Alkitab Mobile SABDA
[VER] : [SANGIR]     [PL]  [PB] 
 <<  Roma 9 >> 

1Apan takụ iwera ini e mamben těngadẹ̌ ual᷊ingu iạ e kai tataghuaneng i Kristus. Iạ e tawe mẹ̌konti. Dal᷊ungu naungku e kụ lẹ̌ahakengu Rohkẹ̌ u Ruata e mạnoghasẹ̌ siạ lai u waweraku ini e kahěngang.

2Iạ e mambeng mạsusa naungkue matědụ,

3ual᷊ingu manga anạ u sěmbaụku apang sěnggal᷊ipoho ringangku. Batụu waug'i sire, iạ sẹ̌saku e něnal᷊udẹ̌ laanen Duata ringangu nipakaghěang bọu anung Kristus.

4I sire kai umatẹ̌ pinile ringangu Mawu Ruata e napakariadin sire nakoạ manga anạ'E sẹ̌sane, dingangkewen nělahẹ u kawasan'E si sire. I Sie nẹ̌koạ pẹ̌kakakẹ̌do ringang i sire kụ nangonggọ u toratẹ̌ si sire. Mawu Ruata e něhabarẹ̌ si sire kereapa i sire harusẹ̌ mẹ̌tahamawu ringangu i sire seng lai nakatarimạu manga kědon'E.

5I sire kai pal᷊ahiten i upung i kitẹ. I Kristus tinuhụ taumata e asal᷊e kai wọu bansang sire. I Sie l᷊imembom marangẹ bọu kěbị. Dalo su Ruata sarang kakalẹ̌! Aming.

6Iạ e tawẹ dial᷊u mẹ̌bera u kědon Duata seng nasawehẹ̌; kai wal᷊inewe kěbị tau Israel kai umatẹ̌ pinilen Duata.

7Bal᷊inewe kěbị hěnton Abraham kai manga anạ u Ruata. Batụu Mawu Ruata něhengetang si Abraham, "Kětạeng hěnton Ishak sẹ̌sane sarung isěbạ hitenu."

8Mangal᷊ene ute hěntong Abraham apan kụ něngkakoạ manga anạ u Ruata, kai kětạeng hěntone apam piněhanạ ual᷊ingu kẹ̌don Duata; kụ bal᷊inewe kěbị hitene.

9Batụu kědon Duata e kai kere ini, "Su tempo seng nịpapoěng, Iạ e sarung mẹ̌bal᷊ị, kụ i Sara sarung piạ anạ e esẹ sěngkatau."

10Dingangu ini lai: i Ribka něhěnding u anạ esẹ duang katau wọ'i amange sěmbaụ kụ kai Ishak i upung i kitẹ e.

11Kal᷊imonan anạ darua ene pinẹ̌hanạ, Mawu Ruata e seng nanilakehu pilen'E waụgu katěpasenge. Pinilen Mawu Ruata e wal᷊inewe měngumbala suapan ikakoạu taumata kaiso mangumbala su kakuin Duata sẹ̌sane. Batụu su tempon anạ i Ribka i rẹ̌dua esẹ ene e wẹ̌dang ta nakakoạ hal᷊ẹ̌ mapia arau hal᷊ẹ̌ dal᷊aị,

12Mawu Ruata e seng něhengetang si Ribka, "Kụ iakange sarung mẹ̌tangkiang tuari."

13Su ral᷊ungu Winohẹ Susi kạbawohẹ u Mawu Ruata něhengetang kere ini, "I Yakub e Takụ kěndageng arawe i Esau e Takụ ipẹ̌binsị."

14Apạe ikapul᷊is'i kitẹ orasẹ̌ ini? U Ruata ene tạ kal᷊aadile ngae? Semben nal᷊ahẹ u Ruata e mambeng adilẹ̌!

15Batụu Mawu Ruata něhengetang si Musa, "Iạ sarung mapakal᷊ahẹu al᷊amatẹ̌ si sain Takụ pělahekangu al᷊amatẹ̌ dingangu Iạ sarung mapakal᷊ahẹu tatal᷊ěntụ si saịewen Takụ pělahekang u tatal᷊ěntụ."

16Kụ putusang u Ruata ene wal᷊inewe iumbala su kapulun taumata arau wọu saghedu taumata, kaiso su kapian naungu Ruata sẹ̌sane su těngon taumata pinilen'E ene.

17Batụu su ral᷊ungu Winohẹ Susi e mạbawohẹ, "Mawu Ruata e něhengetang su ratun Misirẹ̌, 'Iạ e mapakariading kau ratu tumbạu waugu timona sěmbaụ ini, mědeạu ringang i kau, Iạ manodẹu kawasa-Ku mase mapakariading areng-Ku ipẹ̌dal᷊ahabarẹ̌ su kaguwạu dunia e.'"

18Kụ, Mawu Ruata e tụtal᷊ěntụ bue su pẹ̌sěngkatau, kereu Mawu Ruata e mapulu kerene. Dingangu Mawu Ruata e makạkoạbe pěsěngkatau mẹ̌tẹ̌tungkětị u těmbọe kereu Ruata e mapuluwe lai kerene.

19Ho! I kau sarung mẹ̌bera si siạ, "Mạeng kerene unụe Mawu Ruata e wědang mapulu mapẹ̌sẹ̌sal᷊an taumata? Bal᷊inewe tawẹ u sarang sěngkatau makakapetọ u kapulun Duata?"

20Arawe i kau! I kau e kětạeng taumata. Dingangu i kau tawe wotonge wahani sumimbang su Ruata! Botonge ngae potẹ̌ u bungang makiwal᷊o su mẹ̌kakoạe, "Unụe i kau nẹ̌koạ siạ kere ini?"

21Mẹ̌kakoạ potẹ̌ u bungang e wal᷊inewe piạ kawasane mamunara ěntana masurěkạ ene su kapulun naung e? Bọu ěntana sěngkompeng ene tau e makakoạbe potẹ̌ u bungang haghine rarua: Sěmbaụ mal᷊ěnggihẹ̌ arawe wal᷊ine e tawe tumanịe mal᷊ěnggihẹ̌.

22Kerene lai apang kinoạu Ruata. I Sie měkẹ̌karaki mẹ̌deạu manodẹu ral᷊angeh'E ringangu mělahẹu kawasan'E. Kaiso i Sie mang mẹ̌sẹ̌sabar'i sire apang hinong ihukung ual᷊ingu nakakariadin Sie limangehẹ̌.

23Mawu Ruata e mal᷊aing měkẹ̌karaki mědeạu makapělahẹu ral᷊uasẹ̌ mẹ̌dẹ̌dal᷊embo nionggọ si kitẹ apan nital᷊ěntukang'E. I kitẹ e seng nisạdiang'E mẹ̌deạu manarimạ u ral᷊uasẹ̌ ene.

24I kitẹ e seng nikuiang'E, bal᷊inewe kětạeng bọu tau Yahudi, kaiso mal᷊aing bọu manga wansa wal᷊ine.

25Batụu su ral᷊ungu bukẹ̌ u Nabi Hosea, Mawu Ruata něhengetang, "I sai-sain bal᷊ine umatẹ̌-Ku, sarun Takụ isẹ̌bạ, 'Umatẹ̌-Ku'. Bansa kụ bal᷊ine Takụ ikěndagẹ̌, sarun Takụ isẹ̌bạ, 'Ikẹ̌kěndagẹ̌-Ku'.

26Dingangu su tampạ suapam pinẹbera su taumata, 'I kamene wal᷊ine kawanua-Ku,' sene i sire e sarung isẹ̌bạ manga anạ u Mawu Ruata kụ biahẹ̌."

27Nabi Yesaya nẹ̌bera masěgadẹ̌ mạanun tau Israel u, "Manilaing tau Israelẹ̌ e kakěpal᷊e kere ěnne su apeng, kaiso tumbạeng mahal᷊i sarung masal᷊amatẹ̌;

28batụu Mawu e sarung mal᷊ighạ měnawong hukumang baụgu ral᷊ohon dunia."

29I Yesaya mal᷊aing nẹ̌bera kere ini, "Mangawe andene Ruata Makawasa e tawe něněntangu hitene si kitẹ e, ute nal᷊ahẹu i kitẹ kěbị e seng nariadi kere Sodom dingangu Gomora."

30Kụ, nimbụe ute kai ini: Manga kawanuam bansa wal᷊ine kụ bal᷊inewe tau Yahudi e tawe němpẹ̌tatumẹ̌gal᷊ẹ̌, tadeạu pẹ̌kakauh'i sire ringangu Ruata e saụbe makoạ mapia. Kai ual᷊ingu i sire mạngimang, tangu Mawu Ruata saụewe nangul᷊ị pěral᷊ahěmpukang i sire ringang'E nipakapia.

31Kasueěnge tau Yahudi e měngkate mẹ̌bẹ̌bangkailangu tatuhụ toratẹ̌ tadeạu pẹ̌kakauhi sire ringangu Ruata e saụ maul᷊ị kapia. Kaiso i sire mang tawẹ ual᷊ine apa.

32Unụe i sire tawe nakaratingu ene? Batụu i sire němpẹ̌koạ ene e wal᷊inewe ual᷊ingu mạngimang su Mawu Ruata, kaiso ual᷊ingu munaran sire hala. Hakịu ene i sire kai mạtangga su, "Watu katatanggaěng".

33Mạanun batu ene e tangu su ral᷊ungu Winohẹ Susi e mạbawohẹ kere ini: "Tatingangko ini: Su Sion seng Takụ nipěllokangu watu kụ sarung makakasangkong taumata kụ i sie kai watu ghẹ̌guwạ sěmbaụ kụ sarung makakariadi taumata manawo. Arawe taumata apan mạngimang si Sie tawe sarung mamea."



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Roma 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel