Alkitab Mobile SABDA
[VER] : [SANGIR]     [PL]  [PB] 
 <<  Matius 4 >> 

1Bọu e Mawu Yesus niahạ u Rohkẹ̌ u Ruata sarang banua l᷊inggi tadeạu pakisal᷊ukate su setang.

2Ěpạ u pul᷊o su ěllone ringangu ěpạ u pul᷊o su hěbine Mawu Yesus tawe kimaěng. Nạdehọ i Sie nakapěndangke nahutung.

3Setang himaungke bọu e nẹ̌bera, "O kai i Kau Ahus'u Mawu Ruata e ěng? Ho, pangorọe manga watu tamai e apakakoạ borotẹ̌."

4Mawu Yesus simimbangke, "Su ral᷊ungu Winohẹ Susi mạbawohẹ: Taumata tawe makapẹ̌biahẹ̌ kětạeng bọu borotẹ̌ samatang, kaiso mal᷊aing bọu patikụ hengetang, kụ nipěhengetangu Mawu Ruata."

5Kutẹu setange namaringangken Mawu Yesus sarang Yerusalem, soa susi, kụ napararisị i Sie sene su wowom pusig'u Wal᷊em Mawu.

6Mase setange nẹ̌berạe si Sie, "I Kau kai Ahus'u Ruata arau? Mageng kerene ute pẹ̌těngkanawọe; u su ral᷊ungu Winohẹ Susi kai mạbawohẹ kere ini,

7Mawu Yesus smimbang, "Kai su ral᷊ungu Winohẹ Susi mal᷊aing kạbawohẹ, 'Kumbahang i kau měnal᷊ukạ Mawu Ruatanu.'"

8Bọu ene setang namaringang Mawu Yesus sarang bul᷊ude marangẹ-dangẹ kụ napatodẹ u kal᷊awọu kararatuangu dunia e ringangkeweng kěbị kakakalạe si Sie.

9Mase setange nẹ̌bera su Mawu Yesus, "Kěbị ini e sarung takụ ionggọ si Kau, kereu i Kau mẹ̌tumpěkuhẹ̌ mẹ̌suba si siạ."

10Mawu Yesus simimbangke, "Pamehọe i kau setang! Su ral᷊ungu Winohẹ Susi mạbawohẹ: I kau pangadatẹ̌ko Mawu Ruatanu, dingangu pẹ̌tahamawu si Sie sidutu!"

11Nạdehọ setange naněntangkeng Yesus, kụ manga malạekatẹ̌ mal᷊aing nahunděnta němpẹ̌tangkiang si Sie.

12Suapan nakaringihẹ̌'u i Yohanes kai nitahungkụ, Mawu Yesus nělingkạ sarang Galilea.

13Mawu Yesus naněntangu Nazaret, mase natanạ su Kapernaum su wiwih'u Ranong Galilea su wanuan Zebulon dingang i Naftali.

14Ual᷊ingu Mawu Yesus nẹ̌koạ kerene, ute nisěhụe apan nitěbal᷊u Nabi Yesaya, bawal᷊one:

15"Ěntanang Zebulon dẹ̌duan Naftali su ral᷊eng sol᷊ong dano, su sěmběkang Sal᷊ụ u Yordan, Galilea e nakoạ ěntanang taumata wal᷊ine Yahudi!

16Bansa kụ měbẹ̌biahẹ̌ su ral᷊ungu kararěndung seng nakasilo tualagẹ̌ mahamagẹ̌! Apan mětẹ̌tanạ su kararěndungu papate e nịsasarangengu sěnnangu tualagẹ̌!"

17Nanětạ orasẹ̌ ene Mawu Yesus něhabar'u, "Pěmpẹ̌tobate wọu kal᷊awọu rosang kamene, batụ u semben tạ kararěngụe Mawu Ruata e sarung mẹ̌parenta kere sěngkatau Ratu!"

18Ene Mawu Yesus rụdal᷊engke su apengu Ranong Galilea e, i Sie nakasilo měnanoma ruang katau, i Simon (kụ lai isẹ̌sěbạ si Petrus) dingangu tuarine i Andreas. I rẹ̌dua kạpěnẹ̌nomane su rano.

19Mawu Yesus něhengetang si rẹ̌dua, "Mahịe tol᷊e Siạ kụ Iạ deng maněntiro si kamene měnoma taumata."

20I rẹ̌dua měngkatewe naněntangu soma mase němpẹ̌tol᷊e su Mawu Yesus.

21Mawu Yesus rimal᷊engke, mase nakasilo l᷊ai si rẹ̌dua tahatuari wal᷊ine, kụ kai i Yakobus rẹ̌duang Yohanes, anạ i Zebedeus. I rẹ̌dua sěngkapěnaming soma ringang i amang i rẹ̌dua su ral᷊ungu sakaeng. Mawu Yesus mal᷊aing nẹ̌kui si rẹ̌dua,

22kụ i rẹ̌dua měngkatewe němpaněntangu sakaeng dingang i amang i rẹ̌dua e, mase timol᷊e Mawu Yesus.

23Su Galilea, Mawu Yesus naměpidẹ̌ kạguwạu wanua ene ringangu naněntiro su manga wal᷊eng pẹ̌kakal᷊iomanengang. I Sie mělẹ̌habar'u Injilẹ̌, u Mawu Ruata e sarung mẹ̌parenta. Dingangu i Sie mal᷊aing napakapian masasakị, dingangu apạewen piạ kurangu wadange.

24Habarẹ̌ mạanun Mawu Yesus e timeleng su kạguwạu wanuan Siria, hakịu l᷊awọ taumata nahunděnta su anun'E. I sire němpangěntudẹ̌ kal᷊awọu taumata masasakị dingangu l᷊ụl᷊ahunsusa. Taumata apan niwal᷊iuang u rohkẹ̌ dal᷊aị, apan piạ sakị u wawi ringangu peosẹ̌, kěbịe niapakapiang Yesus.

25Měngkate apa l᷊awọ taumata nahuntol᷊e Mawu Yesus su tempo ene. Piạben diměnta wọu Galilea, piạben bọu Soa Mapul᷊o, wọu Yerusalem, wọu Yudea, dingangu l᷊ai wọu soa su sěmběkang Yordan.


  Share Facebook  |  Share Twitter

 <<  Matius 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran