Dual Panel1"Pẹ̌tahěndungko, kumbahang i kamene mapatodẹ u tatuhụ agama su těngon taumata l᷊awọ, tadeạu ikasilon sire. Kamageng i kamene e měmpẹ̌koạ kerene, ute i kamene tawe kaonggọtangu wawal᷊ise kahiang Amangu su Sorga.
2Kụ kereu i kamene měngonggọu tatongka su tau kasiang, ute kumbahang měngkawe mẹ̌mombengu hal᷊ẹ̌ ene kere kẹ̌koateng u taumata mẹ̌mělle. I sire puluang měmpẹ̌koạ kerene su wal᷊em pẹ̌kakal᷊iomanengang dingangu su manga ral᷊eng gaghuwạ, tadeạu makiralo. U pakatahěndung bue, i sire seng těbe nakatarimạ bawal᷊ise.
3Arawe i kamene kamagengbe měmpěngonggọu tatongka e pěmpěnonggol᷊ẹ̌be su kapapěnisẹ̌ tadeạu tawẹu makakasingkạ.
4Balạe kakanoạu e tawe kasingkateng i sai-sai, tabeạu katewe i Amang su Sorga. I Sie makạsilo kakanoạu apan mạbawunie kụ sarung mangonggọu wawal᷊ise si kamene."
5"Kamageng i kamene měmpẹ̌kal᷊iomaneng, ariẹbe kere taumata papuluang měmpěmělle. I sire měmpẹ̌kal᷊iomaneng dụdarisị su wal᷊em pẹ̌kakal᷊iomanengang dingangu su pẹ̌sěmakengu ral᷊eng mědeạu ikasilon taumata. Tahěndunge, u mang seng kinatarimạ i sire wawal᷊ise.
6Kai kereu i kamene měmpẹ̌kal᷊iomaneng ute pahunsuẹ̌ko su kamarẹ̌ dingangu hěpingko tukadẹ̌ mase pẹ̌kal᷊iomaneng si Amang tawe kasasilo. Tangu i Amangu e makasilo kakanoạu apang kạbawunie kụ sarung měngonggọu wawal᷊ise si kamene.
7Kamageng i kamene měmpẹ̌kal᷊iomaneng, kumbahangbe ipẹ̌kakal᷊ikụ kere su manga taumata běgang Mawu. I sire mạngiral᷊ingu rorong i sire sarung daringihang, batụ u kakal᷊iomaneng i sire manandụe.
8Kumbahangbe kere i sire. I Amangu sembeng masingkạu apang gẹ̌gausang i kamene, těntal᷊ang i kamene reng tawe nẹ̌dẹ̌dorong.
9Kụ pěmpẹ̌kal᷊iomaneng kere ini, 'I Amang i kami su Sorga: Seng i Kau e Ruata man sěmbaụ. Mal᷊owọko i Kau e sěmbaěng dingangu adateng.
10Kararatuangu karěntako. Kapulunu apakasěhụko su wowon dunia kerẹewe su sorga.
11Pangonggọko si kami su sahěllo ini laidop'i kami měllo-měllo.
12Dingangu pangampungko pẹ̌sasal᷊ag'i kami, kerẹewe i kami měgẹ̌gěllịu ampung su taumata apan měmpẹ̌sasal᷊agẹ̌ si kami.
13Dingangu abe pěngahạ i kami sarang dal᷊engu sasal᷊ukạ, kaiso pělliu si kami wọ'i ral᷊aki. [Ukai si Kau kararatuang dingangu kawasa dingangu kawawantugẹ̌ e sarang kakalẹ̌. Aming.]'
14Kamageng i kamene měmpangampung taumata apang mẹ̌sẹ̌sal᷊a si kamene ute i Amang su Sorga e sarung mangampung pẹ̌sasal᷊ang kamene.
15Kai kereu i kamene tawe mangampung pẹ̌sasal᷊an taumata wal᷊ine, ute i Amang su Sorga e mal᷊aing tawe mangampung pẹ̌sasal᷊ang kamene."
16"Kamageng i kamene mẹ̌puasa ute, kumbahangbe gating kamene měmpẹ̌kahěndusẹ̌ kere taumata puluang měmpěmělle. I sire mạmal᷊u gatin sire tadeạu taumata kěbị masingkạu i sire kai měpẹ̌puhědang. Tahěndungeko, u kai ene wawaehe kụ seng kinatarimạ i sire.
17Kai kereu i kamene mẹ̌puhědang, ute pěmpěnděmusẹ̌be gating kamene ringangu pěmpěnaụ bue utạ i kamene,
18tadeạu tawẹu masingkạu i kamene kai kapěpẹ̌puhědange, sul᷊ikudu i Amang ta ikasasilo e. I Sie nakasilo kakanoạ i kamene apam mạbawuni ringangu sarung měgěllịu wawaehe si kamene."
19"Ariẹbe měngkai mědeạ arětạ'u dunia baug'u watangengue, suapan uane ringangu taing uase makạhupadẹ̌ e ringangu tahatako e ruměnta mẹ̌tako.
20Su sěmběkane ute, pẹ̌deạko arětạ'u sorga waug'u watangenge suapan uane ringangu taing uase e tawe makahupadẹ̌, dingangu tahatako e tawe makatako.
21Batụ u suapan piạ arětạu e, ute sene lai naungu e!"
22"Mata e kai sol᷊o waug'u wadang. Kereu matanu matilang, kaguwạu wadangu e matuala-tualagẹ̌.
23Kai kereu matanu marěndung, ute kạguwạu wadangu e marěndung-děndung. Kụ kereu sol᷊o su ral᷊ungu wadangu e marěndung, ute kai apạe maěllị kararěndung ene!"
24"Tawẹu sarang sěngkatau makapamunara mạengu mawune ruang katau. U i sie kai sarung limembong kapiane su sěngkatau wọu wal᷊ine. Arau i sie limembon satia su sěngkatau wọu su wal᷊ine. Kerene lai i kamene; tawe mariadi mẹ̌tahamawu Mawu Ruata, ringangu mẹ̌tahamawuko l᷊ai arětạ.
25Ual᷊ingu ene kasingkạko; kumbahangbe ghuměnggang u pẹ̌bawiahu, mangal᷊ene apan kụ sarung kanengang arau inungang, arau apa kụ sarung iluheng kamene. Pẹ̌bawiahẹ̌ marohkẹ̌ e kai limembong kaarẹ̌gane wọu kakaěng dingangu wadange limembong kaarẹ̌gane wọu pakeang?
26Tingangko manụ u winalangeng. I sire tawe mělahěnsinuang, tawe měmaměnsạ, dingangu tawe lai měngangomol᷊ẹ̌ ěmme su pěndaresoěnge. Kai i Amang su Sorga e mang mělẹ̌hiking si sire! I kamene kai limembo maarẹ̌ga wọu manga manụ u winalangeng.
27I sai wue wọ'i kamene su kaghaghěngganenge makatamba umure maning kětạeng kadodọ?
28Unụe i kamene ghuměnggangu ta mẹ̌pakeang? Tingangko manga ghal᷊oghong mạhuntuwo su manga wimbaenge. Bungang tamai ene tawe měmpělahal᷊ẹ̌ e dingangu tawe mẹ̌kakahiwuang;
29Seng Datu i Salomo kereng kakalạe lai, kai tawe nakal᷊uhem pakeang kerene kahole e kere su manga bungang ene!
30Děmpugẹ̌ su wimbaenge timuwo sahěllo ini mase sěngkariọěllone nasue měngkahěngisẹ̌. Kai Mawu Ruata e mang mělẹ̌lěnggihẹ̌ ene iapakaholẹ. Něngalembọe wue i kamene! Katewe i kamene kadodọ pangangimange!
31Kumbahangbe ghuměnggang dingangu mẹ̌bera u, 'Kai apạe sarung kanengang i kitẹ', arau 'kai apạe sarung inungangi kitẹ', arau 'kai apạe sarung iluheng kitẹ'?
32Kěbị ene mang sẹ̌sahusuangu taumata kụ apan tawe makakiral᷊a Mawu Ruata. Sěmbal᷊iau i Amang su Sorga e těbe masingkạu i kamene měgẹ̌gausẹ̌ patikụ ene.
33Pěmpẹ̌deạko kal᷊amona kararatuangu Mawu Ruata e kụ pěmpẹ̌koạko apang kapulun'E su pẹ̌bawiah'u. Tangu kěbị e sarung ionggọu Ruata si kamene.
34Ual᷊ingu ene ute, kuhạe ghuměnggangu apan mariadi rịěllo. Batụ u rịělloe piạbe ghěnggange sẹ̌sane. Sigěsạ kụ sahěllo ini e seng piane kụ tawe wahal᷊uas'u tambaěng."