Alkitab Mobile SABDA
[VER] : [SANGIR]     [PL]  [PB] 
 <<  Ibrani 3 >> 

1Manga anạ u sěmbaụ tamba pangangimang kụ seng kinakuiangu Ruata e lai! Kěnangko pẹ̌tiněnna pakaral᷊ung-dal᷊ung mạanun Mawu Yesus ini e! Mawu Ruata e rimoloh'i Sie samatang tadeạu makoạ Imang Mawantugẹ̌ su ral᷊ungu agama kụ tẹ̌tol᷊eěng i kitẹ.

2I Sie masatia su Ruata kụ seng němile si Sie waugu munara ene, mẹ̌sul᷊ungkewen nạung i Musa e kal᷊amona e satia měndal᷊engu munarane su wal᷊en Mawu e.

3Arawe Mawu Yesus e hinone wue adateng limembong kasěllahe wo'i Musa. Batụu i saing kụ nělanging bal᷊e e hinong makahombang laadatẹ̌ limembong kasariane wọu wal᷊e ene.

4Těngadẹ̌ apạeweng bal᷊e e piạbem měndal᷊anginge, kaiso měndal᷊anging patikụ sabarange ute kai Ruata.

5I Musa e kai taumata masatia mẹ̌tangkiang su ral᷊ungu wal᷊en Mawu e ringangu maněpaseweng kal᷊awọu apang ipaul᷊ị u Mawu Ruata e su tempo sarung duměnta e.

6Kai arawe i Kristus ute kawe satia kere sěngkatau Ahusẹ̌ mẹ̌tatal᷊ung Bal᷊em Mawu e. Dingangu kai seng i kitẹ ini e Wal᷊em Mawu, kereu i kitẹ e těbewe mal᷊aigasẹ̌ dingangu těbewe mạngiaking u makahombangbe apang kụ lẹ̌harapeng i kitẹ e.

7Ual᷊ingu ene, mẹ̌sul᷊ungkewen niwerang Rohkẹ̌ u Ruata e, "Kereu su ěllo ini e i kamene nakaringihẹ̌be tingih'u Mawu,

8ute kumbahang měmpẹ̌tungkětị u naung i kamene kere manga i upung i kamene, piạ i sire rụdendehẹ̌ su těngon Mawu, dingangu mạmanikạ Duata e su wanua l᷊inggi.

9'Sene, manga i upung i kamene měmpẹ̌nẹ̌nal᷊ukạ si Siạ dingangu měmpẹ̌mẹ̌manikạ Siạ,' angkuěng u Mawu Ruata, 'sěmbal᷊iau i sire seng nakasilo kakanoạ-Ku ěpạ u pul᷊o su taunge karěngụ e.'

10Hakịu ene Iạ limangehẹ̌ si sire kụ Iạ něhengetang, 'I sire měngkate sěntiniạ tawẹ satiane, ringangu masạgaěng tumuhụ kal᷊awọu tita-Ku e.'

11Iạ e limangehẹ̌ dingangu nẹ̌salu, 'I sire tawe sarung makapahunsuẹ̌ su wanua ene kụ makapěngirul᷊e sěngkapěngirul᷊e ringang-Ku.'"

12Manga anạ u sěmbaụ, pakapia wue kumbahangbe su tal᷊oarang kamene piạ u sěngkatau kụ naunge kereng karal᷊akise ringangu tawẹ pangangimange, hakịu i sie tumal᷊ikudẹ̌ kụ mẹ̌těngkarau wọu anun Duata kụ biahẹ̌!

13Kụ tadeạu tawẹu sarang sěngkatau wọu tal᷊oarang kamene kaakal᷊eng u rosa kụ lumawang Duata, ute karimạko i kamene měmpẹ̌sẹ̌sasasa l᷊awọ i kamene apang kal᷊aěllo e karěngụeweng i kitẹ deng biahẹ̌ su tempo isẹ̌sẹ̌ba "Ěllo Ini" su ral᷊ungu Winohẹ Susi.

14I kitẹ kěbị e kai sěhapikang su ral᷊ungu karadiahang dingang'i Kristus, asal᷊eweng sarang pěngěnsueěnge i kitẹ e mẹ̌tẹ̌tumpaedẹ̌be masěgadẹ̌ su pangangimang kụ tẹ̌taghuaneng i kitẹ dokeng su tětạ e.

15Kụ kai ini e kạbawohẹ su ral᷊ungu Bukẹ̌ Susi, "Kereu su ěllo ini i kamene makạdingihẹ̌ tingih'u Ruata e, kumbahang i kamene mẹ̌tungketị u těmbọ i kamene kerẹewe manga i upung i kamene, piạ i sire rụdendehẹ̌ su těngon Mawu Ruata."

16Ho, kai i sai-sai tangu nakaringihẹ̌ tingih'u Mawu Ruata e kụ dimendehẹ̌ si Sie? Bal᷊inewe i sire kěbị apang niahạ i Musa niapasěbang bọu Misirẹ̌ e tangu?

17Kụ kai waug'i sai tangu, Mawu Ruata e limangehẹ̌ gěnnangu ěpạ u pul᷊o su taunge karěngụ e? Kụ kai seng baug'i sire apang mararosa e, apang něngkapate su wanua l᷊inggi, arau ěng?

18Piạ Mawu Ruata e nẹ̌salu kere ini, "I sire sarung tawe mahunsuẹ̌ su wanua ene mědeạu makapěngirul᷊e sěngkapěngirul᷊e ringang-Ku" -- i sai wue tangu tẹ̌timonaěngu Mawu Ruata ěng? Timona'E ute kai waugu i sai-sain dụdendehẹ̌ Mawu Ruata e arau ěng?

19Kụ ini e nakaěnnạ e i kitẹ e u i sire tawe makapahunsuẹ̌, batụu i sire kawe tawe nangimang su Mawu Ruata.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Ibrani 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel