Dual Panel1Sěnsul᷊e tempo i Yesus rụdarisị su apeng u Ranong Genesaret. Lawọ taumata měngkate měngkạsěngkilẹ̌ měgẹ̌gausẹ̌ dumaringihẹ̌ hengetang u Mawu Kasěllahenge.
2Kụ i Yesus nakasilo sakaeng duang gěsa mạsasiladẹ̌ su apeng ene. Manga mẹ̌papakisaghẹ e ute nạung nahuntumpa wọu sakaeng e kụ měmpạnẹ̌bang somạ i sire.
3I Yesus měngkatewe simake su sěnggěsa su sakaeng i Simon, mase něngoro si Simon apẹ̌nondo sakaeng e riọ pakaghea wọu apeng. Yesus naiang su ral᷊ungu sakaeng e kụ naněntiro taumata l᷊awọ bọu ral᷊ungu sakaeng e.
4Sarạeng i Sie nangědọe něhengetang e tangu i Sie nẹ̌berạe si Simon, "Pundal᷊ẹ̌ko sasaẹ sol᷊ong tampạ maral᷊ung e kụ paněntangkon somạ i kamene su sasị mědeạu panamẹ kinạ."
5"Tuang Guru," nisimbangi Simon, "kanandun hẹ̌bi e i kami nạung mětẹ̌těngkasaghedẹ̌, kai i kami e tawe nakaal᷊ạ apa-apa! Kai ual᷊ingken i Tuang nangoro e, ute kerenẹ e; iạ deng saụ maněntang u somạ."
6Bọuten i sire němpẹ̌koạ kerene, i sire nakal᷊iwungke ghapaěngu kinạ l᷊awọ-l᷊awọ hakịu somang sire nanětạe naghehẹ.
7Ual᷊ingu ene i sire němpangalapẹ e mẹ̌dẹ̌dorong tul᷊ung su manga ringang i sire su sakaeng bal᷊ine e, apẹ̌sẹ̌sumbala si sire. Manga ringangi sire ramahịe mase i sire nẹ̌tatal᷊iwung nělurangken kinạ e su sakaeng duang gẹ̌sa e pinakapenẹ hakịu manga sakaeng e masarạ mawul᷊usẹ̌.
8Sarangke i Simon nakasilo ene, ute i sie měngkatewe nẹ̌tumpěkuhẹ̌ su těngon Yesus e, mase nẹ̌berạe, "Těntangke iạ, Mawu! U iạ kai taumata warạdosa!"
9I Simon dingangu kěbị taumata ringangi sie mangkewen dimal᷊inaụ nakasilo kinạ kerene kal᷊awọe nikasamẹ i sire.
10Kerene lai manga hapị i Simon, u i Yakobus dẹ̌duan Yohanes, manga anạ i Zebedeus. Ene i Yesus něhengetangke si Simon, "Abe katakụ! Manětạ bọu ini e i kau kai makoạ mananomạ taumata."
11I Simon ringangkewelain manga ringange němpamuạ sakaeng ene sol᷊ong apeng, bọu e naněntangu kěbị ene, mase nahuntol᷊e si Yesus.
12Piạ sahěllo i Yesus nạung su soa sěmbaụ. Paị sene lai piạ sěngkatau esẹ kụ badange natukusu sakị u pisị makạtatakụ. Kutẹu sarang i sie nakasilo si Yesus e, i sie nẹ̌těngkasumagẹ̌ su těngone apidu mẹ̌dẹ̌dorong, "Tuang, kereu i Tuang mapulu, ute i Tuang deng mapakapian iạ e!"
13Tangu i Yesus měngkatewe něngumpaedẹ̌ tau ene apidu něhengetang, "Iạ e mapulu kụ kapiạ e!" Orasẹ̌ ene lai sakị e měngkatewe naněntang.
14Mase i Yesus nẹ̌sědingken tau ene mẹ̌běkeng hal᷊ẹ̌ ene su patikụ taumata angkuěng'E, "Dakọe pẹ̌těngkatodẹ su imang kụ pẹ̌dorong si sie pěnahiring kau e kụ seng naul᷊e e. Bọu e tamai pẹ̌bawa sasěmba kere tinitan Musa e ipanahuntěngadẹ̌ su manga taumata u i kau mamben těnga-těngadẹ̌ seng naul᷊e."
15Arawe telengu i Yesus kai sauneng napěpidẹ̌ su apan tampạ kụ měngkai lawọ taumata němpẹ̌děnta měgẹ̌gausẹ̌ dumaringihẹ̌ si Sie ringangu makikapian sakị i sire.
16Bọu ene i Yesus nangingkạ nẹ̌kal᷊iomaneng su tampạ tạ taune.
17Su sěnsul᷊e tempo piạ e i Yesus kạpaněntirone piạ pirang katau tau Farisi ringangu manga mananěntiro agama mạhungkaiang sene. I sire nạung nahunděnta wọu Yerusalem dingangu wọu manga soa su Galilea ringangu Yudea e. Kụ kawasang Mawu Kasěllahenge ene mẹ̌tẹ̌tumanạ si Yesus mědeạu mapakapiam manga masasakị.
18Kutẹu su tempo ene sěngkianu piạ pirang katau nahunděnta němpẹ̌bawa sěngkatau peosẹ̌ pětẹ̌timbangeng sural᷊okange. I sire měngkai mẹ̌tẹ̌tawakal᷊i manuẹ̌ tau ene sol᷊ong dal᷊ungu wal᷊e mẹ̌deạu ipěllọ su těngong Yesus e.
19Kai ual᷊ingken taumata tumanịu l᷊awọ sene ute i sire tate nakasuẹ̌. Tangu i sire nělěngkangken sie su wowong atụ u wal᷊e. Mase i sire nělekese atụ e ringangu nangul᷊uh'i sie ringangkewen dal᷊okaěnge su těngong Yesus su tal᷊oaran taumata l᷊awọ ene.
20Ene sarạeng i Yesus nakasilo kerene kaguwạe pangangimang i sire, i Sie něhengetang su tau ene, "Anạ u sěmbaụku ikẹ̌kěndagẹ̌, dosanu e seng niampungang."
21Manga mananěntiro agama ringangu manga tau Farisi nanětạe němpẹ̌bera sěngkatau su wal᷊ine, "Kai i sai tau ěndaị e wahani něhinakang Mawu Ruata e? I sai wue makaampung dosa, sul᷊ikud'u Mawu sẹ̌sane?"
22I Yesus masingkạ u kakiwal᷊on sire, kụ i Sie něhengetang, "Kawe unụe i kamene měkẹ̌kiwal᷊o kerene su ral᷊ungu naungu?
23Mal᷊owọkangbe sude ngae, mẹ̌bera u, 'Kal᷊awọu rosanu e seng niampungang', arau mẹ̌bera u, 'Pẹ̌bangungke, mase ral᷊engke!'?
24Arawe orasẹ̌ ini e Iạ sarung manahuntěngadẹ̌ si kamene u su wowong dunia ini e Ahus'u Taumata e kawasa mangampung dosa e." Mase i Yesus něhengetang su tau nipeosẹ̌ ene, "Pẹ̌bangungke, panapuạe raral᷊okaěngu kụ kapul᷊ẹ e!"
25Ene i sie měngkatewe nẹ̌bangung su těngon sire kěbị, mase nanapuạ dal᷊okaěnge kụ napul᷊ẹ kạpẹ̌dalone Mawu Ruata e.
26Tangu i sire kěbị mangkewen němpẹ̌dal᷊inaụ kụ němpẹ̌dalo Mawu Ruata e. Kụ dingangu pěndangu katatakụ i sire němpẹ̌bera, "Apa makadal᷊inaụ kahěngang kinasilon kitẹ su sahěllo ini!"
27Bọu ene i Yesus simẹ̌bang kụ nakasilo sěngkatau maghaghělle bea, arenge i Lewi, kụkaiang su kantorẹ̌ e. I Yesus něhengetang si sie, "Tol᷊ẹe Siạ."
28Ene i Lewi měngkatewe nẹ̌buạ kụ naněntangu kěbị, mase timol᷊e si Yesus e.
29Tangu bọu ene i Lewi nẹ̌koạko sal᷊iwang baug'i Yesus su wal᷊ene. Lawọ maghaghělle bea ringangu taumatạewe wal᷊ine nahungkaěng dingang i sire.
30Kutẹu pirang katau tau Farisi ringangu manga mananěntiro agama nakapěndang naunge tạ kal᷊oahenge, tangu němpẹ̌bera su manga murit'i Yesus, "Unụe i kamene kěbị mạhungkaěng dingangu měmpạnginung dingangu maghaghělle bea ringangu manga taumata raral᷊akị?"
31I Yesus simimbang, "Tau mal᷊ahuweka e tawe hinom piạ mangangundange; kaiso kawe masasakị e.
32Iạ diměnta wal᷊inewe měkẹ̌kui taumata makapěndang batangenge mapia, kaiso taumata marosa tadeạu i sire měmpẹ̌tobatẹ̌ bọu kal᷊awọu rosan sire."
33Ene i sire němpẹ̌bera si Yesus, "Murit'i Yohanes ringangu murit'u tau Farisi e masau měmpẹ̌puasa ringangu měmpẹ̌kal᷊iomaneng. Arawe manga murit'U ute měngkawe mạhungkaěng dingangu měmpạnginung."
34Kutẹu i Yesus simimbang, "Apa i kamene makakoạ mangoro manga sake ipẹ̌puasa su sal᷊iwangu kawinge, těntal᷊ang kaghiang esẹ e reng dingangi sire? Tantu tala!
35Kai sarung mịdating tempone kaghiang esẹ ene al᷊akeng bọu anun sire. Kụ su tempo ene i sire wuhụewe měmpẹ̌puasa."
36Mase i Yesus nẹ̌běken papinintu ini si sire, "Tawẹu sarang sěngkatau měnděpellẹ̌ lakụ těbe dingangu ririsu lakụ buhu. Batụu i sie kai makaghehẹ lakụ buhu ene. Mase lai hekạ darěpelẹ̌ buhu e tawe nẹ̌kětạ su lakụ těbe.
37Kerene lai tawẹ taumata mẹ̌tẹ̌tahong anggorẹ̌ buhu e su kawihẹ̌ pisị těbe, u anggorẹ̌ buhu e kai sarung makariading kawihẹ̌ ene mawẹ̌desẹ̌. Kutẹu anggorẹ̌ e nawosọ e ringangu kawihẹ̌ e magholọ.
38Anggorẹ̌ buhu e hinong itaho su ral᷊ungu kawihẹ̌ buhu l᷊ai.
39Kerene lai tawẹ taumata mapulu manginung anggorẹ̌ buhu kereu seng bọu nanginung anggorẹ̌ těbe. 'Anggorẹ̌ těbe uade kai katemangenge,' angkuěnge."