Alkitab Mobile SABDA
[VER] : [SANGIR]     [PL]  [PB] 
 <<  Kisah Para Rasul 17 >> 

1I Paulus dẹ̌duan Silas naněpaseng daral᷊eng i sire nisaheng Ampipolis dingangu Apolonia bọu e nahumpạ u Tesalonika. Sene kai piạ kanisan Tau Yahudi e.

2Tangu i Paulus mal᷊aing nakoạ sol᷊ong kanisa ene -- mẹ̌sul᷊ungkewe tundune kẹ̌koatenge kereu piạ kanisa'n tau Yahudi sěmbaụ e -- wọu e měmpẹ̌dẹ̌dal᷊ahintau ringangu apạeweng sene e mạhumbisarang hal᷊ẹ̌ u manga ayetẹ̌ su Winohẹ Susi e. I sie nẹ̌koạ ene e karengụewen těllung ka Sabatẹ̌ mẹ̌tẹ̌tatuhụ.

3Su ral᷊ungu ayet'u Winohẹ Susi e i sie měnẹ̌nualagẹ̌ dingangu mělẹ̌lahẹ u Ratu Mananal᷊amatẹ̌ kụ seng nikědon Mawu Ruata e hinong mẹ̌dararagu sigěsạ dingangu mẹ̌biahẹ̌ kapia wọu kapapohong'E. "I Yesus takụ ilẹ̌habarẹ̌ si kamene e, i Sie kai Ratu Mananal᷊amatẹ̌ kụ seng nikědo e," angkuěng i Paulus.

4Pirang katau němpangimang mase timol᷊e si Paulus děduan Silas; kerene lai kal᷊awokange wọu tau Yunani kụ mạtakụ u Ruata, dingangu l᷊awọ lai manga wawine lẹ̌adateng.

5Arawe tau Yahudi e kawe sụsingking. I sire měmpẹ̌kẹ̌kui taumata apang lụliongahẹ̌ su apan dal᷊eng kụ nẹ̌koạ komol᷊ang u ghanohạ. Tangu i sire něnggohaengke su kạguwạu soa e, mase němpěngalọ e wal᷊en sěngkatau mạngimang isẹ̌sěbạ si Yason pědẹ̌deakeng si Paulus dẹ̌duan Silas, u i sire kai mapulu makisěbang i Paulus dẹ̌duan Silas ipẹ̌těngon taumata l᷊awọ.

6Ual᷊ingu piạ i sire kawe ta nakaěbạ si Paulus dẹ̌duan Silas ute, něhiude si Yason dingangkewelain taumata mạngimang bal᷊ine e manga pirang katau sol᷊ong těngon manga mapapangkatẹ̌ apang piạ kawasane su soa ene. I sire němpẹ̌heang u, "I rẹ̌dua ini e kai měmpẹ̌gěnggohaeng suapan tampạ! Orasẹ̌ ini e soang kitẹ e mal᷊aing seng nirěntaěng i rẹ̌dua,

7kụ i Yason seng něnarimạ i rẹ̌dua su wal᷊ene. I sire kěbị e tangu lụl᷊ampa kal᷊awọu titang kaisar'u Roma, batụu i sire kai měbẹ̌bera u piạbe lai ratu wal᷊ine kụ arenge i Yesus."

8Dingangu manga wawera ene tangu nakapẹ̌gěgahẹ̌ taumata l᷊awọ e ringangu apạeweng mangangawasa e su soa ene.

9Mase manga mangangawasa e nangoro si Yason dingangu taumata mạngimang bal᷊ine e pěgẹ̌gěllịu wawaehe. Bọu ene wuhụewe i rẹ̌dua e pakipěllọ.

10Su hěbi ene taumata mạngimang su soa ene něndoloh'i Paulus děduan Silas apakạkoạ sol᷊ong Berea. Nahumpạ e sene, i Paulus děduan Silas nakoạ sol᷊ong kanisang tau Yahudi.

11Taumata su Berea e něngalembong mạbawuka naunge wọu i sire apang su Tesalonika. Měngkate apa mal᷊uasẹ̌ naung i sire nakaringihẹ̌ běkeng habaru Mawu Yesus, kụ bọu e ěllo-ěllo i sire měmpạnaněsui Winohẹ Susi mědeạu makạkasingkạ u měnsang kahěngang bue těntiron Paulus.

12Lawọ bọu tal᷊oaran sire mạngimang su Mawu Yesus, ringangu wal᷊inewe lai mahal᷊i tau Yunani mapapia e němpangimang; baẹ bawine ringangu waẹbe lai esẹ e.

13Piạ e tau Yahudi su Tesalonika nakaringihẹ̌ u i Paulus selaing mělẹ̌habaru hengetangu Mawu su Berea, tangu i sire mal᷊aing nahunděnta su Berea kụ měmpěnẹ̌nahowong dingangu mapěbẹ̌bimbong u apang taumata sene.

14Dingangu masahawụ-sahawụ manga anạ u sěmbaụ su Berea e něnonda si Paulus sol᷊ong apeng, arawe i Silas dẹ̌duan Timotius měngkate těbe měmpẹ̌tẹ̌tanạ su soa ene.

15Bọuten nanonda si Paulus sol᷊ong Atena, manga anạ u sěmbaụ ene e nẹ̌sul᷊e sol᷊ong Berea něhabaru tatanatang Paulus tadeạu i Silas dẹ̌duan Timotius apẹ̌tẹ̌tuhụ si sie sěngapang kal᷊ighạ e.

16Ene i Paulus kạpẹ̌ngẹ̌ngampal᷊e si Silas děduan Timotius su Atena, naunge měngkate apa kiměndụ u nakasilọ e soa e měngkatewe napenẹ u pakal᷊uang.

17Ual᷊ingu ene tangu i Paulus měngkate mědẹ̌dal᷊ahintau ringangu tau Yahudi ringangkewen taumata wal᷊ine apang mạněmba Mawu su tampạ ene, su kanisa e. Kerene lai su manga pasarẹ̌, ěllo-ěllo i sie měngkate měkẹ̌kakereapa ringangu apạeweng taumata sene.

18Manga mananěntiro wọu ghal᷊ipohon Epikuros dingangu ghal᷊ipohon Stoa měmpẹ̌dẹ̌darendehẹ̌ lai ringange. Pirang katau wọ'i sire nẹ̌bera, "Tau ini e masingkạ u a? Kasingkạ e kětạbeng kadodọ, kai arawe mohonge matanantadẹ̌!" Sěnggạ ete wue ute nẹ̌bera u, "Luhude i sie kai mělẹ̌habaru mahang duata wọu wansa wal᷊ine." I sire němpẹ̌bera kerene, ual᷊ingu i Paulus mělěhabaru kakakoạ u Mawu Yesus ringangu mạanun pẹ̌bawangung'E kapia wọu kapapohong'E.

19Mase i sire němaringang i Paulus sol᷊ong pẹ̌sasasombang su Wul᷊ud'u Areopagus. Kụ sene i sire němpẹ̌berạ e si sie, "I kami e mapulu masingkạ u těntiro wuhu ilẹ̌habaru ene.

20Batụ u i kau kai mělẹ̌habaru hal᷊ẹ̌ buhu ikẹ̌karingihu tul᷊ing kami e. Kụ ual᷊ingu ene tangu i kami e reng mapulu masingkạ u měnsang kai apa mangal᷊ene."

21(Batụ u tau Atena kěbị-kěbị e ringangu taumata raghị apang měmpẹ̌tẹ̌tanạ sene e měngkai papuluang měngěnsuẹewe tempon sire su l᷊oahe ipědẹ̌daringihẹ̌ dingangu měmpahumbisarang hal᷊ẹ̌ buhu ikẹ̌karingihẹ̌ e.)

22Su tempong i Paulus dụdarisị su těngon taumata apang měmpẹ̌tẹ̌tampung su Areopagus e, i Paulus nẹ̌bera, "E i kamene tau Atena! Iạ makạsahidi u su ral᷊ungu patikụ munara e i kamene manga anạ u sěmbaụ měngkate mal᷊aagama.

23Batụ u piạ iạ kapẹ̌daral᷊enge mạngělikụ soang kamene e ringangu tụtatingangke manga tampạ u pẹ̌kakal᷊iomanengang i kamene, ute iạ nakasilo l᷊ai tampạ u pěmaměllokang sasěmba sěmbaụ, kụ sene piạ kạbawohẹ, 'Su Ruata kụ ta nikẹ̌kahěnganeng.' Kụ kai su Ruata sẹ̌sěmbaěng i kamene, katewe i kamene wěga wue, u kai seng i Sie takụ ilẹ̌habarẹ̌ si kamene.

24Duata e něndiadi dunia ini ringangu patikụ dal᷊ohone, ute kai Mawun langị dingangu dunia e. I Sie mal᷊aing tawe mẹ̌tatanạ su ral᷊ungu wal᷊en mahang duata koạ u l᷊iman taumata.

25I Sie mal᷊aing tawe mẹ̌gaghausẹ̌ manga apa wọu taumata, u kai i Sie mạngonggọu pẹ̌bawiahẹ̌ dingangu singongo ringangkewelain patikụ sạbarang su taumata e.

26Bọuten sěngkatau taumata e, i Sie napakariading patikụ bansa ringangu nangoro si sire ipělẹ̌loho kạguwạu dunia e. I Sie lai něnilakehẹ̌ deng dokeng bọu tětạ e měnsang su tempo sude arau su tampạ sude i sire wotonge makapẹ̌biahẹ̌.

27Mawu Ruata e nẹ̌koạ ene tadeạu i sire mědeạ si Sie. Mal᷊owọko i sire mẹ̌sombang dingang'E su tempong i sire kapědẹ̌deạ e. Kai tumuhụ hinone Ruata e tawẹ kararaune wọu anung kitẹ sěngkatau-sěngkatau e.

28Kerẹewe ipẹ̌paul᷊ị u taumata e, 'I kitẹ e ipěbẹ̌biahẹ̌ dingangu kụkanoạ dingangu měbẹ̌biahẹ̌ su dunia ini e kai ual᷊ingu kawasan'E.' Mẹ̌sul᷊ungu lai ilẹ̌habaru tahaanang berang kamene. 'I sire němpẹ̌bera u, i kitẹ kěbị e kai manga anạ'E.'

29Ho, ual᷊ingu i kitẹ e kawe manga pal᷊ahanạ u Mawu e, ute i kitẹ tawe wotonge mangěnnau Ruata e kawe tabidạu mẹ̌sul᷊ungu tul᷊ada wọu wul᷊aeng arau sal᷊aka arau watu nikoạ tuhụ kapandeng taumata.

30Tempong kawawodoki kitẹ e seng nipakawěgan Duata, arawe orasẹ̌ ini e i Sie něndolohu patikụ taumata su kạguwạu dunia e pětẹ̌tobatẹ̌ bọu manga rosan sire e.

31Batụ u i Sie kai seng namoěngu ěllo sahěllo waugu mapẹ̌gutang kasěllahu dunia e tuhụ kạadile. Hal᷊ẹ̌ ene sarung koateng u sěngkatau pinilen Duata e samatang baugu hal᷊ẹ̌ ene. Ringangu l᷊ai tadeạu patikụ taumata e maiaking u hal᷊ẹ̌ ene, u Ruata e seng napẹ̌biahẹ̌ kapia tau ene wọu kapapohong'E!"

32Sarạeng i sire nakaringihẹ̌ u nakasasẹ̌bạeng pẹ̌bawiahẹ̌ kapia wọu papate, tangu piạ u wọu i sire nahul᷊ěgẹeng Paulus. Piạ u l᷊ai nẹ̌bera, "I kami e mapulu mẹ̌daringihẹ̌ si kau e mẹ̌bisarang hal᷊ẹ̌ ini."

33Mase i Paulus naněntangkeng komol᷊ang ene.

34Kutẹu piạ u sutal᷊oaran sire mạnumbẹ̌ka wọ'i Paulus dingangu mạngimang su Mawu Yesus, kere i: Dionisius sěngkatau wọu ral᷊ohon majelisẹ̌ u Areopagus, ringangu sěngkatau wawine arenge i Damaris, dingangu l᷊ai manga pirang katau.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Kisah Para Rasul 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel