Alkitab Mobile SABDA
[VER] : [SANGIR]     [PL]  [PB] 
 <<  Ibrani 2 >> 

1Ual᷊ingu ene i kitẹ e hinong kahěnga-hěngang něngalembong mẹ̌tumpaedẹ̌ su manga těntiro kụ seng kinaringih'i kitẹ, tadeạu kumbahang i kitẹ maněntangu pangangimang i kitẹ e.

2Manga hengetang kụ pinakihabarẹ̌ su manga malạekatẹ̌ su manga i upung i kitẹ e nal᷊ahẹ u mambeng kahěngang, kụ i sain tawe tumol᷊e arau tumuhụ e sarung makaěbạ hukumang tuhụ kasěllahu ral᷊awange.

3Limembo kate kasasal᷊amatẹ̌ kụ napal᷊iung kasěllahe wọu manga hengetang ene! Kereu i kitẹ e sarung tawe makakatal᷊ang bọu hukumang. Batụu kai Mawu sẹ̌sane kahumotong-motongange namohangu kasasal᷊amatẹ̌ ene, ringangu i sire nạung kal᷊amona nakaringihẹ̌ e seng napakal᷊ahẹ u katěngade si kitẹ.

4Su sěmběkane, Mawu Ruata e mal᷊aing napakasěgadu sasahidin sire, kụ nẹ̌koạ e kal᷊awọu haghing hal᷊ẹ̌ makạdal᷊inaụ dingangu munarang kawasa ringangu apạmal᷊awuhẹ̌ manga l᷊aonggọ u Rohkẹ̌ u Ruata e tuhụewe kapulun'E hala.

5Manga malạekatẹ̌ e tawe nakahombang kawasa wọu Mawu Ruata waugu mẹ̌parenta dunia wuhu sarung duměnta, kụ kai dunia e ipạhumbisarang kitẹ ini e.

6Arawe su sěmběkane, piạ su sěmbahageang u Winohẹ Susi e kạbawohẹ kere ini, "Apa wue taumata e Mawu, hakịu i Kau mang mětẹ̌tahěndung si sie? Taumata e kětạengbeng taumata, kaiso kai mambeng sẹ̌sěmpikang u!

7Kětạeng gěnnangu sěngkatempo i Kau napakasanạ i sie kadodọ bọu malạekatẹ̌. I Kau e nangonggọu kal᷊aianeng mawantugẹ̌ dingangu maadatẹ̌ si sie,

8dingangu napakariadin sie měngẹ̌ngawasa patikụ." Kụ kamageng u niwera u Mawu Ruata e něndiadi taumata "mangangawasa patikụ sạbarang", mangal᷊ene ute tawẹ u tamasěllung su al᷊ungu kawasang taumata. Manilaing kerene, kaiso i kitẹ e tawe nakasilo ini e taumata mangangawasa patikụ sabarang.

9Arawe i kitẹ e kai seng nakasilo Mawu Yesus e kawe kawasa! I Sie nipakasanạ kadodọ bọu malạekatẹ̌ e gěnnangu sěngkatempo, tadeạu ual᷊ingu kapian naungu Ruata e, i Sie kai nate waugu patikụ taumata. I kitẹ makạsilo si Sie orasẹ̌ ini e nighěllirangu kal᷊aianeng mawantugẹ̌ dingangu maadatẹ̌, ual᷊ingu i Sie seng nẹ̌tatahang u sigěsạ sarang napohong.

10Sembeng hinone Ruata -- e něndiadi patikụ tuhụ kapulun'E sẹ̌sane napakariadin -- Yesus mananal᷊amatẹ̌ masukụ ual᷊ingu kasasigěsạ e. Dingangu ene tangu Ruata e makạboghe taumata l᷊awọ mědeạu ipakawantugẹ̌ dingangu Mawu Yesus. Batụu kai i Sie nanope ral᷊eng baug'i sire mědeạu ipakasal᷊amatẹ̌.

11Mawu Yesus namurẹ̌si taumata wọu manga rosan sire; kụ i Sie měmamurẹ̌sine ringangu i sire niwurěsin'E e lawọ piạ i Amang i sire mang sěmbaụ. Ual᷊ingu ene Mawu Yesus e tawe mamea mangakun sire ene kere anạ u sěmbaụ'E.

12Mawu Yesus něhengetang su Mawu Ruata, "Iạ sarung měhabarẹ̌ si kamene manga anạ u sěmbaụ mạanung Kau. Iạ e sarung mẹ̌dalo si Kau su ral᷊ungu komol᷊ang'i sire."

13Mawu Yesus mal᷊aing něhengetang, "Iạ e sarung mangumbala su Mawu Ruata." Dingangu i Sie mal᷊aing něhengetang u, "Kai ini e Iạ, dingangkewelain manga anạ kụ seng nionggọ u Ruata e si Siạ."

14Ual᷊ingu taumata apan nisěbạ'E anạ ene, kai riadikang taumata kụ mẹ̌tate tangu Mawu Yesus sẹ̌sane e nẹ̌těngkasul᷊ung i sire e kụ měbẹ̌biahẹ̌ su ral᷊ungu kakakoạ u taumata. I Sie měkẹ̌koạ kerene, tadeạu ual᷊ingu kapapohong'E, i Sie mapạkawinasang setang ěndaị mạngawasa papate.

15Dingangu kakakoạ ene tangu i Sie měngambang taumata kụ su kanandum pẹ̌bawiahe ipětẹ̌tahuěllang ual᷊ingu katatakụ u papate.

16Nal᷊ahẹ e kai wal᷊inewe malạekatẹ̌ kụ nịlaambang'E, kaiso kawe hiteng Abraham.

17Ini e mangal᷊ene u i Sie hinom makoạ mẹ̌sul᷊ung dingangu manga anạ u sěmbaụ'E su ral᷊ungu patikụ sạbarang. Kụ ual᷊ingu ene i Sie makoạ Imang Mawantugẹ̌ masatia ringangu matal᷊ěntụ. Ual᷊ingu pẹ̌tatangkiang'E ene tangu rosan taumata e niampungang.

18Kụ ual᷊ingu i Sie sẹ̌sane nạung bọu nasigěsạ dingangu nisal᷊ukateng, i Sie nakakaontol᷊ẹ̌be taumata apang kẹ̌kasal᷊ukateng, batụu i Sie hala e wọu kinasal᷊ukateng dingangu wọu nasigěsạ.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Ibrani 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel