Alkitab Mobile SABDA
[VER] : [SANGIR]     [PL]  [PB] 
 <<  Kisah Para Rasul 18 >> 

1Bọu ene i Paulus naněntang u Atena kụ nakoạ sol᷊ong Korintus.

2Sene i sie nẹ̌sombangken sěngkatau Yahudi arenge i Akwila, tau wọu soan Pontus. I Akwila buhụ e lai simongo wọu Italia ringangu kawinge i Priskila. I sire riměnta sol᷊ong Korintus batụu i Kaisar Klaudius seng něndolohu kěbị taumatan Yahudi e apạsěbang bọu Roma. I Paulus tamai nẹ̌tiwo si rẹ̌dua,

3mase nẹ̌tanạ sene ringang'i sire, kụ něhal᷊ẹ̌ sěngkapěhal᷊ẹ̌ batụu hambaki sire e kai mẹ̌sul᷊ungu hambaki Paulus, kụ kai měkẹ̌koạ těndạ.

4Arawe su ěllon Sabatẹ̌ e i Paulus tamai naněntiro su kanisa mědeạu makakariading tau Yahudi ringangu lai tau Yunani e mangimang si Yesus.

5Ene sarạeng i Silas dẹ̌duan Timotius narěntạ e wọu Makedonia, i Paulus měngkatewe mangěnsuẹen tempone waugu měhabaru injilẹ̌ bọu anun Duata e su tau Yahudi u i Yesus e kai Ratu Mananal᷊amatẹ̌ e nikědon Duata.

6Kai ual᷊ingken taumata e měngkate hanesẹ̌ dụdokạ dingangu mělẹ̌hinakang si sie, ute i Paulus měngkatewe něnontongu awul᷊ẹ̌ bọu pakeange, kere sěmbaụ tatialan pẹ̌tatahěndungangu pẹ̌sasal᷊ang sire. I sie nẹ̌bera u, "Kereu i kamene masilakạ, ute ene sembeng sal᷊ang kamene hala! Iạ e wěga wue! Kụ manětạ bọu orasẹ̌ ini tangu iạ sarung makoạ sol᷊ong anun sire wal᷊ine tau Yahudi e."

7Bọu e i Paulus naněntangken sire kụ nětanạ e su wal᷊e su sěmběkang kanisa e. Bal᷊e ene kai wal᷊eng sěngkatau wal᷊ine tau Yahudi e, kaiso i sie kawe měnẹ̌němba Ruata. Arengu tau ene ute kai i Titius Yustus.

8Arawe i Krispus těmbonangu kanisa e ringangkewe kal᷊awọu ral᷊ohong bal᷊ene e mạngimang su Mawu Yesus. Dingangu mal᷊awọ l᷊ai taumatang Korintus bal᷊ine e rụdaringihẹ̌ těntirong Paulus, mase i sire mạngimang su Mawu Yesus kụ bọu ene sahaniang.

9Su sěhěbi tangu sural᷊ungken sěmbaụ papasilo e, Mawu e něhengetang si Paulus, "Abe katakụ! Měngkate pěněntiro kụ abe karěmmasẹ̌.

10U Iạ e ruměndingang si kau. Tawẹu sarang sěngkatau makapẹ̌koạ dal᷊akị si kau, u kai lawọ taumata su soa ini e kai taumata-Ku."

11Ual᷊ingu ene i Paulus nẹ̌tanạ su Korintus sěntaung dingangu ěnnung u wul᷊ang karěngụ e kụ měnẹ̌něntirong hengetang u Mawu e si sire.

12Piạ e i Galio nakoạ guběrnurẹ̌ u Akaya, tau Yahudi e měngkatewe sěnsunduang dumokạ si Paulus, mase manuẹ̌ i sie su pěnggaghutaěng.

13I sire naul᷊ịeng kabaratang ini, "Tau ini e mạmirahi taumata l᷊awọ e tadeạu pěnẹ̌němba Ruata kụ tawe nẹ̌tatal᷊ahino ringangu torat'i Musa!"

14Kutẹu piạ i Paulus mapulu sumimbahẹ̌, Galio seng nẹ̌bera su tau Yahudi, "E tau Yahudi! Kereu ipẹ̌pangaduhang ini e kai sěmbaụ dal᷊awang arau sěmbaụ kakanoạ dal᷊akị, tangu hinone iạ mang mẹ̌sabaru pangaduhang i kamene ini.

15Kaiso ini e kawe pẹ̌dararendehu wawera ringangu manga areng ore lai manga torat'i kamene hala e! Kụ mang i kamene hinong mapakal᷊iung kěbị ene. Iạ e reng mạdiri měhukung u manga hal᷊ẹ̌ kere ini!"

16Bọu ene i Galio něnokol᷊i sire niapasěbang sarang l᷊ikude.

17Tangu i sire něnamẹ si Sostenes těmbonang'u kanisa e, kụ naměbahẹ̌ si sie su těngon medang pěnggaghutaěng e. Arawe i Galio mang ta kadionge mẹ̌sěmpị u hal᷊ẹ̌ ene.

18Bọu ene i Paulus bědang mětẹ̌tanạ marěngụ su Korintus. Bọu ene i sie něberạeng sal᷊amatẹ̌be matěntang su kěbị taumata mạngimang su tampạ ene, bọu ene němundal᷊e, ringang i Priskila rẹ̌duang Akwila sol᷊ong Siria. Su Kengkrea i Paulus nakilungguhu utạ e nạung seng nịbawalane niapakanandu ual᷊ingu kědone su Mawu.

19Ene narěntạe su Efesus, i Paulus naněntangken Priskila rẹ̌duang Akwila bọu e simuẹ̌ sol᷊ong dal᷊ungu kanisa kụ měkẹ̌kakereapa ringangu tau Yahudi sene.

20I sire měgẹ̌gausẹ̌ u tadeạu i sie reng apakạdarěnna mẹ̌tanạ dingangi sire, kaiso i sie tawe mapulu.

21Maningbe kerene, kai su tempong i sie sarung měbuạ e, i sie nẹ̌bera u, "Kereu Mawu Ruata e mapakawala, ute iạ saụbe mẹ̌sul᷊e kạpia su tampạ ini." Bọuten nẹ̌bera kerene i sie něbuạ e wọu Efesus.

22Ene nal᷊intụ e su Kaisarea, i sie nakoạ sol᷊ong Yerusalem nẹ̌gěllịeng adatẹ̌ su ral᷊ohong jamaatẹ̌ sene, bọu ene natěpasu Antiokia.

23Wọuten nẹ̌tanạ sene sěngkatempo e, i sie saụete wue namundal᷊ẹ̌, něniatạ ěntanang Galatia ringangu Prigia mědeạu měmpanoghasẹ̌ pangangimangu ral᷊ohon jamaatẹ̌.

24Tangu piạko tau Yahudi sěngkatau wọu Aleksandria arenge i Apolos, narěnta su Efesus. I sie kai pande mahumbisara ringangu masingkạ-singkạ u ral᷊ohong Binohẹ Susi e,

25kutẹu seng nitěntiroěngu mẹ̌kiral᷊a těntiro mạanun Yesus. Tangu i sie měngkai mạněntiro ringangu kakakěhagẹ̌ dingangu měngkai maudu-udupẹ̌ maněntiro mạul᷊ị u i Yesus, maning buhụ e hal᷊ẹ̌ u pěnanahaning Yohanesẹ̌ e singkạ e.

26Dingangu tawẹ goẹ̌ e i Apolos nanětạ e měbẹ̌bisara su ral᷊ungu kanisa piạ e i Priskila rẹ̌duang Akwila rụdaringihẹ̌ těntirone, i sire němpěmaringangken sie sol᷊ong bal᷊e. Sene i sire měnẹ̌nualagẹ̌ si sire něngalembo l᷊ai katumange mạanun daral᷊engu munarang Mawu baugu kasasal᷊amat'u taumata wọu i Yesus Kristus.

27Bọu ene e i Apolos kai piạ kapulune makoạ sol᷊ong Akaya. Tangu taumata apang mạngimang su Mawu Yesus su Efesus němohẹ u suratẹ̌ su manga anạ u sěmbaụ apang mạngimang su Akaya e tadeạu i sire mapulu měnarimạ i Apolos. Kụ piạ e i Apolos narěnta e su Akaya, pẹ̌tatul᷊unge mambeng nal᷊ahẹ u piạ gunane masaria su apan taumata kụ ual᷊ingu kakěndagu Mawu Ruata e seng nangimang su Mawu Yesus.

28Batụ u apạ e makạl᷊ahěngking, kụ i Apolos nakawatạ tau Yahudi e su hal᷊ẹ̌ u pẹ̌dararendehẹ̌ su těngong l᷊awọ. Kụ i sie mělẹ̌lahẹ u wawerang Binohẹ Susi u kai i Yesus Datu Mananal᷊amatẹ̌ nikědo e.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Kisah Para Rasul 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel