pẹ̌tatanakeng kụ sarung damahi.
15Ual᷊ingu ene, lumiung Mawu Yesus e, i kitẹ e hinong sidutu mẹ̌dẹ̌dalo Mawu Ruata; u ene kai makoạ kere gaghěllị tatarimakasẹ i kitẹ e si Sie kụ isěmbang kitẹ e wọu wuạen biwihẹ̌ baugu mẹ̌dalo areng'E.
16Abe kiwul᷊eng mẹ̌koạ mapia e ringangu mẹ̌tatul᷊ung, batụu kai ini e manga gaghěllị kụ makal᷊uasẹ̌ naungu Ruata e.
17Pakatatuhụ bue su manga parentang měngangahạ i kamene e, ringangu pakasasuměllung bue si sire. Batụu i sire e sidutu měnẹ̌nahimata himukud'i kamene, dingangu i sire e hinong mẹ̌těngong sasimbang i sire su Mawu Ruata e. Kamagengu i kamene matuhụ si sire e, ute i sire makapěmunarawe ringangu naung mal᷊uasẹ̌; arawe mạeng u tala ute; i sire sarung piạ karal᷊umběhạ e měmpěmunara e kụ ene tawe makapẹ̌barauntu si kamene.
18Sěntiniạbe pěmpẹ̌kal᷊iomaneng baug'i kami e, u i kami e mạngiakingu naung i kami e matilang, batụu i kami e sidutu mang mapulu mẹ̌koạ ene tuhụewe katul᷊ide.
19Kụ napal᷊iụewe makapědẹ̌dorong si siạ e sěngapang botonge, tadeạu i kamene měmpẹ̌kal᷊iomanengbeng iạ e. Pẹ̌kal᷊iomanengko tadeạu Mawu Ruata e karimakọ měngkai limembong kal᷊ighạ e mẹ̌bawa si siạ kapia sol᷊ong anung kamene.
20Mawu Ruata e seng namiahẹ̌ Mawung kitẹ i Yesus Kristus bọu papate. Ual᷊ingu papatene, orasẹ̌ ini e i Sie seng nakoạ Mělal᷊ukadẹ̌ Mawantugẹ̌ si kitẹ manga dombane. Papatene ene mal᷊aing mạněgadẹ̌ pẹ̌dariandi kakalẹ̌ nikoạ u Mawu Ruata e ringang'i kitẹ.
21Mal᷊owọko Mawu Ruata puěngu karal᷊unsemahẹ̌ e mapakasukụ i kamene e ringangu patikụ apang mapapia e ghẹ̌gausang i kamene e waugu mẹ̌koạ apang kapulun'E. Mal᷊owọko lumiun Mawu Yesus Kristus e, Mawu Ruata e mẹ̌karadiahang su ral᷊ung i kitẹ e, apạeweng ilẹ̌ěnning'E. Kụ apakaraloko i Kristus e sarang marěngụ-děngụ! Aming.
22Iạ mědẹ̌dorong tadeạu i kamene měmpěnaung bue kal᷊awọu sasaku ini e ringangu kasasabarẹ̌, batụu suratẹ̌ku ini e tawe tumanị e manandu.
23Kěngkasingkạ bue i kamene u anạ u sěmbaụ i kitẹ i Timotius e seng niapasěbang bọu ral᷊ungu tahungkụ e. Kereu i sie seng damahi sol᷊ong tampạku ini e, i sie hědong takụ paringaneng su tempong iạ mẹ̌tiwo si kamene sarung.
24Paul᷊ịkong tabeạ i kami su apang měngangahạ si kamene ringangu su patikụ kawanuan Duata. Tarimạko l᷊ai tatabeạ u manga anạ u sěmbaụ bọu Italia.
25Mal᷊owọko Mawu e měngal᷊amatẹ̌ si kamene manga anạ u sěmbaụ patikụ.