Dual Panel1I Agripa e nẹ̌bera si Paulus, "I kau e seng botonge mẹ̌bisara manondan tul᷊idu watangeng." Tangu i Paulus něhengkẹen limane kụ něhabaru tul᷊ide kere ini,
2"I Tuan Datu Agripa lẹ̌adateng! Iạ e su pěndangengku mambeng nẹ̌barauntu nakapanondan tul᷊idẹ̌ku kụ su těngon Mawu Ratu, mạanụeng kěbị pangaduhang ilẹ̌ěnsilu tau Yahudi e si siạ;
3kahumotong-motongange ual᷊ingu Mawu Ratu e masingkạ-singkạ u adatẹ̌ dingangu kakakoạ u tau Yahudi e. Ual᷊ingu ene, iạ mědẹ̌dorong mal᷊owọko i Tuang deng dumaringihẹ̌ tatualagẹ̌ku e pakapia-pia.
4Patikụ taumatan Yahudi e masingkạ u pěbawiahẹ̌ku e reng dokeng mangudạ. I sire masingkạ u rokeng iạ deng mangudạ e, iạ seng nẹ̌biahẹ̌ sutal᷊oarang kawanuaku e su Yerusalem.
5Seng marěngụ i sire masingkạ u iạ. Kụ kereu i sire mapulu, ute i sire wotonge makapangonggọ u sasahidi u rokeng kal᷊imona iạ seng nẹ̌biahẹ̌ mẹ̌sul᷊ungu tau Farisi kụ tutuhụ patikụ atorang kal᷊ahětiwange su ral᷊ungu agamang kami.
6Kụ ini e iạ dụdarisị sini mědeạu pakighuta ual᷊ingu iạ mạngimang u pẹ̌kakakědo nikoạ u Ruata e su manga i upung i kami.
7Pẹ̌kakakědo ene lai lẹ̌antiwang u hěnton sire mapul᷊o dua wọu kawanuang Israel hakịu i sire měngkate měmpẹ̌tẹ̌tahamawu Ruata e ěllo hěbi. Kụ ual᷊ingkewe lai seng nẹ̌tatapengu iạ e mangimang u pẹ̌kakakědo ene, mawu ratu, iạ e pạnokeěng u pẹ̌sasal᷊a kahian tau Yahudi e.
8Unụe wue manga anạ u sěmbaụ taumatan Yahudi e tawe makapangimang u Mawu Ruata e mapẹ̌biahu taumata nate?
9Nạung iạ sẹ̌saku mal᷊aing mạngěnna u iạ harusẹ̌ mẹ̌koạ patikụ kakanoạ ipěndokạ si Yesus tau Nazaret ene.
10Kụ kai seng ěndaị ene takụ nikoạ su Yerusalem. Tangu piạ e suratu kawasa wọu manga imang těmbonange, iạ e seng něnahungkụ u taumata l᷊awọ apan masatia su Mawu Ruata. Iạ e mal᷊aing sěnsunduang u i sire ihukung pateěng.
11Kasauange iạ manigěsạ si sire su manga kanisa, tadeạu měnihasa si sire mẹ̌sunial᷊u apang lẹ̌imangeng i sire. Karạu katẹ̌tịu naungku e si sire, hakịeweng mědẹ̌datingu manga soa wal᷊ine e iạ tamai měnahusu si sire tamai sene."
12"Ual᷊ingken timona ene lai tangu iạ e nẹ̌bawa suratu kawasa wọu manga imang těmbonange kụ nakoạ sol᷊ong Damsyik.
13Kụ su tempong iạ kạdal᷊enge ěllo rangẹ, Tuang Mawantugẹ̌ e, iạ nakasiloko tualagẹ̌ bọu l᷊angị namal᷊iu tualagu matangěllo. Tualagẹ̌ ene simarang nělikụ si siạ dingangu manga ringangku.
14I kami kěbị e nasue něngkawatang su ěntana. Mase iạ e nakaringihẹ̌ tingihẹ̌ nẹ̌kui si siạ su werang Ibrani, 'Saulus, Saulus! Kawe unụe i kau měngkate sěntiniạ mẹ̌děndariha si Siạ? I kau sẹ̌sanu sarungbe makapěndang masakị, kereu i kau e měngkate hanesẹ̌ dụdokạ těntiron Mawunu e.'
15Tangu iạ nakiwal᷊ọ e, 'Kai i sai i Kau e Mawu?' Kutẹu Mawu e simimbahẹ̌, 'Iạ e kai i Yesus kụ nạung dẹ̌darihangu.
16Pẹ̌bangungke kụ darisị! Iạ e mẹ̌těngkatodẹ u watangengku si kau mẹ̌deạu měhengkẹ i kau makoạ mẹ̌tatangkiang si Siạ. I kau harusẹ̌be pěhabarẹ̌ su taumata wal᷊ine apang kinasilonu sahěllo ini mạanung Iạ dingangu apang sarung Takụ ilahẹ si kau su tempo ramahi kạděntane.
17Iạ e sarung měnggeang i kau wọu kawanuang Israel dingangu wọu manga kawanua wal᷊ine kụ bal᷊inewe tau Yahudi. Iạ e sarung měndoloh'i kau kakoạ sol᷊ong anun sire kụ pěmekesẹ̌ matang sire,
18tadeạu i sire měmpẹ̌sěbang bọu kararěndung kụ sumuẹ̌ su ral᷊ungu tualagẹ̌; tadeạu i sire makapěllọ bọu kawasang setang, kụ bọu ene pẹ̌kawasaěngu Mawu Ruata. Tangu ual᷊ingken pangangimang si Siạ e, kal᷊awọu rosan sire sarung i kaampung dingangu i sire sarung makoạ kawanuan Duata nikapile.'"
19"Ual᷊ingu ene i Tuan Datu Agripa, iạ e mambeng su papasilo kụ seng takụ kinatarimạ bọu Mawu Ruata ene.
20Hatede iạ e mělẹ̌habaru ini su taumata e, tadeạu i sire němpẹ̌tobatẹ̌ bọu kal᷊awọu rosan sire kụ manarakangu watangeng i sire su Mawu Ruata ringangkewen mapatodẹ su ral᷊ungu pẹ̌bawiah'i sire u i sire seng němpẹ̌tobatẹ̌ bọu kal᷊awọu rosan sire. Iạ e mělẹ̌habaru ene, kahumotongange su Damsyik, bọu ene su Yerusalem dingangu su kạguwạu Yudea, ringangu sutal᷊oaran sire wal᷊ine tau Yahudi.
21Tangu ual᷊ingu ene tau Yahudi e měnamẹ si siạ su Wal᷊em Mawu ringangu mědeạu měmate si siạ.
22Kai sarang orasẹ̌ ini e iạ tẹ̌těntanudang u Ruata, hakịu iạ nakararisị sini mẹ̌sẹ̌sahidi su těngon patikụ taumata baẹbe ghaghuwạ arau l᷊ai rarodọ. Apan takụ niwera ini e tạ u wal᷊ine wọu apan seng nitěbal᷊u manga nabi ringang i Musa e;
23kụ kai Ratu Mananal᷊amatẹ̌ kụ nạung seng nikědon Duata e kai harusẹ̌ mẹ̌tatahang u sunsara, ringangu makoạ taumata kahumotongange mẹ̌bangung kapia wọu kapapohong'E; tadeạu ual᷊ingu ene i Sie makapěhabaru tualagẹ̌, mạanung kasasal᷊amatẹ̌ baẹ su taumatan Yahudi arau waẹbe lai su wal᷊ine tau Yahudi e."
24Ene i Paulusẹ̌ e kạpanondane tul᷊ide ene, i Festus e namansage, "Paulus, i kau kai seng nẹ̌pulu! Kasingkạ u mal᷊awọ ene ute kai seng nakapẹ̌pulu si kau!"
25Arawe i Paulus simimbangu, "Iạ e wal᷊inewe pulu, Tuang. Manga waweraku takụ pinẹ̌bera e mambeng těngadẹ̌, dingangu simẹ̌bangbe wọu tiněnna mapia.
26I Tuangku Agripa sẹ̌sane e masingkạ-singkạ u hal᷊ẹ̌ ene. Kụ kai ual᷊ingu ene hakịu iạ e wahani makapẹ̌bera mahatedẹ̌ su těngon Tuang su tualage. Su pěndangengku tawẹu sarang sěmbaụ bọu patikụ ene kụ tawe su kasingkạ i Tuang, batụu kěbị ene wal᷊inewe nariadi su manga wěllẹ e kụ mạbawuni.
27I Tuan Datu Agripa lẹ̌adateng; i Tuang mangimang u apang kụ sarung ihabaru manga nabi? Su pěndangengku e i Tuang mangimang!"
28Mase i Agripa e něhengetang si Paulus, "Su ěnnanu e gampang tangú mapakariading iạ e Sahani su ral᷊ung'u tempo kadodọ ini e?"
29"Mal᷊ighạ arau marěngụ," angkuěng i Paulus, "iạ e mẹ̌kal᷊iomaneng su Mawu Ruata, tadeạu i Tuang dingangu manga mawu patikụ e kụ apang dimaringihẹ̌ si siạ sahěllo ini e makoạbe kere iạ -- kamageng bal᷊ine, měnsang katewe lahapusẹ̌ ini e tantu!"
30Pěngěnsueěnge i tuang datu, guběrnurẹ̌ dingang i Bernike, ringangkewelain kěbị apang bal᷊ine němpẹ̌darisị.
31Sarạeng seng sul᷊ikude, i sire nahumbisara sěmbaụ dingangu wal᷊ine, "Tau ini e tawe nẹ̌koạ manga apa sạbarang kụ hinong makahombang hukumang papate arau itahungkụ."
32Mase i Agripa nẹ̌bera si Festus, "Tau ini e seng botonge i pěllọ, kereu i sie tawe měnuntụ měngapelẹ̌ su pěnggaghutaěngu kaisarẹ̌."