Dual Panel1Banggilu patikụ pal᷊ahumbisara ini ute: I kitẹ kai mạnaghuang Imang i kitẹ Mawantugẹ̌ e kerene, kụ mạiang su koanengu Mawu Kasěllahenge su sorga kụ sěngkapẹ̌parenta ringang'E.
2I Sie mẹ̌děndal᷊eng u munarang sěngkatau Imang Mawantugẹ̌ e su Huang Kasusiange, kụ su ral᷊ungu Selong Mawu tutune, kụ nirarisị u Mawu e, wal᷊inewe ual᷊ingu kinoạ u taumata.
3Apang imang mawantugẹ̌ e niruị baugu iapạngěntudẹ̌ sasěmba arau laonggọ su Mawu Ruata. Kerene lai Imang i kitẹ Mawantugẹ̌ e; i Sie harusẹ̌be piạ manga apa-apa waugu isěmbane.
4Mangạewe i Sie ene su dunia ini, ute i Sie angkeěng tawe nakoạ imang, batụu kai seng piạ imang kụ měngẹ̌ngěntudu sasěmba tuhụewe tilakehu torat'u agamang Yahudi.
5Hal᷊ẹ̌ kẹ̌koateng i sire manga imang tumuhụ dal᷊enge ute kětạeng sěmbaụ sul᷊unge ringangu kěngkaung apạeweng su ral᷊ungu sorga e. Kụ ene sembeng niul᷊ịu Mawu Ruata e, si Musa nạung kal᷊amona, piạ i Musa nạung mapulu měmětị Selong Mawu e. Mawu něhengetang si Musa kere ini, "Pakapia wue! Kěbị e harusẹ̌be koạ u tuhụewe umbaghane kere nitodẹ si kamene su wowong bul᷊ude."
6Arawe orasẹ̌ ini tangu Mawu Yesus e kinawuakengu pangkatẹ̌ imang limembong kawantuge marau wọuten nịkakoạ u manga imang ene. Batụu pẹ̌kakakědo nikoạ'E sutal᷊oarang Mawu Ruata ringangu taumata ute kai pẹ̌kakakědo kụ něngalembong kapiane ual᷊ingu niwalang kědo waugu kal᷊awọu munara limembong kapiane.
7Mangạewe tawẹ apa sungkal᷊ene su pẹ̌kakakědo humotong e, tangu seng hinong tawahal᷊uasu piạ pẹ̌kakakědo karuane.
8Kai Mawu Ruata e seng nakaěbạ pẹ̌sasal᷊ang manga umat'E, hakịu Mawu Ruata e něhengetang, "Ene ěng, sarung mịdating tempone, Iạ sarung mẹ̌koạ pẹ̌kakakědo wuhu su tau Israel dingangu su tau Yehuda.
9Bal᷊inewe kere pẹ̌kakakědo kụ seng Takụ nikoạ baugu manga i upung i sire, su tempong Iạ něngahạ i sire niapasěbang bọu ěntanang Misirẹ̌ e. I sire tawẹ satiane su pẹ̌kakakědo Takụ kinoạ baug'i sire; kụ ual᷊ingu ene tangu Iạ tawe mẹ̌sasěmpị si sire.
10Arawe orasẹ̌ ini tangu kai ini e pẹ̌kakakědo kụ sarung Takụ koateng baugu kawanuang Israel, suapạeweng ěllo ramahi kạděntane, ungkuěngu Mawu: Iạ sarung mapal᷊ohong tita-Ku e su ěndumang i sire, ringangu wohekang su naung i sire. Iạ sarung makoạ Duatan sire, ringangu i sire sarung makoạ kawanua-Ku.
11I sire ta wahal᷊uasu mẹ̌tatěntiro lawọ sěmbalagheng, arau mẹ̌papaul᷊ị lawọ i sire anạ u sěngkatau, 'Kasingkạko Mawu Kasěllahenge.' Batụu i sire kěbị, bọu ghaghuwạ sarang darodọ sarung masingkạ u Iạ.
12Iạ sarungbe mangampung kal᷊awọu pẹ̌sasal᷊an sire, ringangu sembelaing tawe mẹ̌tahěndung kal᷊awọu rosan sire."
13Dingangu pěmamokạ u pẹ̌dariandi wuhu e sěmbaụ, Duata nẹ̌koạ pẹ̌dariandi humotong ene nakoạ maghurang dingangu natẹ̌be; dingangu apang kụ seng maghurang e sarung mal᷊ighạ lai maparung.