Alkitab Mobile SABDA
[VER] : [SANGIR]     [PL]  [PB] 
 <<  Kisah Para Rasul 13 >> 

1Su ral᷊ungu jamaatẹ̌ su Antiokia piạ manga nabi ringangu manga mananěntiro ute lěnnạu: i Barnabas, i Simeon isẹ̌sunggahị Si Maitung, i Lukius bọu Kirene, i Měnahem kụ niapakasaria ringangu Ratu i Herodes, dẹ̌duan Saulus.

2Piạ i sire kapẹ̌kẹ̌kal᷊iomanenge su Mawu ringangu měmpẹ̌pẹ̌puasa, Rohkẹ̌ u Ruata e něhengetang si sire, "Iạ e ghělirengkong Barnabas dẹ̌duan Saulus, baugu Iạ sẹ̌sa-Ku, tadeạu i sire apẹ̌koạ munara kụ seng Takụ nitilakehẹ̌ si rẹ̌dua."

3Bọuten nẹ̌puasa ringangu nẹ̌kal᷊iomaneng, i sire nanělliden lima si Barnabas dẹ̌duan Saulus, bọu e i rẹ̌dua e nirolohẹ̌.

4Ual᷊ingu kawe niroloh'u Rohkẹ̌ u Ruata e, tangu i Barnabas dẹ̌duan Saulus nẹ̌buạ e sol᷊ong Seleukia. Bọu ene i sire nẹ̌buạ sol᷊ong tahanusang Siprus.

5Sarạeng nahumpạ su Salamis, i sire němpěhabaren hengetangu Mawu Ruata e su apan kanisan tau Yahudi. I Yohanes Markus e mětẹ̌tul᷊ung i rẹ̌dua e su raral᷊engang.

6Kaguwạu tahanusa ene e napěpidẹ̌ si sire sarang Pafos. Pai sene i sire nẹ̌sombangken tau Yahudi sěngkatau arenge i Bar Yesus. I sie kai tau tahatariang makịtikạ u i sie kai nabi.

7I Sergius Paulus, guběrnurẹ̌ u tahanusa ene, kai hapị mapia ringangu tahatariang ene. Guběrnurẹ̌ ene kai tau pande ringangu pelẹesa. I sie kimui si Barnabas dẹ̌duan Saulus, batụu i sie mapulu rumaringihẹ̌ hengetang u Mawu Ruata.

8Kai i Barnabas dẹ̌duan Saulus rẹ̌dokateng i Elimas tau tahatariang ene, ual᷊ingu i Elimas (u kai ene e arenge su werang Yunani) kụ mětẹ̌tawakal᷊i tadeạu kumbahang sarang guběrnurẹ̌ ene mangimang su Mawu Yesus.

9Kutẹu i Saulus -- isẹ̌sěbạ l᷊ai si Paulus -- nẹ̌papinunụen Rohkẹ̌ u Ruata e kụ němandạ e mataedẹ̌ su tahatariang ene,

10mase nẹ̌bera, "Ei taha pěngakal᷊ẹ̌, anạ kawontogang! I kau e rokạ u patikụ munara mapapia e. Unụe i kau tawe mangědo měnggoghahẹ̌ karakin Duata e mědeạu mapakasal᷊amat'u taumata?

11Kụ ene kakěllạe, watụ u Mawu e mang měhukung i kau e! I kau sarung mawuta, sarang tawe makasilo tualagu matangěllo e arẹ̌gan sěngkatempo." Su orasẹ̌ ene lai i Elimas nakapěndang u kai piạ hiwụ maitung něnakạ matane, hakịu i sie rimal᷊eng e měsẹ̌sasaghipo mědẹ̌deạ taumata mědeạu pěnata si sie.

12Su tempon guběrnurẹ̌ ene nakasilọe apa nariadi e, i sie nangimang su Mawu Yesus, batụu i sie kai rimal᷊inaụ tạ sihinge su těntiro mạanun Mawu e.

13Bọu Pafos, i Paulus dingangkewelain manga hapị e němpěmundal᷊ẹ̌ sol᷊ong Perga su Pampilia. Sene i Yohanes Markus naněntang i sire, bọu ene nẹ̌sul᷊e sol᷊ong Yerusalem.

14Bọu Perga, i sire naněpasu raral᷊eng i sire sol᷊ong Antiokia su Pisidia, bọu ene su ěllon Sabatẹ̌ i sire simuẹ̌ nahungkaiang su ral᷊ungu kanisa.

15Sarạeng Bukẹ̌ i Musa ringangu Bukẹ̌ u Manga Nabi e nibawasa, manga těmbonangu kanisa e něndolohu taumata pakịbal᷊o si Paulus dingangu manga hapị e, "Manga anạ u sěmbaụ, kereu i kamene piạ manga sasasa pẹ̌sěmbaụ baug'i sire ini e, ute sal᷊amatẹ̌be měmpěhengetangu ene."

16I Paulus měngkatewe rimarisị, kụ bọu ene něnida ringangu limane, mase nẹ̌bera, "Manga anạ u sěmbaụ tau Israel ringangu i kamene wal᷊ine, kěbị apang sini kụ dudaringihẹ̌be su Mawu Ruata! Pěmpẹ̌daringihẹ̌ko si siạ:

17Duatan Israelẹ̌ e seng němile manga i upung i kitẹ e, kụ napakasěllahu umatẹ̌ ini piạ i sire nakoạ tau raghị su wanuan Misirẹ̌. Bọu ene kinahiang kawasan Duata masěllahẹ̌ e naněbang i sire wọu Misirẹ̌.

18I Sie nẹ̌tingkědang u pẹ̌kakakoạ i sire su kěhu l᷊inggi e ghěnnangu ěpạ u pul᷊o su taunge karěngụe.

19Umatẹ̌ pitung kawanuaěng su Kanaan nịpapukin'E mědeạu pẹ̌papahiakengu wanua ene su tau Israel makoạ tataghuaneng i sire.

20Kěbị ene mariadi ěpạ u hasụ limam pul᷊o su taunge karěngụ e. Samurin nẹ̌papahiạ u wanuan Kanaan ene, tangu Mawu Ruata něngonggọu manga mělahukung si sire. Kasamuriange kěbị mělahukung ene ute kai Nabi i Samuel.

21Bọu ene i sire nẹ̌dorong sěngkatau ratu. Kụ Mawu Ruata e něngonggọ i Saul anạ i Kish bọu hěnton Benyamin, mědeạu makoạ datun sire karěngụ u ěpạ u pul᷊o su taunge.

22Bọuten Mawu Ruata nělohos'i sie, Duata e něhengkẹ i Daud niapakakoạ datun sire. Kụ seng ini e nipěhengetang u Mawu Ruata e mạanun Daud, 'Iạ e seng nakahombang si Daud anạ i Isai e kai sěngkatau taumata mětẹ̌tatahino su naung-Ku. Seng i sie taumata sarung makawatụ kapulu-Ku.'

23Bọu hěnton Daud ene tangu Mawu Ruata e napasěpụ u sěngkatau Ratu Měnanal᷊amatẹ̌ kerẹewe sembeng nikědon'E. Kụ seng i Yesus ene e Ratu Měnanal᷊amatẹ̌ e.

24Kal᷊amonan i Yesus nanětạ u munaran'E, i Yohanes seng bọu němohang su taumatan Israel tadeạu i sire měmpẹ̌tobatẹ̌ bọu kal᷊awọu rosan sire ringangu isahani.

25Kụ maraning mạnguadipẹ̌ munarane, i Yohanes něbera su taumata, angkuěng: 'Kai i sai tangu iạ ini e tumuhụ kasingkạ i kamene? Iạ e wal᷊inewe Taumata lẹ̌ampal᷊eng i kamene e. Pẹ̌tahěndung Tau ene sarung duměnta samuring iạ; kal᷊ingung měluka sapatun'E e, iạ e mal᷊aing tawe wotonge.'

26Manga anạ u sěmbaụ pal᷊ahěnton Abraham, dingangu kěbị taumata wal᷊ine apang sini kụ matuhụ su Mawu Ruata! Duata e seng něndohong habaru kasasal᷊amatẹ̌ ene si kitẹ;

27batụu taumata apang mětẹ̌tanạ su Yerusalem dingangu manga těmbonang i sire e tawe nakaěnna u kai seng i Sie ene e mananal᷊amatẹ̌ e. I sire tawe nakahěngang těntiron manga nabi e kụ seng bẹ̌basaěng apang ěllong Sabatẹ̌, hakịu i sire něhukung i Yesus. Kaiso ual᷊ingkewen pẹ̌kakoạ kerene tangu nakawodaịewe kaghaghanapu apan seng nitěbal᷊u manga nabi e.

28Maningbeng i sire tawe makahombang pẹ̌sasal᷊a apạ e si Sie kụ makakahukungu hukumang papate e, kaiso i sire kawe mědẹ̌dorong si Pilatus tadeạu i Sie pakịpate.

29Kụ sarạeng i sire nasue němpẹ̌koạ kěbị apang kạbawohẹ su ral᷊ungu Winohẹ Susi, i sire napal᷊intụem bal᷊unangu wadang'E wọu kalu kuruisẹ̌, bọu ene nipěllọ su ral᷊ungu lěbing.

30Kai Mawu Ruata e napẹ̌biah'i Sie kapia wọu papate.

31Bọu ene ghěnnangu pẹ̌taha pira ěllo e i Sie měngkate rụděnta měnodẹ u watangeng'E su taumata apan seng bọu riměnta ringang'E wọu Galilea sol᷊ong Yerusalem. Seng i sire ene kụ orasẹ̌ ini e nakoạ mẹ̌sasahidin Sie su manga umat'u Israel.

32Kụ orasẹ̌ ini e i kami mělẹ̌habaru Injilẹ̌ ene si kamene: Apang kụ seng nikědo su manga i upung i kitẹ e,

33ene tangu seng nikoạ e si kitẹ dingangu napẹ̌biah'i Yesus kapia wọu papate. Batụ u su ral᷊ungu bukẹ̌ u Mazmur karuane piạ kạbawohẹ, 'Seng i Kau e Ahusẹ̌-Ku, kụ su ěllo ini tangu Iạ seng makoạ i Amang'U.'

34Mawu Ruata e seng napẹ̌biah'i Sie kapia wọu papate. Kụ orasẹ̌ ini e i Sie seng tawe lai sarung makahombang papate su ral᷊ungu kubul᷊ẹ̌. Kụ baugu hal᷊ẹ̌ ene, Mawu Ruata e něhengetang, 'Iạ sarung měngonggọu pẹ̌kakědo susi kụ sarung ipakasěhụ, kerẹewe seng Takụ pinẹ̌kědo si Daud.'

35Kerene lai su ral᷊ungu ayetẹ̌ wal᷊ine niwera u, 'I Kau e sarung tawe mapakawalan Ěllang'U satia ene mawuhụ su ral᷊ungu lěbing.'

36I Daud seng nate, kụ nilěbing sěngkal᷊ěbing dingang i upunge, samurin sie nẹ̌koạ apang pakịkoạ u Mawu Ruata e si sie. Maiet'i Daud mal᷊aing seng nasue nahenẹ kěbị.

37Arawe i Yesus, kụ seng niapẹ̌biah'u Ruata kạpia wọu papate e, kai i Yesus e tawe nasue nahenẹ.

38Ual᷊ingu ene, manga anạ u sěmbaụ, i kamene hinong masingkạ u kai wọu anun Yesus ini e habaru kal᷊aampungu rosa e ipakịhabarẹ̌ si kamene; i kamene hinong masingkạ u apan taumata kụ mạngimang si Sie e, ipakal᷊iwirẹ̌ bọu kal᷊awọu rosa kụ tawe ikarědasẹ̌ ual᷊ingu wọu manga titan Duata kụ ilẹ̌habar'i Musa.

39(13:38)

40Ual᷊ingu ene i kamene hinong pakapapia tadeạu, kumbahang sarang mariadi si kamene apang niwerang manga nabi ini e,

41'Tatingangko pakapia-pia, ei kamene taumata apam puluang měhinakang! I kamene e sarung měngkaherang, mase mate! U su tempo ini Iạ e kapẹ̌kẹ̌koạ e munara kụ i kamene hala e sarung tawe měmpangimang u ene, maningbe piạ u měnualagẹ̌ si kamene.'"

42Ene piạ i Paulus dẹ̌duan Barnabas naněntangu kanisa ene, i sire su kanisa e mědẹ̌dorong tadeạu i sire saụ mẹ̌sul᷊e kapia su ěllon Sabatẹ̌ tuhụ e, saụ měnualagu manga hal᷊ẹ̌ ene e pakaunsui.

43Samurin sasẹ̌bangu taumata wọu kanisa e, i Paulus dẹ̌duan Barnabas e nitol᷊eěngu tau Yahudi mal᷊awọ dingangu taumata wọu umatẹ̌ bal᷊ine kụ seng nasowa agamang Yahudi. Tangu manga rarolohang ene něnasa si sire e tadeạu i sire e hanesẹ̌ měngumbala su kakěndag'u Mawu Ruata.

44Su ěllon Sabatẹ̌ tuhụ e, marani kěbị dal᷊ohon soa e riměnta mẹ̌daringihẹ̌ hengetangu Mawu.

45Kai sarạeng tau Yahudi e nakasilo taumata l᷊awọ e, i sire kai něngkapenẹ u sasasingking. I sire mạnungkeang si Paulus dingangu rụdendehẹ̌ patikụ apang iwẹ̌berane.

46Kai něngalembo laing kawahanine i Paulus dẹ̌duan Barnabas měngkatewe mẹ̌bẹ̌bera mahatedẹ̌. Ungkuěng i sire, "Hengetang u Mawu e mambeng hinong ihabarẹ̌ si kamene kal᷊imona. Kaiso ual᷊ingu i kamene kawe tawe mapulu měnarimạ u ene, i kamene seng něnantu hala u i kamene ta hinone měnarimạ u pẹ̌bawiahẹ̌ tutune ringangu kakalẹ̌. Kụ ini e i kandua něněntang i kamene kụ mẹ̌bihu bansa wal᷊ine.

47U kai ini e laorong Mawu e si kami; Mawu e něhengetang, 'Iạ e seng něnilakeh'i kamene e makoạ sěmbaụ tualagẹ̌ baug'u kal᷊awọu taumata wansa wal᷊ine kụ bal᷊ine Yahudi, tadeạu i kamene makakarěntambeng kasasal᷊amatẹ̌ baugu patikụ dunia.'"

48Piạ e umatẹ̌ bal᷊ine tau Yahudi nakaringihẹ̌ ene, i sire měngkate mal᷊ua-l᷊uasẹ̌, bọu e mědẹ̌dalo e hengetangu Mawu e. Mase taumata apan seng nịtataning Duata mědeạu makahombang pẹ̌bawiahẹ̌ tutune ringangu kakalẹ̌, i sire ene e nangimang.

49Hengetang u Mawu e mal᷊aing nasawuhẹ̌ su patikụ tampạ su kạguwạu wanua ene.

50Arawe manga adimal᷊ạ u soa ene ringangu manga wawine matatuhasẹ̌ měngkatakụ u Mawu e tangu, sẹ̌sahowongang u taumatan Yahudi e. I sire mapạl᷊ěton pẹ̌sasitori waug'i Paulus dẹ̌duan Barnabas, kụ měnokol᷊'i rẹ̌dua wọu wanua ene.

51Tangu manga rarolohang e němpanontong u awul᷊ẹ̌ su laed'i rẹ̌dua e su těngon sire e nakoạ kere tatahěndung, bọu e nakoạ sol᷊ong Ikonium.

52Manga muritẹ̌ su Antiokia e měngkate mal᷊ua-l᷊uasẹ̌ dingangu něngkapenẹ u Rohkẹ̌ u Ruata e.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Kisah Para Rasul 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel