Alkitab Mobile SABDA
[VER] : [SANGIR]     [PL]  [PB] 
 <<  Ibrani 7 >> 

1I Melkisedek ini e kai ratung Salem dingangu imang u Mawu Karangetange. Piạ e i Abraham nạung nawal᷊ị bọu pẹ̌seketang kụ nakawatạ e manga ratu e, i Melkisedek diměnta naněnsomahẹ̌ dingangu něngal᷊amatẹ̌ si sie.

2Tangu i Abraham nẹ̌gěllịu sěngkapul᷊ong kapahiakengu kal᷊awọu arětạ kinauntungange. (Areng Melkisedek mangal᷊ene kahumotong-motongange ute kai, "Ratung Kaadilẹ̌"; kụ ual᷊ingu i sie kai ratun Salem, tangu arenge piạ l᷊ai mangal᷊ene, "Ratung Karal᷊unsemahẹ̌".)

3Mạanung Melkisedek ini e tawẹ tatualage waebe su apa u i sie piạ i amange arau i ninange arau i upunge; tawẹ apa lai wẹ̌ken sie mạanung kal᷊aiwantele arau kapapohonge. I sie kai mẹ̌sul᷊ungu Ahusu Ruata; i sie kai imang sarang karěngụ e.

4Kụ i kitẹ nakasilọ e sini u kai nạung apạ e kasěllahe i Melkisedek ini e; hakịu i Abraham i upung i kitẹ e, něngonggọu sěngkapul᷊ong kapahiakengu arětạ kinaěbakenge wọu pẹ̌seketang ene.

5Su ral᷊ungu toratu agamang Yahudi e seng nipato u, manga imang hěnton Lewi e hinong makaěbạ sěngkapul᷊ong kapahiakeng bọu ěbạu kawanuan Israel, bọu anạ u sěmbaụ i sire hala maningbe i sire mẹ̌sul᷊ung lawọ pal᷊ahiteng Abraham.

6I Melkisedek bal᷊inewe hěnton Lewi, kaiso i sie mal᷊aing měnẹ̌narimạ u sěngkatahạpul᷊ong kapahiakeng bọu patikụ apan nikauntungang i Abraham dingangu něngal᷊amatẹ̌ lai si Abraham ual᷊ingu i sie kawe seng kinawuakeng u manga pẹ̌kakědon Mawu Ruata e.

7Mamben tawe karendehang, u taumata kụ nial᷊amateng e kai limembong kasanạ e wọu taumata kụ něngal᷊amatẹ̌ si sie.

8Manga imang kụ apan nikawuakengu pẹ̌sěngkatahạpul᷊ong kapahiakeng e kai taumata kụ botonge mate. Arawe tumuhụ Bukẹ̌ Susi e; i Melkisedek kụ seng něnarimạ gaghěllị sěngkatahạpul᷊ong kapahiakeng e ene ute, kai taumata těbe wiahẹ̌.

9Botonge i kawera u, i Lewi -- e kai hěntone kụ manarimạ u sěngkatahạpul᷊ong kapahiakeng e wọu kawanuang Israel -- kụ mal᷊aing měmaehẹ̌ buạ e ene limiung Abraham su tempong i Abraham měmaehẹ̌ ene si Melkisedek.

10Manilaing i Lewi wodang ta nilẹ̌hanạ, kaiso wotonge i kawera u i sie seng ene su kal᷊uwaeng i upunge i Abraham, su tempong i Melkisedek nẹ̌sombang i Abraham.

11Su l᷊imang pěmamihingu manga imangu hiten Lewi e, torat'u agamang Yahudi e nionggọ su kawanuang Israel. Ual᷊ingu manga imang hiten Lewi nạung kal᷊amona e tawe makakakoạ sěngapa wọu apang hinong koateng i sire e, hakịu ene kai hinong piạ imang bal᷊ine, kụ mẹ̌sul᷊ungu Imang i Melkisedek, kụ sembeng bal᷊inewe lai niruị bọu ghal᷊ipohong hiten Harun!

12Ho, kamageng u pangkat'u manga imange mẹ̌bal᷊ui, ute torat'u agamang Yahudi e mal᷊aing hinong mẹ̌bal᷊ui.

13Kụ timonane sini ute kai Mawung kitẹ: i Sie kai wọu hěnto wal᷊ine, kụ bọu hěnto ene tawẹu sarang sěngkatau měmẹ̌munara munarang sěngkatau imang.

14Kěbị taumata e masingkạ u Mawung kitẹ e kai wọu hěntong Yehuda; ringangu i Musa e tawe něsẹ̌sěbạ u hěnto ene su tempong i sie mạhumbisarang hal᷊ẹ̌ u manga imang.

15Hal᷊ẹ̌ ipạhumbisara ini e mangkeng něngalembong katualage lai, kahian sasasěpụ u sěngkatau imang bal᷊ine kere i Melkisedek.

16I sie niruị nakoạ imang, bal᷊inewe ual᷊ingu pinẹ̌buakenge wọu kal᷊awọu parentang taumata e, kaiso kawe nẹ̌bua bọu pẹ̌bawiahe kawe kawasa e ringangu tawẹ pěhẹ̌pusange.

17Batụu su ral᷊ungu Bukẹ̌ Susi e niwera u, "I Kau e kai imang sarang karěngụ e, mẹ̌sul᷊ungu Imang Melkisedek."

18Kụ orasẹ̌ ini e atorang těbe e seng nipakal᷊iu, batụu seng mal᷊ongkọ dingangu seng tawẹ gunane.

19Torat'u agamang Yahudi e tawe makakoạ sarang manga apa kụ masukụ. Ual᷊ingu ene hakịu i kitẹ orasẹ̌ ini e nighěllirangu sěmbaụ pělaharapẹ̌ něngalembong kapiane; kụ kai ual᷊ingu ene hakịu i kitẹ e makạkaraning Duata e.

20Kutẹu l᷊ai patikụ ene rẹ̌děndinganengu l᷊ai sasalu wọu anun Duata e. Tawẹ apa pẹ̌sasalu kerene su tempong manga imang bal᷊ine e niruị.

21Arawe Mawu Yesus e niruị nakoạ imange kai piạ salune, su tempong Mawu Ruata e něhengetang si Sie, "Mawu e seng nẹ̌salu, kụ i Sie seng tawe měmal᷊ui kapulun'E, 'I Kau e kai imang sarang karěngụ e.'"

22Dingangu ene lai Mawu Yesus e nakoạ tatal᷊ung baugu sěmbaụ pẹ̌kakakědo kụ limembong kapiane.

23Piạko l᷊ai hal᷊ẹ̌ sěmbaụ: kụ manga imang bal᷊ine e kai mal᷊awọ, batụu i sire sěngkatau-sěngkatau e něngkairị, hakịu tawe makapěněpasu pangkat'i sire.

24Kai arawe i Yesus e wiahẹ̌ sarang karěngụ e, kụ pangkat'E kawe sěngkatau imange tawe nailasẹ̌ su taumata wal᷊ine.

25Ual᷊ingu ene sarang karěngụ e Mawu Yesus e makạsal᷊amatẹ̌ si sai-sai ruměnta su anun Mawu Ruata lumiun Sie, batụu i Sie e wiahẹ̌ sarang karěngụ e mědeạu mapẹ̌darumatingu kakindoạ su Mawu Ruata e waug'i sire.

26Kụ i Yesus e tangu kai Imang Mawantugẹ̌ gẹ̌gausang i kitẹ e. I Sie kai susi; kụ si Sie tawe kaěbakeng pẹ̌sasal᷊a, arau rosa měnsang a. I Sie nitěntani wọu taumata waradosa e, ringangu nihengkẹ sol᷊ong tampạ kụ něngalembong karangẹ e wọu manga l᷊angị e.

27I Sie wal᷊inewe kere manga imang mawantugẹ̌ bal᷊ine e, kụ apang kal᷊aěllo e měngkai mạnarakangu sasěmbae ual᷊ingken dosang sire hala nạung kal᷊amona e, bọu e wuhụewe ual᷊ingu kal᷊awọu rosang sěngkawanuaěnge. Mawu Yesus e kětạengbeng sěnsul᷊e něnarakang u sasěmbane waugu sarang marěngụ-děngụ, piạ e i Sie něnarakang u watangeng'E hala nakoạ sasěmba.

28Torat'u agamang Yahudi e kai mělẹ̌hengkẹ u taumata apang tawe masasukụ ipakakoạ imang mawantugẹ̌. Kaiso samuring toratẹ̌ ene, Mawu Ruata e nẹ̌taingu pẹ̌kakědone apidu nẹ̌salu u i Sie kai měhengkẹ u Ahuse makoạ Imang Mawantugẹ̌, e kụ seng nikoạ Měnanal᷊amatẹ̌ kụ nasukụ baugu sarang karěngụ e.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Ibrani 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel