Alkitab Mobile SABDA
[VER] : [SANGIR]     [PL]  [PB] 
 <<  Kisah Para Rasul 7 >> 

1Imang mawantugẹ̌ nakiwal᷊o si Stefanus, "Lẹ̌ěnnaěng, kěbị apan niweran tau ene e kahěngang bue?"

2I Stefanus simimbang, "Manga anạ u sěmbaụ dingangu manga mawu lẹ̌adateng! Kěnangko pěmpẹ̌daringihẹ̌ si siạ! Kal᷊amonan i upung i kitẹ i Abraham něngal᷊ing banua sol᷊ong Haran, su tempo ene i sie wědang mạtanạ su Mesopotamia, Duata mawantugẹ̌ e riměnta su anun sie,

3ringangu nẹ̌bera, 'Těntangke wanuanu ringangu manga anạ u sěmbaụ u. Kakoạko sol᷊ong soa kụ sarung Takụ itěbọ si kau.'

4Tangu i Abraham e naněntangken soan Kasdim, kụ bọu ene něngal᷊ing sol᷊ong Haran. Samuring amang i Abraham nairị, Mawu Ruata e napakariadin Abraham niapěngal᷊ing sol᷊ong banua ini pẹ̌tẹ̌tanakeng i kamene manga anạ u sěmbaụ dingangu manga mawu patikụ su tempo ini.

5Su tempo ene tawẹ kadiongeng manga sěngkempang bọu wanua ini e nionggọ u Mawu Ruata e si Abraham makoạ pusakạ e, kadiongkate manga sěntakạ u pal᷊edu laedẹ̌ kasariane. Kai Mawu Ruata e nẹ̌kědo wue u i Sie sarung měngonggọ u ene si Abraham makoạ pusakạ i Abraham sarang manga hitene. Kutẹu su tempo ene i Abraham kai tawẹ apa anạ e.

6Kaiso seng ini e ilẹ̌habar'u Mawu e si sie, 'Hitenu e sarung matanạ kere taumata raghị su tampạ bal᷊ine. Taumata su soa ene sarung mẹ̌tahuěllang si sire ringangu matingkaị mẹ̌koạ si sire karěngụ u ěpạ u hasụ su taunge.

7Arawe Iạ e sarung měhukungu wansa kụ mẹ̌tahuěllang i sire ungkuěngu Mawu Ruata, kụ i sire sarung sumẹ̌bang bọu wanua ene kụ sarungbe měmpẹ̌tahamawu si Siạ su tampạ ini.'

8Bọuten nẹ̌bera kerene ute, pẹ̌kakakědo ene nitahutěngadengken Duata su hal᷊ẹ̌ u pẹ̌sasasunatẹ̌. Tangu bọu e i Ishakẹ̌ e, anạ i Abraham nipěhěndingke i Abraham něnunaten sie su tempon i sie umure ual᷊u ěllo. Bọu e i Ishakẹ̌ e mal᷊aing nanunatẹ̌ anạ e i Yakub. Kụ i Yakub e mal᷊aing nanunatẹ̌ manga anạ e i sire mapul᷊o dua su kataune nakoạ i upung u tau Yahudi.

9Manga i upung i kitẹ e němpananoi si Yusup, hakịu i sire němpẹ̌bal᷊ụ i sie nakoạ ěllangu tau Misirẹ̌. Kai Mawu Ruata e mang mạněntanudẹ̌ si sie,

10kụ mang něliun sie wọu kal᷊awọu haghin susane. Mawu Ruata e mang něngonggọ u naung matahuěnna ringangu kapelẹesa su tempọeng i sie mẹ̌těngon Pirong datun Misirẹ̌, hakịu i Pirong něhengkẹ i sie nakoạ guběrnurẹ̌ su wanuan Misirẹ̌ dingangu měngangawasa su wanalang Pirong.

11Bọu ene piạko karal᷊unusẹ̌ masaria nariadi su kạguwạu Misirẹ̌ dingangu Kanaan kụ taumata e měngkate apa masigěsạ-sigěsạ. I upung i kitẹ e tate makaěbạ kaěng i sire.

12Tangu piạ e i Yakub nakaringihẹ̌ kai piạ gandung su Misirẹ̌ i sie něndolohen manga anạ e tangu i upung i kitẹ e něngkakoạ e sol᷊ong ene su kahumotongange.

13Kụ piạ i sire tamai su karuan sul᷊ene, i Yusup kai naul᷊ị su manga anạ u sěngkataune u i sie kai i Yusup. Buhụe su tempo ene datung Misirẹ̌ e nakakasingkạ u manga anạ u sěmbaụ i Yusup.

14Bọu ene i Yusup něndingọen habarẹ̌ si amang e i Yakub, mědeạu i sie ringangu kal᷊awọu manga anạ -- pulunge iapěngẹ̌ngal᷊ing banua sol᷊ong Misirẹ̌ e -- kụ kěbị tangu pitum pul᷊o l᷊ima su kataune.

15Tangu i Yakub e rimẹ̌sungke sol᷊ong Misirẹ̌ e, hakịeweng sene tangu i sie ringangu i upung i kitẹ e něngkapul᷊ẹ asal᷊ẹ̌.

16Maiet'i sire e wọu e niwal᷊ị kapia sol᷊ong Sikem kụ nilěbing su pěndal᷊ěbingang seng niwaehang u kal᷊awọu roit'i Abraham bọu manga pal᷊ahěnton Hemorẹ̌ e su Sikem.

17Ene seng maraning tempone Mawu Ruata e mapakasěhụeng kědon'E si Abraham, kutẹu kawanuang kitẹ su Misirẹ̌ e kai seng nahuntinambang kal᷊awọ e.

18Kasueěnge ute, piạ sěngkatau ratu wal᷊ine e kụ i sie wěgawen Yusup, kụ nẹ̌parenta su Misirẹ̌.

19Datu ene tangu mapětẹ̌taghunalang u kawanuang kitẹ e, kutẹu l᷊ai matingkaị mẹ̌koạ manga i upung i kitẹ e. I sie měnẹ̌nahowong si sire tadeạu i sire apẹ̌děnděmmẹ manga rariọ darodọ deng buhu l᷊ahanạ e tadeạu mawanti kụ mate.

20Kụ su tempo ene tangu i Musa e piněhěnding kụ i sie enẹ e kaholẹ e. Těllu wul᷊ang karěngụ e i sie tẹ̌tangkianeng su wal᷊en amang e,

21kụ sarạeng i sie nirěmmẹ, ute i sie kai nial᷊ạ u sangiang ahus'i Pirong něngal᷊ạ si sie, mase nịlahiking e kere anạ e sẹ̌sane.

22Kěbị apang kasingkạ u tau Misirẹ̌ e nasuẹen těntirone si sie, hakịu i sie nakoạ taumata makawasa su wawera ringangu su kakanoạ e.

23Piạ i Musa umure ěpạ u pul᷊o su taunge, karakine ute, kai mapulu měmanda kakakoạ u kawanuane tau Israel.

24Mase i sie nakasilọ e sěngkatau wọu i sire tẹ̌tingkaitang u tau Misirẹ̌. Tangu i sie timatawangke si anu tẹ̌tingkaitang kụ němate tau Misirẹ̌ ene.

25I Musa mělẹ̌harapẹ̌ u kawanuane sarung makaěnna u Mawu Ruata e seng nẹ̌pakẹ i sie pělẹ̌liun sire. Kutẹu nal᷊ahẹ u i sire kai tawe nakaěnna.

26Sěngkariọěllone i sie nakasiloko l᷊ai tau Israel duang katau měkẹ̌kakoka, kụ i sie mědẹ̌deạ dal᷊engu mapẹ̌dameng dẹ̌dua. Nẹ̌berạete i sie u, 'I rua e kai tamahuari. Unụe i rua e kai měkẹ̌kakoka?'

27Kai i anu něngoka hapị e ene e něnuhud'i Musa sarang biwihe apidu nẹ̌bera, 'Kai i sai něnduị i kau nakoạ těmbonang dingangu mělahukung i kami e?

28Apa i kau mal᷊aing mapulu měmate si siạ kerẹewe lai i kau němate tau Misirẹ̌ e kahěbi?'

29Ene sarạeng i Musa e nakaringihẹ̌ apang kụ niwerang tau ěndaị e, i Musa timal᷊ang bọu Misirẹ̌ kụ bọu ene nẹ̌tanạ su soan Midian. Kụ sene i sie nakahombangke anạ e rarua.

30Ěpạ u pul᷊o su taunge samuring ene piạ e sěngkatau malạekatẹ̌ diměnta sol᷊ong anun Musa su kěhu l᷊inggi maraning Bul᷊ud'u Sinai. Malạekatẹ̌ ene riměnta su ral᷊ungu putung su piạ gahundunge apidu kạděllịe.

31I Musa e naherangke nakasilo hal᷊ẹ̌ ene, hakịu i sie nẹ̌těngkaranị e mědeạu makakasingkạ u kai apa ene. Bọu e i sie nakaringihẹ̌ tingih'u Mawu něhengetang,

32'Iạ e kai Ruatang i upung i kamene; Iạ e kai Ruatan Abraham, Ishak, dingangi Yakub.' I Musa e kimendẹen takụ e kụ seng tawe wahani lai měmanda sol᷊ong gahundunge ene.

33Bọu ene Mawu něhengetang kapia, 'Luạko sandalẹ̌ kạdal᷊uhe ene e, u ěntana rẹ̌darisikangu ene e kai ěntana susi.

34Iạ e seng nakasilo ringangu nakaěnna kereapa likibu kasasigěsạ u kawanua-Ku e su Misirẹ̌ e. Iạ seng nakaringihẹ̌ laoghọ i sire hakịu Iạ e nẹ̌těngkatěntung baugu měngambang si sire. Iạ e sarung měndolohi kau pẹ̌sul᷊e kapia sol᷊ong Misirẹ̌.'

35I Musa ini e kai i Musa tawe niakung tau Israel dingangu tawe nitarimạ u wawera ini, 'Kai i sai něnduị i kau nakoạ těmbonang e ringangu mělahukung i kami e?' Kutẹu mang i sie niroloh'u Mawu Ruata e nakoạ těmbonang e ringangu měngangambang, ual᷊ingu ontol᷊u malạekatẹ̌ e kụ diměnta si sie su ghahundunge kụ dụděllị ene.

36I Musa ene e kai těmbonang u kawanuan Israel simẹ̌bang bọu Misirẹ̌ kapěkẹ̌koạ e manga tanda makạdal᷊inaụ, dingangu apạeweng makạl᷊aherang tạ sihinge su Misirẹ̌, su Laudẹ̌ Mahamụ e, ringangu su wanua l᷊inggi karěngụ u ěpạ u pul᷊o su taunge.

37Seng i sie lai i Musa kụ nẹ̌bera su tau Israel, 'Mawu Ruata e sarung měngonggọ u sěngkatau nabi si kamene kụ nipile wọu tal᷊oarang kamene hala e, kerẹewe i Sie němile si siạ.'

38Seng i Musa e wọu tal᷊oarang kawanuan Israel su kěhu l᷊inggi, nakoạ mananal᷊oara waugu malạekatẹ̌ e kụ měbẹ̌bisaran sie su Wul᷊ud'u Sinai ringangu manga i upung i kitẹ e. Seng i sie něnarimạ u hengetang kụ biahẹ̌ e wọu anun Duata mědeạu itěpasẹ̌ si kitẹ.

39Maningbe lai kerene i upung i kitẹ e tawe mapulu tumuhụ si sie. I sire e kawe mạdirin sie ringangu mapulu mẹ̌sul᷊e kapia sol᷊ong Misirẹ̌.

40I sire nẹ̌bera si Harun, 'Pẹ̌koạko mahan duata e waug'i kami, tadeạu manga mahan duata ene e měngahạ i kami. Batụ u i kami e sembelaing běga wue apang kụ mariadi si Musa e kụ něngahạ i kami e napasẹ̌bang bọu Misirẹ̌!'

41Mase su tempo ene i sire nẹ̌koạ e tul᷊adang anạ u sapi e sěmbaụ, bọu e i sire mạnarakangkeng sasěmba su tul᷊ada ene, ringangu němpẹ̌koạ sal᷊iwangu měmantugẹ̌ awẹ kinoạ i sire hala e.

42Tangu Mawu Ruata e naněntang i sire ringangu napakawalang sire niapẹ̌sul᷊ěgihẹ̌ manga wituing su l᷊angị e. Ene e natuhụ kere mạbawohẹ su ral᷊ungu bukẹ̌ u manga nabi. Kere ini, 'Ei kamene tau Israel! Kai wal᷊inewe waugu Iạ i kamene nạung měmpạmotọ dingangu měmpạngěntudu sasěmba binatang gěnnang u ěpạ u pul᷊o su taunge karěngụ e su kěhu l᷊inggi e.

43Kawe selong pakal᷊uang'i Molokhẹ̌ e wẹ̌bawaěng i kamene itẹ̌takidewe lai ringangu tul᷊ada'ng bituing pakal᷊uang'u, kụ kai i Refan; kụ kai ene e tul᷊ada nạung kinoạ i kamene e mẹ̌deạu sěmbaěng. Ual᷊ingu ene Iạ e sarung měnděmẹ i kamene pakarau sol᷊ong pai sěmběka su wanuang Babelẹ̌.'

44Selo tampạ u Mawu Ruata e ruměnta su anun taumata kẹ̌kaěbakeng i upung i kitẹ su wanua l᷊inggi. Selo ene nipětị baugu laoron Duata e si Musa ringangu tụtuhụewe umbaghane nitodẹ u Mawu Ruata e si Musa.

45Bọu e selo ene tangú nawawa turusẹ̌ kahian i upung i kitẹ e su tempong i sire ringangi Yosua kụ tamai němul᷊aho soang kitẹ ini e bọu kawasang haghing bansa kụ nitokol᷊u Ruata su těngon sire. Selo ene měngkai těbe ene sene sarang tempon Daud.

46I Daud e nakal᷊uasẹ̌ naung u Ruata kụ nẹ̌dorong si Sie, tadeạu i sie ipakawala měmětị bal᷊e waugu Ruata kụ tẹ̌tahamawuang i Yakub ene.

47Kai i Salomo e něndarisịu wanala waug'u Ruata.

48Sěmbal᷊iau Mawu Kasěllahenge tawe mẹ̌tanạ su wal᷊e nikoạ u taumata u su ral᷊ungu bukẹ̌ u manga nabi e kạbawohẹ kere ini,

49'Langị e kai kal᷊aintol᷊angeng-Ku, dingangu wanua e kai laěmpahẹ̌ laedẹ̌-Ku. Kai wal᷊eng apa koateng i kamene waugu Iạ e? Kai mangirul᷊e suapa tangu Iạ e?

50Kai wal᷊inewe Iạ sẹ̌saku ngae něndiadi patikụ?' ungkuěng u Mawu.

51Bal᷊inewe mal᷊ongkọ kětị u těmbọ i kamene ringangu kai apạ e kasigěsạ i kamene rumaringihẹ̌ Duata! Kai nẹ̌bengelẹ̌ katědụ tangú tul᷊ing kamene ipẹ̌daringihẹ̌ hengetangu Mawu! I kamene mambeng mẹ̌sul᷊ung i upung i kamene tawẹ beonge, měngkate mapulu rumokạ Dokẹ̌ Susi e!

52I sai wue, manga nabi e ta nịdal᷊akitang i upung i kamene? I sire e kai němpěmate manga rarolohang u Mawu nạung kal᷊amona e seng namohang u Ěllangu Mawu maadilẹ̌ e sarung duměnta. Kụ ini e i kamene něndal᷊aị dingangu němate Ěllangu Mawu ene.

53Manga malạekatẹ̌ e seng němpěhabaru hengetangu Mawu e si kamene, kai i kamene mang ta tumuhụ si Sie!"

54Kerene, manga Měnggaghuta Agama e nakaringihẹ̌ patikụ bawerang Stefanus, i sire měngkate apa natědụ naung i sire ringangu nẹ̌bawal᷊uang marasai si sie.

55Arawe i Stefanus nikanoakengu Rohkẹ̌ u Ruata, kụ měngkate rụdal᷊ingara sol᷊ong l᷊angị. I sie nakasilọe kawawantug'u Ruata ringangu Mawu Yesus rudarisị su tampạ u makawasa, su koanengu Ruata.

56"Kakělla," ungkuěng i Stefanus, "iạ e nakasilo sorga natope ringangu Ahusu Taumata e rụdarisị su koaneng u Mawu Ruata!"

57Manga měnggaghuta e němpaněnsingke tul᷊in sire kapẹ̌bansage, bọu ene i sire sěngkahindọ timěmbo si Stefanus.

58I sire něhiuden sie sarang l᷊ikudu soa mase nipẹ̌dal᷊aěntungang u watu. I sai-sain němpẹ̌sahiding kakakoạ ene němpaněntangu lakụ i sire su sěngkatau umbaseng arenge i Saulus.

59Ene i sire kạpěngěntungeng batu si Stefanus, kutẹu i Stefanusẹ̌ kapẹ̌kal᷊iomanenge, "Mawu Yesus, tarimạko rohkẹ̌ku e!"

60Bọu e i sie němul᷊angeng kụ něluntingihẹ̌ ungkuěng: "Mawu, kumbahangbe rosa ini e pakital᷊udẹ̌ si sire!" Bouten něluntingih'u ene i sie nasuẹ e singongone.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Kisah Para Rasul 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel