Alkitab Mobile SABDA
[VER] : [SANGIR]     [PL]  [PB] 
 <<  Kisah Para Rasul 28 >> 

1Ene sarang i kami naambangke kụ seng surul᷊unge, ute wuhụewe i kami e nasingkạ u tahanusa ene kai nạung isẹ̌sěbạ Malta.

2Taumatan tahanusa ene měngkate maral᷊ahimumu si kami e. I sire kěbị e měngkate němpěnarimạ i kami e ringangu naung mal᷊uasẹ̌, němpẹ̌hunụe putung baug'i kami e, batụu kai seng nanětạ dimasehẹ̌ dingangu wanua e měngkate hanesẹ̌ matěho.

3I Paulus nangomol᷊e manga kalu, ringangu naměllọen manga kalu e su putung ene. Ene i sie kapẹ̌kẹ̌koạ e kerene e, sěngkianụe piạ těmpu sěmbua simẹ̌bang ual᷊ingu tětịu putung ene, kụ něngiki l᷊imane.

4Ene taumatan tahanusa e nakasilọ e těmpu ene mětẹ̌timbalong su l᷊iman Paulus, i sire e nahumbisarạ e sěmbaụ dingangu wal᷊ine angkuěng, "Tau ini e kai tahapate, batụu manimbe i sie seng naambang bọu hombang su l᷊audẹ̌ e, kaiso mahang duatan Katul᷊idẹ̌ e mang tamapakawalan sie kạtatanạ biahẹ̌."

5Arawe i Paulusẹ̌ e měngkatewe nẹ̌dal᷊ahipen těmpu ene kụ pinakatontonge su ral᷊ungu putung kụ tạ kadiongeng tědụ e sarang kadidị-didị.

6I sire mẹ̌ngěnnau ta mararěnna l᷊iman Paulusẹ̌ e sarung sumahěnnụ arau sěngkělěndịu katewe mawatang kụ mate. Kaiso sarangke nangampal᷊ẹ̌ marěngụ e i sire nakasilọ e u mang tawẹ suwụ e ral᷊aị nariadi si sie, kụ tiněnnan sire nẹ̌bal᷊ui wọu ene i sire katewe nẹ̌bera u i Paulusẹ̌ e kai ruata.

7Tawẹ karaune wọu tampạ ene piạ ěntana tataghuaneng i Publius, těmbonang u tahanusa ene. I sie měngkate mal᷊uasẹ̌ naunge něnarimạ i kami e nakoạ sakene karěngụeweng těllu ěllo.

8Su tempo ene i amang i Publiusẹ̌ e kai su kasasakitang, batụu nitanggaěngu lěhabẹ̌ dingangu sụsea mahamụ. I Paulusẹ̌ e tangu rimal᷊ingeko matimadẹ̌ esẹ masakị ene kụ nẹ̌kal᷊iomaneng dingangu naněllidu l᷊imane si sie hakịu i sie nul᷊e.

9Ual᷊ingu piạ ene nariadi, ute kěbị apan masasakị su tahanusa ene nahunděntạ e su anun Paulusẹ̌ e, kụ i sire niapakaul᷊e.

10I sire němpẹ̌gěllị e manga kakěndag'i sire, ringangu su tempọeng i kami e měbuạ, i sire nasue němpangěntudẹ̌ kěbịewe apal᷊iwụ hinong mawawa si kami e su raral᷊engang i kami e.

11Nal᷊iun těllu wul᷊ang sene, i kami e nẹ̌buạ e wọu tahanusa ene simake kapal᷊ẹ̌ e bọu Aleksandria e karěngụewen musungu matěho e i kami němal᷊ango su tahanusa ene. Kapal᷊ẹ̌ e kai něpakẹ u tul᷊adang, "Duata hindua i Kastor dẹ̌duan Poluks".

12I kami e němal᷊ango su soan Sirakusa kụ nẹ̌tanạ sene těllu ěllo karěngụ e.

13Bọu ene i kami e saụ něbuạ dimuruhẹ̌ sarangke nawunạ u soan Regium. Sěngkariọěllone anginge nanětạ e timiụ bọu sěmběkan timuhẹ̌, kụ natimụ e rua ěllo tangu i kami e nahumpạeng soan Putioli.

14Sene tangu i kami e nakapẹ̌sombangken taumata mạngimang su Mawu Yesus pira-pirang katau, ringangu ual᷊ingu ghaghaus'i sire, i kami e nẹ̌bua sol᷊ong Roma.

15Manga anạ u sěmbaụ su Roma apang kụ mạngimang su Mawu Yesus e nakaringihẹ̌ habaru kakakoạ i kami e, hakịu i sire němpahunděnta sarang nidatingu pasaru Apius dingangu wal᷊e kawawunakeng Tatěllu mědeạu maněnsomahẹ̌ si kami e. Ene i Paulus nẹ̌sombangke ringang i sire, i sie nakitarimakasẹ su Mawu Ruata e, kụ saụewe natoghasẹ̌ naunge.

16Ene sarang i kami e narěntạ e su Roma e, i Paulus e niwala niapakatanạ su wal᷊e těntanine kụ lẹ̌hapaěngu sordado sěngkatau.

17Nal᷊iụeng těllu ěllo, i Paulus nakireạen matatebonen tau Yahudi e apangkewe su tampạ. Kụ bọuten němpẹ̌komol᷊ẹ̌ i sire, i sie nẹ̌bera si sire angkuěng, "Manga anạ u sěmbaụ! Iạ e tawẹ sal᷊aku apa su wansang kitẹ e arau rụdokạ tundu kụ nạung ikẹ̌katarimạ bọu i upung i kitẹ e. Kai maningbe kerene iạ e mang nịsasamẹ su Yerusalem, kụ nisarakang mạl᷊ahapusẹ̌ e, su tau Roma.

18Sarạeng pěrkaraku e wọuten nịsasẹ̌suiang e, ute i sire mapulu maměllọ u iạ e, watụ u iạ e tawe nẹ̌koạbe pẹ̌sasal᷊a apa kụ hinong makapẹ̌hukungu papate.

19Kai ual᷊ingken tau Yahudi e rụdendehẹ̌, ute iạ e nasihasa hinong měngapelẹ̌ u pěrkaraku e su pẹ̌gaghaghutaěngu kaisaru Roma e. Iạ nẹ̌koạ kerene wal᷊inewe iạ piạ pangaduhangku su bansaku hala e.

20Kụ hakịu ene iạ kai mapulu mẹ̌sombang i kamene mẹ̌deạu reng makapẹ̌bisara ringang'i kamene e; watụ u iạ kai nitahungkụ, ual᷊ingu Měnanal᷊amatẹ̌ ku lẹ̌antiwang u tau Israelẹ̌ e."

21Mase i sire nẹ̌bera si sie, "I kami e wẹ̌dangbeng tawe nakatarimạ suratẹ̌ kạdiongeng sěmbaụ, bọu Yudea mạanun manga anạ u sěmbaụ. Dingangu tawẹ u kadiongeng wọu i kamene pai wọu ene kụ deng nakawawa habaru měbẹ̌běkeng kau e arau měbẹ̌bisarang karal᷊akịu e.

22Kaiso i kami e mal᷊aing mapulu rumaringihẹ̌ měnsang kereapa kakakoạu pěngangimangu e, u i kami kěbị e seng nakaringihẹ̌ u taumata e mạnungkeang těntiro lẹ̌umpaerangu e."

23Tangu i sire namoěngken ěllo sahěllo ringangi Paulus mědeạu mẹ̌sombang. Su ěllo nipoěng ene mal᷊awọ taumata nahunděnta sol᷊ong tampạ katatanakeng i Paulus. Bọu mal᷊ukadẹ̌ sarang bawěllo e i Paulus měnẹ̌nualagẹ̌ dingangu měbẹ̌běkeng kakakoạ u Ruata e mẹ̌parenta kere Ratu. Ual᷊ingken pěndaral᷊ẹ̌keng manga ayet'u Bukẹ̌ i Musa e ringangu Bukẹ̌ u manga Nabi e, i Paulus nẹ̌tawakal᷊ị e sěngapang botonge mapěngimang i sire su Mawu Yesus.

24Piạ beng mạngimangu apang iwẹ̌berang Paulus, kaiso piạbe lai apang tawe měmpangimang.

25Batụ u i sire měngkate tawẹ pẹ̌sasunduange, ute i sire e němpěněntangken tampạ ene, sarangke i Paulus bọuten nẹ̌berang bawera kere ini si sire e, "Mambeng nẹ̌tatal᷊ahino suapạeweng niwerang Rohkẹ̌ u Ruata e wọu Nabi Yesaya su manga i upung i kamene!

26Mawu Ruata e něhengetang, 'Dakọ e kakoạ sol᷊ong bansa ini: I kamene sarungbe sěntiniạ dụdaringihẹ̌ kaiso tawe nakahěngang, i kamene měngkate sěntiniạ tụtingang, kaiso wěga wue měnsang apawue nariadi.

27Batụ u tiněnnan bansa ini e seng něngkal᷊umu, tul᷊ing sire kai seng nẹ̌děhing dingangu matan sire kai seng pinẹ̌butane. Ini e nariadi, tadeạu matan sire kumbahang makasilo, ringangu tul᷊ing sire kumbahang makaringihẹ̌ ěndumangi sire kumbahang makaěnna, ringangu kumbahangbe mẹ̌sul᷊e su anuku, Kụ bọu ene kawe sarung makakaul᷊en sire wọu sakị i sire.'"

28Kasueěnge i Paulusẹ̌ e nẹ̌bera, "Manga anạ u sěmbaụ, harusẹ̌ masingkạ u habaru kasasal᷊amatẹ̌ kụ bọu anun Duata e orasẹ̌ ini e seng nipẹ̌dal᷊ahabarẹ̌ suapạeweng bansa wal᷊ine sul᷊ikudu bansang Yahudi e. I sire e sarung dumaringihẹ̌!"

29[Bọuten i Paulus nẹ̌bera kerene, tau Yahudi e němpaněntangken tampạ ene kapědẹ̌darendehe sěmbaụ dingangu wal᷊ine.]

30Dua taung karěngụ e i Paulus nẹ̌tanạ su Roma, su wal᷊e kụ sẹ̌sewaěnge hala. Mal᷊uasẹ̌ i sie měnarimạ u kěbị taumata kụ mạhunděnta měmpẹ̌tẹ̌tiwo si sie.

31Kụ tawẹ goẹ̌ e i sie mělẹ̌habarẹ̌ si sire mạanung kereapa kakakoạ u Mawu Yesus Kristus. I Paulusẹ̌ e měkẹ̌koạ ene ringangbeng karal᷊oahẹ̌, tawẹ kadiongeng apa makasahaghe.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Kisah Para Rasul 28 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel