Alkitab Mobile SABDA
[VER] : [SANGIR]     [PL]  [PB] 
 <<  Kisah Para Rasul 6 >> 

1Manga murit'u Mawu Yesus e kakạděngụe mang kạpahuntinambane. Su tempo ene tau Yahudi mẹ̌bẹ̌berang Yunani, ghụgalumị u tau Yahudi tutune. Apang mạng'i Yunani e mẹ̌bẹ̌bera, "Manga wawineng kami apạeweng seng bal᷊u e tawe kapapahiakeng u tatongka wawělli wiahẹ̌ měllo-měllo pẹ̌pahiakeng su apan taumata e."

2Ual᷊ingu ene, manga rarolohang i sire mapul᷊o dua e měngkatewe napẹ̌komol᷊u patikụ muritẹ̌ e bọu e nẹ̌bera si sire u, "Apạ e ral᷊aị kereu i kami měngirul᷊e měhabaru hengetangu Mawu e, ual᷊ingu měngkai mětẹ̌tasibung hal᷊ẹ̌ u kakaěng.

3Kụ mapiawe i kamene pěmpěmile wọu tal᷊oarang kamene pitung katau kụ arenge mawěngi wue ringangu kẹ̌kanoakengben Rohkẹ̌ u Ruata e ore lai pelesa, kụ kapěngumbalaěng i kami iruị makoạ mẹ̌sasěmpị hal᷊ẹ̌ tamai ini;

4batụu i kami e kai mapulu kětạeng mangindunụ hal᷊ẹ̌ u pẹ̌kakal᷊iomaneng dingangu pělahabaru hengetangu Mawu samatang."

5Patikụ taumata e nanarimạbeng naung mal᷊oahẹ̌ su těgung manga rarolohang e. Bọu e i sire němile si Stefanus, sěngkatau mạngimang matoghasẹ̌ su Mawu Yesus dingangu nikanoakeng u Rohkẹ̌ u Ruata e. Mal᷊aing nikapile: I Filipus, i Prokhorus, i Nikanor, i Timon, i Parmenas dingangu i Nikolaus bọu Antiokia; i sie wal᷊inewe tau Yahudi, kaiso seng simowa agamang Yahudi.

6I sire pitung katau ene e pinakiwal᷊oěng su manga rarolohang mědeạu itarimạ, kụ bọu e manga rarolohang e němpẹ̌kal᷊iomaneng dingangu.

7Kerene hengetang u Ruata e mangkeng kạkasawuhe, hakịu manga murit'u Mawu Yesus su Yerusalem mal᷊aing kạpahuntinambane kal᷊awọe. Dingangu mal᷊awọ lai manga imang kụ němpangimang su Mawu Yesus.

8I Stefanus nasukụ u al᷊amat'u Ruata e, hakịu i sie makạkoạ tanda makạl᷊aherang natimu ringangu makạdal᷊inaụ tạ sihinge sutal᷊oarang kawanua.

9Kutẹu kai piạ taumata rụdokạ si sie, kụ i sire e kai ral᷊ohong bal᷊eng pẹ̌kakal᷊iomanengang isẹ̌sěbạ Kanisang Taumatang Karal᷊iwirẹ̌. Dal᷊ohong bal᷊eng pẹ̌kakal᷊iomanengang ene e kai tau Yahudi wọu Kirene ringangkewe lai tau Yahudi wọu Kilikia ringangu Asia e mědẹ̌darendeh'i Stefanus.

10Arawe i sire e tawe makakarendehẹ̌ apang iwẹ̌beran Stefanus, ual᷊ingu Rohkẹ̌ u Ruata e seng nẹ̌gěllịu kapelẹesa waugu mahumbisara.

11Ual᷊ingu ene tangu i sire němpamurungke pirang katau mědeạu apẹ̌bẹ̌bera, "I kami e nakaringihẹ̌ tau ene, mělẹ̌hinakang si Musa ringangu Mawu Ruata!"

12Kerene kakakoạ i sire měmpěnahowong taumata, ringangu manga těmbonangu tau Yahudi ringangu l᷊ai manga mananěntiro agama. Bọu ene tangu i sire tamaị e němpěnamẹ si Stefanus, kụ nẹ̌bawa si sie nẹ̌těngon manga Měnggaghuta Agama.

13Kụ i sire napararisịen lai manga sahidi maul᷊ị u sasahidin sire tạ katěngade mạanun Stefanus. I sire sahidi e němpẹ̌berau, "Tau ini e měngkate masau měhinakang Bal᷊em Mawu susi e ringangu mělẹ̌hinakang manga hengetang u Mawu ilẹ̌habar'i Musa.

14I kami e seng nakaringihẹ̌ i sie nẹ̌bera u, i Yesus bọu Nazaret e sarung měnggoghahẹ̌ Bal᷊em Mawu ini, mase mẹ̌mal᷊ui kěbị adatẹ̌ seng nipal᷊ohong Musa si kitẹ e!"

15Kěbị taumata apang diměnta su pěnggaghaghutaěnge měmpẹ̌mẹ̌manda si Stefanus. Kụ su tempo ene gahị i Stefanus e kakěllaěng kere ghahịu malạekatẹ̌.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Kisah Para Rasul 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel