Dual Panel1Iạ e kai mapulu mapakasingkạu wawineng kitẹ i Febe. I sie měnẹ̌nongka mẹ̌tangkuang jamaatẹ̌ su Kengkrea.
2Tarimạko i sie makoạ sěngkatau ral᷊ohon jamạat'u Mawu. Mambeng kerene kakakoạu taumata mạngimang su Mawu e hinong měnarimạu sěmbaụ su wal᷊ine. Lẹ̌ontol᷊e wue i sie, kereu i sie mẹ̌gẹ̌gausẹ̌ tul᷊umang bọ'i kamene, ual᷊ingu i sie sẹ̌sane seng nẹ̌tul᷊ung lawọ taumata -- sul᷊iung iạ.
3Pěmpaul᷊ịkon tabeạku si Priskila rẹ̌duan Akwila, manga hapịku kụ sěngkahal᷊ěkang baug'i Kristus Yesus.
4I sire maraning mairị ual᷊ingu mapulu měngambang siạ. Iạ makitarimakasẹ si sire -- kụ bal᷊inewe kětạeng sẹ̌saku kai kěbị jamaatẹ̌ maning bal᷊ine tau Yahudi e mal᷊aing makịtarimakasẹ si sire.
5Pěmpaul᷊ikon lai tabeạku su jamaatẹ̌ apan nakomol᷊ẹ̌ su wal᷊en sire. Tabeạku si Epenetus i kẹ̌kěndagẹ̌ku. Kai i sie tau kahumotongange mạngimang si Kristus su wanuang Asia.
6Tabeạku lai si Maria. I sie seng nẹ̌těngkasaghedẹ̌ kahěngang baug'i kamene.
7Pěmpaul᷊ịkon lai tabeạku si Andronikus rẹ̌duang Yunias. I sire e kai wansa sěmbaụ dingangku mase lai nạung sěngkatahungkụ dingangku. Kal᷊imonang iạ mạngimang si Kristus, i sire e sen těbe mạngimang. I sire piạ areng i sire sutal᷊oaram manga rasulẹ̌.
8Tabeạ si Ampliatus kụ i kẹ̌kěndagẹ̌ku ual᷊ingu i sie ringangkewen iạ e seng nasěmbaụ dingangu Mawu.
9Pěmpaul᷊ịkon tabeạku si Urbanus ringang i kitẹ e kụ němunara ringang i kitẹ baug'i Kristus. Dingangu tabeạku si Atakhis i kẹ̌kěndagẹ̌ku.
10Tabeạ si Apeles. Kasatiane si Kristus seng limětạ. Tabeạ lai su ral᷊ohon bal᷊en Aristobulus,
11dingangu si Herodion. Iạ e kai wansa sěmbaụ dingange. Tabeạku lai su manga anạ u sěmbaụ tamba pangangimang sural᷊ohon bal᷊en Narkisus.
12Tabeạku si Trifena ringang i Trifosa kụ nẹ̌těngkasaghedẹ̌ nẹ̌tangkiang Mawu, ringangu si Persis i kẹ̌kěndagẹ̌ku e. I sie lai seng nẹ̌těngkasaghedẹ̌ kahěngang baugu Mawu.
13Tabeạ si Rufus dingang i ninange, kụ si siạ e al᷊ingkai i ninangku sẹ̌saku. I Rufus kai tau pinilen Mawu kụ dẹ̌daloěng.
14Pěmpaul᷊ịkon tabeạku si Asinkritus, Flegon, Hermes, Patrobas, Hermas dingangu kěbị anạ u sěmbaụ tamba pangangimang dingangkewen sire.
15Tabeạku si Filologus rẹ̌duan Yulia; si Nereus dingangu wawinene si Olimpas dingangu kal᷊awọu taumata mạngimang kụ dingangkewen sire.
16Pěmpẹ̌papangadatẹ̌ pakapapia, sěmbaụ su wal᷊ine al᷊ingkai anạ u sěmbaụ Sahani. Patikụ jamaat'i Kristus měmpẹ̌děndingọu tatabeạ i sire su manga anạ u sěmbaụ.
17Manga anạ u sěmbaụ! Iạ mědẹ̌dorong sěngapang botonge: Pěmpẹ̌teghang ben sire apan makakạděntan pẹ̌sasitori ringangu makapẹ̌gěnggohaeng pangangimang u taumata su Mawu. Hal᷊ẹ̌ ene mẹ̌tẹ̌tatěntang u apan seng nitěntiro si kamene. Pěmpẹ̌tal᷊ikudẹ̌ ben taumata kerene.
18Batụu taumata kụ mẹ̌kẹ̌koạ kerene wal᷊inewe mẹ̌munara waug'i Kristus Mawung kitẹ, kaiso mědeạu makawatụ kapulun naung i sire hala. Ual᷊ingken bawodaị dingangkewen manga wawera mal᷊ěnggihẹ̌ e i sire měmpạngakal᷊ẹ̌ apan taumata kụ běgawen manga apa-apa.
19Kěbị taumata seng masingkạ u i kamene satia su těntirong Injilẹ̌ bọu Ruata. Kụ iạ mal᷊uasẹ̌ su hal᷊ẹ̌ u kakakoạ i kamene. Iạ mapulu tadeạu i kamene mapapelẹesa su manga hal᷊ẹ̌ mapapia, ringangu longong, su manga hal᷊ẹ̌ daral᷊aị.
20Mawu Ruata kụ nangonggọu karal᷊unsemahẹ̌ su taumata, sarung mal᷊ighạ měměllọ u setang su al᷊ungu kawasanu ringangu mapakawinasa. Milombọko manga anạ u sěmbaụ hanesẹ̌ lẹ̌al᷊amateng i Yesus Kristus Mawung kitẹ.
21I Timotius, hapịku, makịpaul᷊ịu tabeạ e si kamene, kerene lai i Lukius, i Yason dingangu i Sosipater, kụ tamba wansaku.
22Kụ namohẹ suratẹ̌ ini e kai iạ i Tertius. Iạ e měhabaren tabeạu anạ u sěngkatau si kamene.
23I Gayus něndohọen tabeạ si kamene. Iạ mạnumpang su wal᷊ene ringangu jamaat'i kami lai měmpẹ̌tẹ̌tahamawu lai sene. I Erastus těmbonang u urusang u roitu wahageang soa něndohong tabeạ si kamene. Kerene lai anạ u sěmbaụ i kitẹ i Kwartus.
24[Milombọko Mawung kitẹ i Yesus Kristus měngal᷊amatẹ̌ si kamene kěbị. Aming.]
25Daralo su Ruata! I Sie kawasa manoghasẹ̌ pangangimang i kamene mạtuhụ su Injilẹ̌ bọu Mawu Ruata kụ takụ ilẹ̌habarẹ̌ mạanun Yesus Kristus. Iạ mạngekeng habarẹ̌ ene e mạtuhụ kere ilẹ̌lahẹu Ruata e su hal᷊ẹ̌ u karakin Duata kụ seng hakịu ghěnnangu hasụe su taunge karẹ̌ngụe tawe nịkasingkatengu taumata.
26Arawe ini, su parentang Duata kakalẹ̌, karaki ene seng niapakal᷊ahẹ dingangu niapakasingkạ su patikụ bansa, su ral᷊ungu manga winohẹ u nabi, tadeạu i sire kěbị mangimang dingangu matuhụ su Ruata.
27Mang i Sie sẹ̌sane Ruata, i Sie su wowon patikụ tahuěnna. Milombọko i Sie iapakawantugẹ̌ marangẹ sarang marěngụ-děngụ su ral᷊ung i Yesus Kristus! Aming. Adat'i kami, Paulus, ěllang i Kristus Yesus