Dual Panel1Lohong bukẹ̌ ini e měbẹ̌běkeng apa iwẹ̌bokạ i Yesus Kristus mạanung mangạ e apa sarung mariadi. Mawu Ruata e napakasingkạ si Kristus tadeạu i Sie mapakal᷊ahẹ su manga ěllang'E apan seng tawẹ kararěngụ e harusẹ̌ mariadi. I Kristus rimolohu manga malạekat'E sol᷊ong anung Yohanes ěllang'E, apạul᷊ị u karariading kal᷊awọu munara ene si sie.
2Tangu i Yohanes něběkẹen patikụ apang kinasilone e; kụ seng ini e katataingu wěkene mạanun titang Mawu Kasěllahenge kụ nitoghaseng i Yesus Kristus lụliu pẹ̌sasahidin'E.
3Kariangkamang taumata kụ mapẹ̌basa ringangu i sain mạpararingihu wal᷊on těbal᷊u bukẹ̌ ini e mase matuhụ suapang kụ kạbawohẹ su ral᷊unge. Batụu tawẹ karěngụ e patikụ ini e sarung mariadi.
4Manga anạ u sěmbaụ su kěbị jamaatẹ̌ pitu su ěntanang Asia! Iạ i Yohanes, měkẹ̌karalọ i kamene kěndagengu al᷊amatẹ̌ dingangu karal᷊unsemahẹ̌ bọu Mawu Ruata -- i Sie kụ ene, kụ seng ene, dingangu sěntiniạ ene -- ore wọu kěbị rohkẹ̌ pitu kụ ene su těngon kararatun Duata,
5ringangu wọu i Yesus Kristus, sahidi satia. Kai i Sie kahumotong-motongange niapẹ̌biahẹ̌ kapia wọu kapapohonge ringangu kai i Sie kawasang patikụ datun dunia e. Mawu Yesus kiměndag'i kitẹ, kụ ual᷊ingu kapapohong'E, i Sie něliung kitẹ bọu patikụ dosang kitẹ,
6kụ něhengkẹ i kitẹ niapakakoạ kawanua těntani manga imang, mẹ̌tatangkiang Duata, i Amang'E. Kai i Yesus Kristus ene mawantugẹ̌ dingangu kawasa sarang karěngụ e. Aming!
7Kakělla, i Sie riměnta mạdal᷊iwungu winawa! Kěbị taumata e sarung makasilo si Sie, sarangkewen lai i sire apan něněkạ si Sie. Patikụ bansa su dunia e sarung lumungkang ual᷊ing i Sie. Ore, těngadẹ̌! Aming!
8"Kai Iạ e kahumotongang e ringangu pangěnsueěnge," ungkuěngu Mawu Ruata e, kụ seng ene, dingangu kụ ene sěntiniạ, Kụ Lembong Kawasa.
9Iạ e kai i Yohanes, anạ u sěmbaụ u kụ ukure mẹ̌sul᷊ung'i kamene su ral᷊ungu pěnanal᷊udẹ̌ susa kụ lụhombang su apan tumatol᷊e si Kristus. I kitẹ e hinong makědang susigěsạ tarangkewe su sěngkatau umat'E tataghuaneng'E. Iạ e niwembang su tahanusang Patmos ual᷊ingu iạ mělẹ̌habaru hengetang u Mawu Kasěllahenge nitoghasengu sasahidin Mawu Yesus.
10Su ěllon Mawu e, iạ kai nilohoěngu Rohkẹ̌ u Ruata, bọu e iạ nakaringihẹ̌ tingihẹ̌ maihạ -- kere tingihu napiri -- mělẹ̌luntingihẹ̌ su likurangku.
11Tingihẹ̌ ene nẹ̌bera u, "Bohẹko apang ikasilonu, kụ dingọko bukẹ̌ ene su jamaatẹ̌ pitu ini: Efesus, Smirna, Pergamus, Tiatira, Sardis, Filadelfia, ringangu Laodikia."
12Ene iạ nẹ̌bihụ e sol᷊ong likude namanda měnsang kai i sai mạmisara si siạ e. Tangu iạ nakasilọ e ral᷊aedu sol᷊o nikoạ bọu wul᷊aeng kal᷊awọe pitum baụ.
13Sutal᷊oarang manga l᷊aedu sol᷊o ene rụdarisị sěngkatau, kụ kẹ̌kasilo al᷊ingkai kere taumata. I Sie nẹ̌pakẹ u kakingkaenge kụ kanandụe nịdatingu l᷊aedẹ̌. Su sěbạ'E i Sie nẹ̌pakẹu tatukuse wọu wul᷊aeng.
14Utạ'E mawira kere manga rukụ u domba, kawirane kere kapesẹ̌: Matan'E kụkuhenabẹ̌ kere putung;
15l᷊aed'E lụhentẹ kere witụ nitongkạ. Tingih'E kere ghal᷊ědụ u akẹ u tědunang gaghuwạ.
16Liman'E koaneng mạngumbelẹ bituing pitu, mase wọu mohong'E nisěbangengu peda mahoro sěmbaụ kụ horone su ruamběka. Gatin'E kụkuhěnabẹ̌ kere matangěllo su ěllo mal᷊ětu.
17Ené iạ nakasilọ e si Sie, kutẹu iạ kawe nělinsumagẹ̌ su těngon'E kere taumata nate. Ené i Sie nanělideng liman'E koaneng si siạ e kụ nẹ̌bera, "Abe katakụ! Kai Iạ e panẹ̌takenge ringangu pangěnsueěnge.
18Seng Iạ e i Sie kụ biahẹ̌! Iạ e seng nate, kaiso kakěllako, Iạ e wiahẹ̌ sarang marěngụ-děngụ. Iạ e mạngawasa papate, ringangu dunian taumata nate.
19Ual᷊ingu ene, wohẹko apang kụ kinasilonu, kụ apạeweng ene su orasẹ̌ ini e, ringangu apạewen sarung mariadi e.
20Kai ini e rahasiang bituing pitu e kinasilonu su l᷊ima-Ku koaneng, dingangu wọu ral᷊aedu sol᷊o wul᷊aeng pitumbaụ e: Bituing pitu e kai manga malạekatu jamaatẹ̌ pitu, dingangu ral᷊aedu sol᷊o pitu e ute jamaatẹ̌ pitu ěndaị e."