Alkitab Mobile SABDA
[VER] : [SANGIR]     [PL]  [PB] 
 <<  Lukas 9 >> 

1Mawu Yesus kimui si sire mapul᷊o dua murit'E, mase nangonggọen kawasa mědeạu manguserẹ̌ rohkẹ̌ dal᷊akị dingangu mapakapian sakị e.

2Bọu e i Sie něndoloh'i sire iapakapian taumata masasakị dingangu apẹ̌lẹ̌habar'u habaru mạanung kereapa Mawu Kasěllahenge mẹ̌parenta makoạ Datu.

3"Abe pěmpẹ̌bawa manga apa su raral᷊engangu," angkuěng i Yesus si sire. "Abe pěmpẹ̌bawa těking, arau petang sasěmba, arau kaěng, arau roitẹ̌, arau lai manga pakeang tahạ duambaụ.

4Kụ suapạewen i kamene nipakawala němpẹ̌tanạ ute pětanạe sene sarang i kamene maněntangu soa ene.

5Kụ suapạewen i kamene tawe iapakawala, ute su oras'u i kamene maněntangu soa ene ute tontongko awul᷊ẹ̌ bọu laed'i kamene, ipẹ̌sahidi si sire."

6Manga murit'i Yesus nahundal᷊eng mase mạngělikụ kal᷊awọu soa kụ mělẹ̌habar'u Injilẹ̌ e ringangu mạpakapian taumata masasakị su apan tampạ.

7Sarạeng i Herodes mẹ̌pẹ̌parenta su Galilea nakaringihẹ̌ kal᷊awọu hal᷊ẹ̌ mạdiadi e, i sie nẹ̌bimbong. Watụ u piạ u nẹ̌bera u i Yohanes Mananahani e seng nẹ̌biahẹ̌ kapia.

8Piạko l᷊ai sěnggạ nẹ̌bera, u i Elia saụ nětěngkasilo. Sěnggạ l᷊ai nẹ̌bera, u piạ sěngkatau nabi wọu manga nabi kal᷊amonane saụ nẹ̌bangung kapia.

9I Herodes e ute nẹ̌bera, "Iạ seng něndoloh'u taumata nakiwusạ u těmbọ i Yohanes e. Arawe tau ěndaị e, i sai tangu i Sie? Seng lawọ takụ kinaringihẹ̌ mạanun Sie." Kụ i Herodes měngkai mědẹ̌deạ makasilo si Yesus e.

10Ene manga rasulẹ̌ e něngkawal᷊ị e, kụ němpẹ̌běke si Yesus kal᷊awọu apang kinoạ i sire. Tangu i Yesus měngkatewe němaringang si sire, mase tamai ringangkewen sire nětěngkaghea sol᷊ong soan Betsaida.

11Kutẹu sarangke taumata l᷊awọ nakasingkạ u kerene e, i sire němpẹ̌tuhụ si Yesus. I Sie nanarimạ i sire mase nẹ̌bisaran sire mạanung kereapa Mawu Ruata e nẹ̌parenta makoạ Datu. Kụ i Sie lai napakaul᷊en masasakị e sutal᷊oaran sire.

12Sarạeng matangěllo nanětạe napihe, i sire mapul᷊o dua murit'i Yesus němpẹ̌haungke si Sie kụ němpẹ̌bera, "Tuang, tampạ ini kai naghea. Mapiawe i Tuang něndoloh'u taumata l᷊awọ iapẹ̌kaesẹ̌ mẹ̌deạu i sire nakapẹ̌deạ kaěng dingangu kawawunakeng su manga weọ e ringangu su manga kamponge tamai sini mạngělikụe."

13Kutẹu i Yesus simimbang, "I kamene e apakaěng i sire e." Manga murit'i Yesus němpẹ̌bera, "Si kami ěndaung sěngapạen kate borotẹ̌ limambaụ dingangu kinạ duambua. Kụ apa i kami měnsang harusẹ̌ tamai mamělli kaěng baug'u taumata ini kěbị?"

14(Kai nạung mangawe lima hiwu su kataune esẹ sene.) Mawu Yesus něhengetang su manga murit'E, "Apakaiangko i sire ěndaị e apẹ̌kamonaěng pẹ̌tahạ limang pul᷊o su kataune sěngkamonaěng."

15Manga murit'i Yesus e němpẹ̌koạ ewe apan nipěhengetang i Yesus si sire.

16Ene i Yesus nangal᷊ạe borotẹ̌ limambaụ dingangu kinạ duambua e mase rụdal᷊ingarạ e sol᷊ong l᷊angị e kụ nakitarimakasẹ su Mawu Ruata e. Bọu e i Sie někakakempangke borotẹ̌ dingangu kinạ e ringangkewen l᷊iman'E mase tinẹ̌gone su manga murit'E tadeạu ipẹ̌papahiạ su taumata l᷊awọ e.

17Tangu i sire nahungkaěngke kěbị sarang něngkal᷊aedẹ̌. Kụ manga murit'i Yesus němpangomol᷊eng lěmbem bọu nikaěng i sire kakěpal᷊e mapul᷊o dua su luwene.

18Su ěllo sěmbaụ e, piạ i Yesus měkẹ̌kal᷊iomaneng sẹ̌sane, kụ manga murit'E riměnta su anun'E. I Yesus kai nakiwal᷊o si sire, "Angkuěngkewen taumata, kai i sai Iạ e tangu?"

19I sire simimbang, "Piạ u mẹ̌bẹ̌bera u kai i Yohanes Mananahani. Piạko l᷊ai mẹ̌bẹ̌berau kai i Elia, sěnggạete wue ute mẹ̌bẹ̌berau kai sěngkatau wọu tal᷊oaran manga nabing kal᷊imonane kụ saụ nẹ̌bangung kapia."

20"Kutẹu angkuěngbeng kamene ute i sai wue tangu Iạ ini?" angkuěng i Yesus. I Petrus simimbang, "I Tuang kai Ratu Mananal᷊amatẹ̌ seng nirianding Mawu Kasěllahenge."

21Kutẹu i Yesus něhengetang su manga murit'E, "Měngkatewe kumbahang měhabarẹ̌ hal᷊ẹ̌ ene su sarang sěngkatau."

22I Yesus něhengetang l᷊ai, "Ahus'u Taumata e mal᷊aing hinong makẹ̌dang mẹ̌tatahang u sunsara ikạdirin manga matatebone ringangu manga imang těmbonange ringangkewelain manga mananěntirong agama. I Sie sarung pateěng, arawe su katěllu ěllone sarung iapẹ̌bangung kapia."

23Bọu e i Yesus něhengetang su kěbị taumata apang ene sene, "I sai mapulu tumol᷊e Siạ ute harusẹ̌ mẹ̌timbul᷊eng kapulum batangenge manapuạ kuruise apang kal᷊aěllo kụ měngkatewe tol᷊e Siạ.

24U i sai mapulu mẹ̌tatahangu pẹ̌bawiahe ute sarung kailangeng u pẹ̌bawiahe. Arawe i sai manarakang u pẹ̌bawiahe waug'u Iạ e, ute sarung ipakasal᷊amatẹ̌.

25Apa wue gunane su sěngkatau managhuang kạguwạu dunia ini, kutẹu i sie makagholang dingangu kailangengu pẹ̌bawiahe?

26Kereu i sai mạmea mangakung Iạ dingangu těntiro-Ku ute Ahus'u Taumata sarung lai mamea mangakun sie su tempong i Sie sarung duměnta ringangu kawasan'E, kụ dingangu kawasang i Amang dingangkewelain kawasan manga malạekatẹ̌ masusi e!

27Kěngkasingkạko: u wọu tal᷊oarang kamene tamai ini e piạ u tawe makatemang papate e těntal᷊ang i sie reng tawe nakạsilo Mawu Ruata nẹ̌parenta."

28Mangawe sěngkamisa, Yesus naněntiron manga hal᷊ẹ̌ e, i Sie namaringang i Petrus, i Yohanes dingangi Yakobus simaka wul᷊ude, kụ nẹ̌kal᷊iomaneng.

29Kutẹu piạ e i Yesus mẹ̌kẹ̌kal᷊iomaneng sene, ghatin'E nẹ̌bal᷊ui ringangu pakeang'E kụkerong nẹ̌těngkawira.

30Ene sěngkal᷊ěndị e piạ taumata ruang katau i Musa rẹ̌duan Elia nẹ̌těngkasilo su ral᷊ungu tualagẹ̌ bọu sorga. I sire mạhumbisaran Yesus mạanung kapapohong'E seng tawẹ karěngụe lai sarung dal᷊engang'E su Yerusalem.

31(9:30)

32Su tempo ene i Petrus dingangu manga hapị e mẹ̌tẹ̌tikị, sěngkianu něngkapuko ringangu nakasilo si Yesus siměnnang dingangu ruang katau mạhundarisi dingang i Sie.

33Ene piạ e i rẹ̌dua e mẹ̌tẹ̌tal᷊eịen Yesus tangu i Petrus e kai nẹ̌bera si Yesus, "Tuang Guru, napiang koạ e i kitẹ sini. Mapiangbe i kami měndarisị sello tatěllu: sěmbaụ si Tuang, sěmbaụ si Musa ringangu sěmbaụ l᷊ai si Elia." (I Petrus nẹ̌bera kerene wěga wue kai apa iwẹ̌berane.)

34Kutẹu i Petrus kạpẹ̌berane, piạ e winawa kụ nangěllung si sire, hakịu i sire něngkatakụ.

35Kutẹu wọu winawa ene kinaringihẹ̌ tingihẹ̌ mẹ̌bẹ̌bera, "Ini e Ahusẹ̌-Ku pinile-Ku. Pẹ̌daringihẹ̌ si Sie!"

36Sarạeng tingihẹ̌ ene nangẹ̌dung, i sire nakasilọe si Yesus sẹ̌sane sene. Manga murit'i Yesus měngkatewe něnděmmasu kěbị ene, dingangu tawe němpẹ̌běke si sai-sai apang kụ seng kinasilon sire.

37Sěngkariọěllone i Yesus dingang i sire těllu murit'E kạpahunděsunge wọu wul᷊ude ene, kụ gapaěng u taumata l᷊awo mạněnsomahẹ̌ si Yesus.

38Sěngkatau esẹ bọu tal᷊oaran taumata l᷊awọ e nẹ̌pal᷊ehe, "Tuang Guru, tul᷊ungko kakěllai anạku -- kai mang sěmbaụ ene anạku e!

39Kamageng rohkẹ̌ dal᷊akị sumake si sie, i sie měngkatewe pẹ̌sěngkianu mẹ̌pẹ̌pal᷊ehe ringangu wadang e iapẹ̌kẹ̌kahimbẹ̌sọ e hakịu mẹ̌nẹ̌něbu mohonge. Rohkẹ̌ ene měngkatewe mạpakạbaụ i sie ringangu tawe sumẹ̌bang bọu anune!

40Iạ seng bọu nẹ̌dorong su manga murit'i Tuang, apạnokol᷊'u rohkẹ̌ ene, kaiso i sire mang ta makakoạ."

41I Yesus simimbang, "Bal᷊inewe mal᷊ongkọ i kamene ini! I kamene mang těngadẹ̌ taumata makakal᷊ubengkọ dingangu tawe mangimang! Delaing kạděngụe Iạ harusẹ̌ mẹ̌tanạ dingangi kamene ringangu mẹ̌tingkědang i kamene? Ramahịe wawa anạu ene!"

42Kutẹu rariọ buhụe lụhaung si Yesus, rohkẹ̌ dal᷊akị e mapẹ̌dẹ̌dal᷊ahintụ i sie hakịu wadange mapẹ̌kakahimbẹ̌sọe. Kụ i Yesus nangoro rohkẹ̌ dal᷊akị ene pasẹ̌bang kụ dariọ e napiạe. Mase rariọ ene nịsasul᷊e si amange.

43Kěbị taumata e mangkewen němpẹ̌dal᷊inaụ nakasilo kawasan Duata e kawe kereng kawantuge. Su tempong i sire měngkatewe wẹ̌dang měngkạherangu nakasilo apang kěbị kẹ̌koateng'E, ute i Yesus něhengetang su manga murit'E,

44"Pẹ̌kakěllako pakapia-pia kụ ariẹbe kiwul᷊ei manga hengetang-Ku ini: Ahus'u Taumata e sarung isarakang su kawasan taumata e."

45Arawe manga murit'i Yesus e tawe nakaěnna waweran'E e. Kụ hal᷊ẹ̌ ene měngkai mạdal᷊irung si sire, madiringu i sire makaěnna. Kutẹu i sire ghụgoẹ̌ makiwal᷊ong hal᷊ẹ̌ ene si Sie.

46Su tal᷊oaran manga murit'i Yesus měmpẹ̌dẹ̌darendeh'u mạanung měnsang i saị e wọi sire kạguwakenge.

47I Yesus masingkạu tiněnnan sire, hakịu ene i Sie nangal᷊ạ sěngkatau rariọ kạdodọ kụ niapararisịe su rẹ̌duh'E.

48Mase i Sie něhengetang su manga murit'E, "I sai manarimạ u rariọ ini ual᷊ing u Iạ e mangal᷊ene ute měnarimạ u Iạ. Kụ i sai měnarimạ u Iạ e, ute měnarimạ i Sie kụ něndoloh'u Iạ e. Batụu i saing kakạdọdokang e su tal᷊oarang kamene e, i sie kai kạguwakenge!"

49I Yohanes nẹ̌berau, "Tuang, i kami nakasilo piạ tau mạnokol᷊u setang su ral᷊ungu arengi Tuang, kụ i kami nẹ̌sěding i sie, watụ u i sie wal᷊inewe wọ'i kitẹ."

50"Abe pẹ̌sẹ̌ding i sie," angkuěng i Yesus si Yohanes dingangu manga murit'i Yesus wal᷊ine, "u i sai tawe rumokạ si kamene, ute su sěmbẹ̌kang kamene."

51Ene sarạeng maraning tempone i Yesus mahengkẹ sol᷊ong sorga, i Sie namutusẹ̌ tadeạu makoạ sol᷊ong Yerusalem.

52Tangu i Sie rimolohen tau niapangal᷊imona si Sie. I sire apan nirolohẹ̌ ene nahundal᷊engke, mase nahunsuẹ̌ e su kampong sěmbaụ su Samaria mědeạu měndiahing kěbị ene si Yesus.

53Kaiso i sire su kampong ene tawe manarimạ i Yesus, batụu mamben mal᷊ahẹ-lahẹ u i Sie kawe kạdal᷊enge sol᷊ong Yerusalem.

54Tangu, su tempong manga murit'i Yesus kụ i Yakobus dẹ̌duan Yohanes nasingkạeng hal᷊ẹ̌ ene, i sire němpẹ̌berạ e, "Mawu, kawe Mawu mapulu, i kami mẹ̌gahagho tadeạu piạ putung ěnaẹ katěntung bọu l᷊angị kụ panutung si sire ini e?"

55I Yesus nẹ̌biling, mase namal᷊ěndihẹ̌ si rẹ̌dua e.

56Bọu e i sire něngkakoạ e sol᷊ong kampong bal᷊ine.

57Kutẹu i Yesus dingangu manga murit'E kạpahundal᷊enge, piạ tau nẹ̌bera si Yesus, "Tuang, iạ mapulu tumol᷊e si Tuang suapạewen dal᷊engangu e!"

58I Yesus simimbang, "Dal᷊ugẹ̌ e piạ liange ringangu manụ u kinoaěng e piạ pangangěllungange, arawe Ahus'u Taumata ute tawẹ u pangirul᷊umang u těmbọ e."

59Mase i Yesus něhengetang su sěngkatau wal᷊ine, "Tol᷊ẹ e si Siạ." Arawe tau e nẹ̌bera, "Tuang balako iạ mapul᷊ẹ kal᷊imona mělẹ̌bing i amangku e."

60Yesus simimbang, "Balạe taumata nate e apělẹ̌bing u taumatane nate sẹ̌sane. Arawe i kau, rakọ e kụ pangekeng habar'u Mawu Ruata seng nanětạ e nẹ̌parenta."

61Piạ l᷊ai sěngkatau wal᷊ine nẹ̌bera, "Tuang, iạ mapulu tumol᷊e si Tuang, kụ balako iạ mapul᷊ẹ kal᷊imona mědeạu mẹ̌katạ."

62Yesus něhengetang su tau ene, "Kụ seng nanětạ němungkalang ěntana e, mase mẹ̌bihu sol᷊ong l᷊ikude, ute tawe hinone makoạ komol᷊angu umat'u Mawu Ruata."


  Share Facebook  |  Share Twitter

 <<  Lukas 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel