Dual Panel1Ene kinasilọ e su l᷊angị sěmbaụ tanda makạdal᷊inaụ tawẹ sihinge. Kụ piạ e tau wawine sěngkatau kụ matangěllo e nakoạ kere pakeange, arawe rararisikange su wowom bul᷊ang. Su těmbọ e piạ paporonge wituing mapul᷊o dua.
2Bawine ene měbẹ̌bawa kapapia, kụ ual᷊ingu seng tempone měhěnding, tangu i sie mạmansagu kal᷊ikine.
3Mase nakasilo kạpia apa makạdal᷊inaụ su l᷊angị. Piạ nagạ mahamụ gẹ̌guwạ-guwạ sěmbua kụ těmbọ e pitu ringangu sungene mapul᷊o. Su apan těmbọ e piạ makotane pẹ̌sěmbaụ.
4Dingangu tol᷊ene ipěmẹ̌mol᷊eng sěngkatěllung kapahiakeng bọu manga wituing su l᷊angị, kụ iwẹ̌bahunge sol᷊ong dunia. Nagạ ene e rimarisị su těngon tau wawine kụ seng tempone měhending e, mědeạu manelohẹ̌ dariọ e su kawawantele.
5Mase tau wawine ene něhěndingken sěngkatau rariọ esẹ kụ sarung mẹ̌parenta patikụ umatẹ̌ dingangu těking uase. Arawe rariọ e kai niaho wọu tau wawine ene e, kụ bọu ene nitonda su anun Mawu Ruata su těngong kaderang kawawantugẹ̌ e.
6Tangu tau wawine ene e timal᷊ang sol᷊ong banua tạ taune, su tampạ kụ seng nisadian Duatae waug'i sie. Sutampạ ene hikinang gěnnangu 1260 su ěllone karěngụ e.
7Ene su sorga e nariadị e pẹ̌sasekẹ. I Mikhael dingangu manga malaekatẹ̌ e měmpẹ̌sẹ̌sekẹ u nagạ ene. Nagạ ene měsẹ̌sekẹewe i siren malạekatẹ̌ rụdokạ si Mikhael.
8Kutẹu nagạ e kawe kinawatạ. I sie ringangu manga malaekate seng taipakawala saụ mẹ̌tanạ su sorga e.
9Nagạ masaria ene nirěmmẹ sol᷊ong l᷊ikude! Seng i sie nạung těmpu seng maghurang ene e isẹ̌sẹ̌ba setang arau rohkẹ̌ dal᷊akisẹ̌, kụ měngẹ̌ngakal᷊ẹ̌ patikụ dunia e. I sie nirěmmẹ su dunia sěngkarěmmẹ dingangu manga malạekate.
10Mase iạ nakaringihe tingihẹ̌ maihạ bọu sorga e měbẹ̌bera, "Seng ini e tempone Mawu Ruata e měngambang umat'E! Kụ orasẹ̌ ini e Mawu Ruata e něnodẹ u kawasan'E kere sěngkatau Ratu. Kụ orasẹ̌ ini e Datu Mananal᷊amatẹ̌ kụ seng nipẹ̌kědone ene mal᷊aing měnẹ̌nodẹ u kawasane! Batụu apang mapẹ̌sẹ̌sal᷊an manga anạ u sěmbaụ i kitẹ su těngon Mawu e ěllo hěbi, seng niapasěbang bọu sorga.
11Manga anạ u sěmbaụ i kitẹ e seng namatạ u rahan Ahusu Domba e si sie, mase ual᷊ingu hengetang kahěngang bọu Ruata e ipěkẹ̌kakeken sire. I sire sadia měnarakangu pẹ̌bawiah'i sire sarangbe lai mate.
12Ual᷊ingu ene pahul᷊uase sorga e ringangu kěbị apan mětẹ̌tumanạ su ral᷊unge! Kai kạěngkěhang bue rul᷊unge ringangu l᷊audẹ̌ e, batụu setange seng limintụ sol᷊ong anung kamene kụ pědu marasai, u i sie kai masingkạ u tempone e seng kate lai kadodọ."
13Su tempong nagạ ene nakapěndang u i sie kai seng nirěmmẹ su dunia e, i sie nanětạ e něnahusu tau wawine kụ seng něhěndingu rariọ esẹ ene.
14Arawe tau wawine e seng nighěllirangu papanidu kasiahe ghẹ̌guwạ duambẹ̌ka, tadeạu i sie tuměllạ sol᷊ong katatanakenge su wanua l᷊inggi, su tampạ u i sie sarung hikinang těllu taung dingangu měloara karěngụe, kụ deng ikaingkạ bọu těmboěngu nagạ.
15Tangu nagạ e nanokal᷊eng akẹ mal᷊awọ-l᷊awọ bọu mohonge ipẹ̌tẹ̌timona tau wawine e, tadeạu i sie iapakaonodẹ̌.
16Arawe dunia e kawe nẹ̌tul᷊ungu tau wawine e; kụ dunia e gimanganga kụ nanelohẹ̌ kal᷊awọu akẹ siměbang bọu mohongu nagạ e.
17Nagạ ene nẹ̌bawal᷊uang marehe su tau wawine e, hakịu i sie měngkatewe tamai nangalo hitene wal᷊ine wọu tau wawine ene, kụ patikụewe apang mararingihẹ̌ su hengetangu Mawu Ruata e, dingangu apạeweng měmpẹ̌sẹ̌sahiding Mawu Yesus dingangu kawasane.